12.
Yexus Khetos coj kev xyiv fab los
Lus Qhuab Qhia thiab Kev Khi Lus 101:36
Koj Leej Txiv Saum Ntuj Ceeb Tsheej zoo siab heev. Nws xav kom koj, Nws tus me nyuam, muaj kev xyiv fab ntau npaum li koj muaj tau. Yog vim li ntawd Nws thiaj npaj txoj hau kev zoo siab. Nws txib Nws Leej Tub, Yexus Khetos, los ua koj tus Cawm Seej thiab qhia Nws txoj moo zoo. Lo lus gospel txhais tias “txoj moo zoo,” thiab txoj moo zoo yog qhov uas vim muaj Yexus Khetos, koj muaj tau kev zoo siab hauv lub neej no thiab muaj tau kev xyiv fab puv npo mus ib txhis li.
Tej Lus Tseeb uas Nyob Mus Ib Txhis
Nws xav kom nej muaj kev zoo siab thiab kev xyiv fab. Nov yog lub hom phiaj ntawm koj lub neej. Yog lub hom phiaj ntawm Leej Txiv Saum Ntuj Ceeb Tsheej txoj hau kev zoo siab. Tiam sis tseem yuav muaj tej lub sij hawm thaum koj tu siab thiab raug tej yam nyuaj heev. Txawm li ntawd los tus Cawm Seej pab tau koj nyiaj tej yam nyuaj thiab nrhiav kev xyiv fab.
Kev xyiv fab tsis los ntawm koj tej xwm txheej; kev xyiv fab yeej los ntawm kev coj raws li Yexus Khetos. Tej zaum yuav muaj ib hnub tsis zoo, ib lub lim tiam tsis zoo, los sis ib xyoo tsis zoo. Tiam sis kev xyiv fab tsis yog qhov uas tsis muaj kev tu siab; yeej yog qhov uas koj muaj Yexus Khetos nyob hauv koj lub neej.
Tus Cawm Seej txoj kev xyiv fab yeej kav ntev tshaj txhua yam. Dab Ntxwg Nyoog yuav ntxias koj kom nrhiav kev lom zem thiab kev txaus siab raws li koj lub siab nyiam xwb los sis los ntawm lub ntiaj teb. Tej yam uas tsis yog raws li Yexus Khetos Nws cov lus txib yeej yuav tsis ua rau koj muaj kev zoo siab tiag thiab kev xyiv fab uas kav ntev. Nco ntsoov tias tej yam ntawm lub ntiaj teb no los nyob ib ntus xwb. Yexus Khetos txoj moo zoo muab kev xyiv fab thiab kev zoo siab uas dawb huv thiab kav mus ib txhis pub rau koj.
Lus Caw
Cia li xaiv kev xyiv fab. Txawm yog muaj kev nyuaj siab thiab kev txom nyem hauv lub ntiaj teb no los, Leej Txiv Saum Ntuj Ceeb Tsheej kuj tsim lub ntiaj teb kom muaj ntau yam uas zoo nkauj thiab zoo. Nrhiav tej yam ntawd. Txhua hnub cia li xav seb vim li cas koj yuav xyiv fab—tej zaum koj yuav xav sau ntawv txog tej ntawd. Tej no yog tej lub txiaj ntsim los ntawm koj Leej Txiv Saum Ntuj Ceeb Tsheej uas hlub koj.
Cia li ua rau lwm tus zoo siab thiab xyiv fab. Yexus Khetos muaj kev xyiv fab puv npo vim Nws ua rau peb xyiv fab. Koj coj tau raws li Nws tus yam ntxwv thaum koj nrhiav kev zoo siab thiab kev xyiv fab thaum koj pab lwm tus. Pab ib tug neeg paub tias muaj neeg hlub nws. Qhuas ib tug neeg. Txhawb nqa ib tug uas nyuaj siab. Yog koj xav tias yuav tsum muaj kev xyiv fab ntxiv hauv koj lub neej, cia li sim ua rau lwm tus muaj kev xyiv fab.
Cia li zoo siab thaum koj teev tiam tus Tswv. Thaum koj mus rau lub tsev koom txoos, tsom ntsoov rau kev xyiv fab uas Yexus Khetos muab rau koj, thiab qhuas Nws vim Nws ua li ntawd! Ua koj feem hauj lwm kom koom siab muaj kev xyiv fab hauv koj tej kev sib ntsib ntawm lub Koom Txoos. Cia li hu tej zaj nkauj dawb ceev thaum koj teev tiam Vajtswv hauv tsev thiab hauv lub tsev koom txoos.
