Nakat-osob’tesiik xb’aaneb’ lix laawil ut lix wankilal li tijonelil

Chixjunileb’ li laaw ut li wankilal sa’ li tijonelil neke’chal rik’in li Jesukristo. Chixjunileb’ li neke’k’amok re li tijonelil neke’xxtaw xxe’il lix wankilal rik’in li Kristo. Li Kolonel naxye ani taak’uluq re li wankilal a’in ut ani taak’uluq reheb’ lix laawil li tijonelil. Laa’o naqapaab’ lix nawom a’an li tz’aqal re ru.

Li Jesukristo kixk’ojob’ wi’chik lix tijonelil sa’ li qakutan. A’an naxtaqla chan ru taa’oksimanq li tijonelil. Chalen chalen, laj Adan, laj Moises, laj Pedro, ut naab’aleb’ chik li profeet ke’xk’uleb’ lix laawil li tijonelil. Sa’ li qakutan, laj Jose Smith kixk’uleb’ xlaawil li tijonelil rik’in laj Jwan aj Kub’sihom Ha’, laj Pedro, laj Moises, laj Eliyah, laj Elias, ut wankeb’ chik xkomon. Wan chixjunileb’ lix laawil li tijonelil sa’ ruchich’och’ rik’ineb’ li komon sa’ li Xb’eenil Awa’b’ejil ut lix Molameb’ li Kab’laju chi Apostol sa’ li kutan a’in. Eb’ laj jolominel sa’ li tijonelil ut eb’ li awa’b’ej re molam sa’eb’ li jar na’ajej neke’xk’ameb’ ajwi’ xlaawil li tijonelil choq’ re li k’anjel b’oqb’ileb’ wi’. Lix laawil li tijonelil neke’xjolomi lix k’anjel li Dios. Naxk’e xliceenseb’ ut xwankileb’ li winq ut li ixq re tenq’ank sa’ li k’anjel a’an.

Lix wankilal li tijonelil narosob’tesi chixjunileb’ li ralal xk’ajol li Dios. Xb’aan naq kik’ojob’aman wi’chik li tijonelil, laa’at naru nakak’uleb’ li k’ojob’anb’il k’anjel ut nakat-ok sa’ sumwank rik’in li Dios. Naru tatk’anjelaq sa’ xk’ab’a’ li Dios naq taak’ul aataqlankil malaj aab’oqb’al rik’in ani wan xwankil.

Chak’ulub’a laa b’oqb’al sa’ li Iglees ut k’anjelan chi tiik. Naq b’oqb’ilat chi k’anjelak sa’ li Iglees, nakatk’ojob’aak rik’in xwankilal li Dios re k’anjelak sa’ laa b’oqb’al. Li Dios naru tatxb’eresi sa’ laa b’oqb’al. Naq nakatk’anjelak, nakak’e ruuchil li Jesukristo. K’e laa chaab’ilal re.

Xaqab’ xwankileb’ li b’oqb’ileb’ chi k’anjelak xb’aan li Dios. Xxaqab’ankil xwankileb’ ink’a’ naraj naxye yal xtaqsinkil laa wuq’ naq yaab’asinb’il xk’ab’a’ sa’ jun ch’utam. Naraj b’an naxye xwaklesinkil ut xtenq’ankil. Yal aaq’e chixk’utb’al naq nakaxaqab’eb’ xwankileb’ li ani b’oqb’ileb’ xb’aan li Jesukristo chi k’anjelak sa’ lix Iglees.

B’aanu li k’anjel k’eeb’il aawe xb’aaneb’ laj jolominel sa’ li Iglees—jo’ ajwi’ li awa’b’ejil re laa molam malaj tzoleb’aal. Xe’xk’ul xwankilal rik’in li Dios, li neke’xjek’ aawe re xb’aanunkil li k’anjel a’an. Maare wan aataqlankil chirilb’al jun komon, chixk’eeb’al xsahileb’ xch’ool li komon naq neke’wulak sa’ li ch’utam re li loq’laj wa’ak, malaj chi tenq’ank sa’ jun k’anjel. Maak’a’ naxye k’a’ru aataqlankil, b’aanu a’an jo’ xtzolom li Jesukristo ut re xtenq’ankileb’ li ralal xk’ajol li Dios.

Naru nakapaab’ naq li k’ojob’anb’il k’anjel nakak’ul a’an k’eeb’il rik’in xliceens li Jesukristo. Ka’ajwi’ sa’ lix Iglees li Jesukristo nak’ulman a’an. Sa’eb’ li k’ojob’anb’il k’anjel re li tijonelil, nak’utman lix wankil li Dios.

Tatwanq choq’ k’anjeleb’aal sa’ ruq’ li Qaawa’. Naq nakatk’anjelak chiru li Qaawa’ rik’in lix wankilal a’an ut chi b’eresinb’il xb’aaneb’ lix moos li neke’k’amok reheb’ xlaawil li tijonelil, li Qaawa’ tatxtenq’a chixnawb’al chan ru taatenq’aheb’ laa was aawiitz’in sa’ lix k’anjel. Li Jesukristo a’an laa kawilal. Li tenq’ank nakak’e tatxnach’ob’resi rik’in li Qaawa’ ut tixk’e xsahil aach’ool.