Li Jesukristo tatxtenq’a

Salmos 147:3

Li Jesukristo a’an laa metz’ew. Ak xb’aanu chixjunil li na’ajman re naq taawanq xsahil aach’ool sa’ li yu’am a’in ut chi junelik. Wi nakasik’ ru a’an ut lix evangelio, nakasik’ ajwi’ ru li sahil ch’oolejil maak’a’ roso’jik.

Us ta nakayal aaq’e chixb’aanunkil li us, wan naq nakatpaalto’. Nakab’aanu li ink’a’ xawaj raj. Kama’an naqak’ul chiqajunil. Naq naqak’ul a’an, maare nalaj qach’ool ut naqeek’a naq maajo’q’e took’ulub’aaq. A’b’an wan jun chaab’il esil k’a’jo’ xchaq’al ru ut nak’ehok yo’onihom! Li Dios nakatxra, jo’kan naq kixtaqla chaq li Jesukristo, li Ralal, li kixk’ul laa maak sa’ xb’een re naq tatruuq chixjalb’al aak’a’uxl, chixk’ulb’al xkuyb’al aamaak, ut chi xik chi uub’ej.

Li junelikil yaal

Li Jesukristo tixk’e laa metz’ew. A’an tatxtenq’a chixjalb’al laa wajom, laa k’oxlahom, ut laa b’aanuhom. Naq wan laa k’a’uxl, laa xiw, malaj laa ch’a’ajkilal, a’an tixk’ojob’ laa ch’ool. Tatxtenq’a sa’ chixjunil. Naru nakapaab’ li Jesukristo.

Li jalb’a-k’a’uxlej maawa’ tojb’a-maak xb’aan laa maak; a’an b’an li b’e nokorach’ab’ wi’ li Jesus chiru li maak. Xjalb’al qak’a’uxl naraj naxye xjalb’al qayu’am—xkanab’ankil chiqix li qamaak ut sutq’iik rik’in li Dios. Naraj naxye chaab’ilo’k ut xk’ulb’al xkuyb’al li qamaak. Moko yal jun sut ta ajwi’ nak’ulman; rajlal yoo chi k’ulmank.

Li b’oqok

Jayali li Jesukristo sa’ laa yu’am. Sik’ lix tenq’ a’an sa’ chixjunil li nakab’aanu.

Jal aak’a’uxl. Sik’ li Qaawa’ chi wan aach’ool chixchaab’ilob’resinkil aawib’. Naq nakab’aanu li ink’a’ us, ch’olob’ li xab’aanu chiru li Dios chi maak’a’ aab’alaq’, ut, wi na’ajman, chiru laa obiisp ut yalaq ani rahob’tesinb’il aab’aan. Yal aaq’e chixtuqub’ankil li ink’a’ us xab’aanu.

Chisaho’q aach’ool rik’in li maatan re yalok ut chaab’ilo’k. Us ta ch’a’aj ut hoonal naraj, maakanab’ xyalb’al aaq’e. Yal aaq’e ut paab’ li Qaawa’. A’an rajlal tatxtenq’a.

Li Jesus chunchu chire li yo’leb’aal ha’ rochb’een jun ixq aj Samaria

Li osob’tesink yeechi’inb’ileb’

Laa Choxahil Yuwa’ tixkuy aamaak ut tatxk’irtesi naq taajal aak’a’uxl. Tixk’e li tuqtuukilal ut li sahil ch’oolejil sa’ xna’aj li xutaan. Ink’a’ chik taajultiko’q re laa maak. Li Jesukristo a’an laa kawilal, ut rik’in lix kawilal, taanimanq laa wajom chixpaab’ankil lix taqlahom.

Li Jesus tixjal laa waam ut laa yu’am. Timil timil tatk’iiq ut tatwulaq jo’ chanru a’an.

Li patz’ok ut li sumenk

Chan ru tinnaw naq kuyb’il inmaak xb’aan li Dios? Li Dios naxye naq tixkuy xmaak li ani naxjal xk’a’uxl. Naq nak’ojob’aak aach’ool xb’aan li Musiq’ej, naru taanaw naq lix wankilal li Kolonel re xtojb’al aawix yoo chi k’anjelak sa’ laa yu’am.

Jo’q’e na’ajman ru xtenq’ li obiisp re xjalb’al ink’a’uxl? Wan xlaawil li tijonelil ut musiq’ejil maatan rik’in li obiisp re naq tatxtenq’a chixjalb’al aak’a’uxl. Naru taasik’ lix tenq’ ut lix na’leb’ yalaq jo’q’e. Wi ninqeb’ laa maak, jo’ xq’etb’al li chaq’rab’ re saq ru ch’oolej, aatinan rik’in laa obiisp. Ink’a’ tatxjit. A’an ruuchil li Jesukristo ut tatxtenq’a chixnawb’al chan ru taajal aak’a’uxl chi tz’aqal ut taak’ul lix wankil li Kolonel re aak’irtesinkil ut aakawob’resinkil.

Ninyal inq’e chixjalb’al ink’a’uxl, a’b’an ninb’aanu wi’chik li ink’a’ us. K’a’ru tento tinb’aanu? Maakanab’ xyalb’al aaq’e. Sik’ li Kristo, ut paab’ a’an. Tz’aqal li rusilal. Yal xb’aanunkil wi’chik. Moko aajunes ta wankat sa’ lix yalb’al aaq’e. Li Jesukristo junelik nawan aawochb’een.

Chi’ilmanq Enos 1:6 (naru taamesuuq chaq li xutaan); Mosiah 4:3 (rik’in li Santil Musiq’ej, li Dios naxk’e chanaw naq kuyb’il aamaak); 26:30 (jo’ k’ihal sut naqajal qak’a’uxl li Kolonel naxkuy qamaak); Eter 12:27 (li rusilal li Kolonel naru tixkʼe li kʼaʼru qʼun xmetzʼew choqʼ kawilal); Moroni 6:8 (li ani naxjal xk’a’uxl nakuye’ xmaak); 10:32 (chitzʼaqloq aawe aawu rikʼin li Kristo); Tzol’leb’ ut Sumwank 1:32 (li Qaawa’ naxkuy xmaak li ani naxjal xk’a’uxl); 58:42–43 (xch’olob’ankil ut xkanab’ankil li maak a’an xcha’al li jalb’a-k’a’uxlej).

Eb’ li patz’om re li recomendacion re li santil ochoch

Ma wan xnawom aach’ool chirix lix tojb’al rix li maak xb’aan li Jesukristo, ut chirix lix k’anjel a’an jo’ aj Kolol aawe ut aj Tojol aawix?
Ma wankeb’ li nimla maak sa’ laa yu’am li tento raj xtuqub’ankil rik’ineb’ li wankeb’ xwankil sa’ li tijonelil re taaruuq taajal aak’a’uxl?