Cov Koob Hmoov uas Vajtswv Cog Lus Tseg
Koj muaj tau kev xyiv fab tsis hais thaum koj lub neej nyuaj los yog. Tej zaum koj yuav xav paub seb vim li cas muaj tau li no. Koj txoj kev ntseeg Yexus Khetos, Nws lub hwj chim kho mob, thiab Nws tej lus cog tseg uas kav mus ib txhis yuav ua rau koj xyiv fab tas mus li. Nws txoj kev xyiv fab kov yeej kev tu siab thiab ua rau neeg muaj kev xyiv fab dhau lawv to taub.
Koj yuav muaj txoj kev xyiv fab puv npo nyob hauv Vajtswv lub nceeg vaj xilethi-aus. Yexus Khetos kov yeej txhua yam uas yuav ua rau koj txais tsis taus kev xyiv fab nyob mus ib txhis. Thaum koj tso siab rau Nws thiab coj raws li Nws, koj txais tau txoj kev xyiv fab no.
Tej Lus Nug thiab tej Lus Teb
Yog tias yus xyiv fab thaum yus ua raws li txoj moo zoo, vim li cas kuv tu siab heev? Kev tu siab tsis yog ib lub cim uas qhia tias koj tsis ua raws li txoj moo zoo. Txhua tus lub neej raug kev ntxhov siab, kev sim siab, thiab kev nyuaj siab. Kev coj raws li Yexus Khetos yeej tsis hloov qhov no, tiam sis yuav ua rau koj muab siab npuab ib tug Cawm Seej uas nplij tau koj lub siab thiab pab koj muaj kev xyiv fab thiab kev zoo siab.
Vim il cas muaj kev txom nyem ntau heev nyob hauv lub ntiaj teb no? Ib feem ntawm kev raug txom nyem hauv lub ntiaj teb no los muaj vim tib neeg siv lawv txoj kev ywj siab xaiv tej yam tsis yog. Qhov no yuav ua rau lawv thiab lwm tus neeg raug tej yam nyuaj. Muaj tej lub sij hawm thaum tib neeg raug txom nyem tiam sis tsis muaj leeg twg ua txhuam—yeej yog vim peb nyob hauv ib lub ntiaj teb tsis zoo tag nrho. Txawm yog li cas los, thaum yus pom ib tug neeg raug txom nyem, qhov tseem ceeb yog ib tug uas yus hlub, los yeej ua rau yus nyuaj siab. Cia li paub hais tias Vajtswv kuj nyuaj siab thaum koj raug txom nyem. Nws cia tej kev sim siab ntawm lub neej no kom pab koj ua zoo zuj zus thiab npaj muaj kev xyiv fab mus ib txhis nrog Nws, tiam sis Nws yeej tsis tso koj tseg kom koj nyob koj ib leeg. Nws txib Yexus Khetos los ris koj txoj kev mob kom Nws kho tau koj zoo. Yexus Khetos yog koj lub dag zog! Thiab Nws caw koj, vim koj yog ib tug uas coj raws li Nws, kom ua tej yam koj ua taus thiaj pab tib neeg tsis raug txom nyem.
Saib Phau Ntawv Nkauj 16:11 (kev nrog Vajtswv nyob yog kev zoo siab mus ib txhis); 95:1 (hu nkauj qhuas tus Tswv); Yauhas 16:33 (cia li zoo siab; Yexus Khetos tau kov yeej lub ntiaj teb no); Kalatias 5:22 (lub txiv ntawm tus Ntsuj Plig yog kev xyiv fab); Henplais 12:2 (Yexus tau nyiaj kev txom nyem vim Nws muaj kev xyiv fab cawm Vajtswv cov me nyuam); 2 Nifais 2:25 (Vajtswv xav kom nej muaj kev xyiv fab); Amas 26:15–16 (kev ua Vajtswv txoj hauj lwm ua rau yus muaj kev xyiv fab); Lus Qhuab Qhia thiab Kev Khi Lus 18:15–16 (koj yuav muaj txoj kev xyiv fab loj heev yog hais tias thaum koj coj tau lwm tus neeg los cuag Khetos).
Tej Lus Nug Kom Tau Daim Ntawv Tso Cai Nkag Tuam Tsev
-
Koj puas muaj ib zaj lus tim khawv txog Yexus Khetos txoj Kev Theej Txhoj thiab txog Nws lub luag hauj lwm ua tus Cawm Seej thiab tus Txhiv Dim?