Yuav Tsis Xav Tau, los ntawm Yongsung Kim Havenlight tau pub siv
5.
Mus kev hauv Vajtswv txoj kev kaj
Kalatias 5:25
Koj xaiv ua tej yam zoo dua thaum koj pom tau meej. Yog vim li ntawd txoj kev kaj tseem ceeb heev; kev kaj ua rau yus txawj pom txoj kev yog. Leej Txiv Saum Ntuj Ceeb Tsheej tau muab ib lub teeb saum ntuj ceeb tsheej rau koj—lub txiaj ntsim Vaj Ntsuj Plig Dawb Huv—kom pab koj pom meej tias qhov twg yog qhov zoo thiab qhov phem, qhov yog thiab qhov tsis yog.
Tej Lus Tseeb uas Nyob Mus Ib Txhis
Koj muaj tau tus Vaj Ntsuj Plig Dawb Huv nrog nraim koj nyob. Thaum koj ua kev cai pom zoo ua ib tug mej zeej ntawm lub Koom Txoos, twb caw koj “txais tus Vaj Ntsuj Plig Dawb Huv.” Lub cib fim uas koj muaj tau tus Ntsuj Plig nrog nraim koj nyob yeej yog Vajtswv ib lub txiaj ntsim zoo tshaj plaws rau koj.
Kev xaiv ua tej yam zoo pab koj txawj hnov tus Ntsuj Plig. Muaj ntau yam zoo thiab dawb huv nyob hauv lub ntiaj teb no. Ib yam li koj lub cev raug xwm txheej los ntawm tej yam uas koj noj thiab haus, koj lub siab lub ntsws raug xwm txheej los ntawm tej yam koj nyeem, saib, thiab mloog.
Lus Caw
Siv sij hawm rau tus Tswv txhua hnub. Kawm txog Nws. Nco ntsoov txog Nws. Thov koj Leej Txiv Saum Ntuj Ceeb Tsheej. Kawm cov vaj lug kub dawb huv thiab cov yaj saub tej lus. Ces siv zog kom ua neej raws li tej yam uas koj kawm.
Nrhiav tej yam uas txhawb nqa, tshoov koj lub siab, thiab caw tus Ntsuj Plig los. Thaum koj xaiv siab, nyeem, mloog, los sis koom tes ua tej yam los, cia li saib seb tej ntawd ua rau koj xav li cas. Tej ntawd puas caw tej yam zoo? Tsis txhob ua ib yam dab tsi uas thuam tej yam dawb ceev los sis ua tej yam tsis dawb huv. Tsis txhob koom ua tej yam uas ua rau koj tsis tshua txawj txiav txim los sis tsis txawj hnov tus Ntsuj Plig zoo, xws li ua lim hiam, haus cawv, thiab haus tshuaj phem. Ua siab loj muab ib zaj vidi-aus los sis kev ua si tua, tawm yeeb yaj kiab los sis kev seev cev mus, hloov cov nkauj uas koj mloog, los sis khiav ntawm ib yam dab tsi mus uas tsis yog raws li tus Ntsuj Plig qhia.
Siv kev sib tham saum huab cua kom txhawb nqa lwm tus. Kev sib tham saum huab cua los yeej yog ib txoj kev sib tham uas muaj hwj chim heev. Yog tias koj siv, cia li tsom ntsoov rau txoj kev kaj, txoj kev ntseeg, thiab qhov tseeb. Tsis txhob muab koj lub neej piv rau tej yam uas lwm tus neeg lub neej. Nco ntsoov tias qhov uas koj muaj nqis yog los vim koj yog leej niam leej txiv saum ntuj ceeb tsheej tus me nyuam, tsis yog vim koj siv kev sib tham saum huab cua.
