Li Dios naraj aatinak aawik’in

Li Musiq’ej nakatxb’eresi rik’in laa Choxahil Yuwa’ ut li Jesukristo. A’an jun xk’anjel li Santil Musiq’ej aajel ru. A’an tatreek’asi ajwi’ chixjalb’al aak’a’uxl ut chixtaaqenkil li Jesukristo re naq tat’osob’tesiiq xb’aan lix mayej re xtojb’al qix. Naq nakajal aak’a’uxl, li Musiq’ej nakatxsantob’resi ut nakatxtenq’a chi jalaak.

Li Santil Musiq’ej na’aatinak sa’ laa k’a’uxl ut sa’ laa ch’ool. Jalan jalanq naq nachal li raatin li Musiq’ej sa’ laa k’a’uxl—maare li musiq’anb’il na’leb’, li tije’k, li saqen ruhil na’leb’, ut li musiq’ejil jultikaak. Naq li Santil Musiq’ej nakatraatina, nawakli, nak’ojla, ut nakawu aach’ool, ut nakaweek’a tuqtuukilal, rahok, sahil ch’oolejil, tuulanil, b’antioxink, ut kuyum.

“K’ul li Santil Musiq’ej.” Li aatin a’in xyaab’asiman naq xatk’ojob’aak choq’ komon sa’ lix Iglees li Kristo. Chan ru nakak’ul li Santil Musiq’ej? Naq nakapaab’ li raatin li Jesukristo. A’an laa kawilal. Xtaaqenkil li Jesukristo naxb’oq li Loq’laj Musiq’ej sa’ laa yu’am.

Sik’ laa Choxahil Yuwa’ rik’in tijok. Hoy li reek’ahom aach’ool chiru. B’antioxi re a’an li k’iila usilal naxk’e aawe. Seraq’i re lix sahil aach’ool, laa k’a’uxl, ut laa patz’om. Ch’anch’o wanqat ut ab’i li naxsume. Maare tixtuqub’ aach’ool, tixk’e aana’leb’, malaj tixwaklesi aach’ool chi k’anjelak.

Ab’i lix yaab’ xkux li Dios sa’eb’ li loq’laj hu. Eb’ li loq’laj hu a’aneb’ li raatin li Dios choq’ aawe! Tz’ileb’ rix wulaj wulaj re xtawb’al lix yaab’ xkux ut reek’ankil lix rahom. Naq nakawileb’, k’oxla k’a’ru naraj li Dios xk’utb’al chawu, ut tz’iib’a li nakak’oxla. K’e aach’ool chirilb’aleb’ li loq’laj hu wulaj wulaj—ut q’axal wi’chik lix Hu laj Mormon—chiru laa yu’am.

B’aanu li naxye li Musiq’ej aawe. Wi nakak’ul jun na’leb’ chirix xb’aanunkil k’a’ruhaq li taarosob’tesi laa was aawiitz’in, b’aanu a’an! Chixjunil li kʼaʼru chaabʼil rikʼin li Dios nachal chaq. K’ut chiru laa Choxahil Yuwa’ naq k’eek’o aach’ool chixtaaqenkil li na’leb’ naxk’e aawe.

Li Santil Musiq’ej tixk’ojob’ aach’ool ut tixk’am aab’e. A’an aj K’ojob’anel Ch’oolej. A’an tatxwaklesi naq wanq aach’a’ajkilal. Tixk’e aawe k’a’ru taaye malaj k’a’ru taab’aanu. Chi tenq’anb’il xb’aan, naru nakanaw b’ar wan li yaal ut b’ar wan li b’alaq’. Tatxtenq’a chirilb’al li chaab’ilal aawik’in ut rik’ineb’ laa was aawiitz’in. Li Musiq’ej naxye ajwi’ resil li xiwxiw aawe. Tatxb’eresi rik’in li Jesukristo ut tatxnajtob’resi rik’in li maak.

Naru nakak’ul musiq’ejil maatan. K’a’jo’ xk’ihaleb’ li maatan naxk’e li Dios reheb’ li ralal xk’ajol rik’in lix Musiq’. Sa’ li loq’laj hu tz’iib’anb’il naq junjunq reheb’ a’an, a’an li k’utb’esinb’il na’leb’, li paab’aal chirix li Kristo, li k’utuk, li tz’ilok-ix, ut li chaab’il na’leb’. Tz’aama chiru laa Choxahil Yuwa’ naq tixye aawe resileb’ li musiq’ejil maatan ak xk’e aawe, chan ru naq taak’anjelaheb’, ut k’a’ru naraj a’an naq taab’aanu rik’ineb’ re rosob’tesinkileb’ laa was aawiitz’in.