Nrhiav tej yam dawb huv rau koj ua thiab nrhiav kev kom nrog lwm tus sib raug zoo uas yuav kav ntev. Ceev faj kom tsis txhob cia kev siv txuj ci technology thiab tej kev qhauj tawm media pauv koj txoj kev siv sij hawm tim ntsej tim muag nrog koj tsev neeg thiab cov phooj ywg. Tej kev sib tham saum huab cua thiab lwm yam txuj ci technology los yuav siv koj lub sij hawm ntau tiam sis tsis tshua muaj nqis rau koj. Siv sij hawm so kom txhob tham saum huab cua thiab cia li nrog tib neeg tham tim ntsej tim muag.
Cov Koob Hmoov uas Vajtswv Cog Lus Tseg
Koj muaj tau tus Ntsuj Plig nrog nraim koj nyob txhua lub sij hawm. Txoj kev cog lus no yog ib feem ntawm txoj kev khi lus uas koj khi txhua lub sij hawm koj txais lub cim nco txog. Tus Ntsuj Plig yuav ua tim khawv rau koj txog Leej Txiv Saum Ntuj Ceeb Tsheej thiab Yexus Khetos. Nws yuav nplij koj lub siab, coj koj mus, ceeb toom koj, thiab ua kom koj hloov los ua neeg dawb huv. Nws yuav pab koj paub qhov tseeb thiab pom tej yam zoo hauv lub ntiaj teb no.
Tej Lus Nug thiab tej Lus Teb
Yog li cas kuv thiaj li paub tias kuv hnov tus Vaj Ntsuj Plig Dawb Huv? Yuav tsum siv sij hawm, xyaum, thiab ua siab ntev kom kawm to taub tus Ntsuj Plig. Nws siv tej yam sib txawv hais rau tib neeg. Tsis txhob tso tej yam yooj yim tseg—kev kaj siab lug uas koj muaj thaum koj mloog lwm tus hais lus tim khawv los sis kev tsis txaus siab uas muaj tom qab koj xaiv ua yuam kev. Kawm los ntawm cov vaj lug kub nrhiav tej kev uas tus Ntsuj Plig siv kom qhia neeg, thov Vajtswv txog tej kev ntawd, thiab yeej meem nrhiav cib fim kom hnov tus Ntsuj Plig.
Duab liab qab yog dab tsi? Vim li cas kuv yuav tsum tsis txhob saib? Cov duab liab qab los sis tej lus hais txog kev sib deev los tib neeg tsim kom luag xav pw ua ke. Neeg pom tau cov duab liab qab los sis nyeem tej lus hais txog kev sib deev nyob hauv vidi-aus, cov duab, cov ntawv, tej kev ua si, thiab tej zaj nkauj. Kuj nyob hauv tej lus los sis cov duab uas cov phooj ywg xa mus xa los. Cov duab liab qab saib tsis taus tej yam uas dawb ceev—peb lub cev nqaij daim tawv thiab kev xav pw ua ke. Tej zaum koj yuav pom cov duab liab qab thaum koj tsis txhob txwm nrhiav. Txawm yog koj txhob txwm saib duab liab qab los sis tsis txhob txwm saib, cia li tso tseg tam sim ntawd. Tej zaum koj yuav xav sib tham nrog koj niam koj txiv los sis lwm tus neeg laus uas koj tso siab rau. Kev txhob txwm saib duab liab qab yog kev txhaum thiab tab kaum koj txoj kev hnov taus tus Ntsuj Plig. Yuav ua rau koj tsis muaj peev xwm tswj hwm koj tus kheej thiab hloov koj txoj kev xav txog koj tus kheej thiab lwm tus. Yexus Khetos muaj hwj chim pab koj tiv taus kev saib duab liab qab thiab pab koj hloov siab lees txim. Cia li tig mus rau Nws thiab tawm ntawm kev tsaus ntuj los. Koj tus npisov pab tau koj txais dag zog thiab kev zam txim los ntawm tus Cawm Seej. Yexus Khetos yog koj lub dag zog!
Saib Phau Ntawv Nkauj 119:105 (Vajtswv txoj lus zoo ib yam li lub teeb uas ci rau peb txoj hau kev); Amaus 5:14 (xyaum ua zoo); Kalatias 5:22–23 (tej txiv ntawm tus Ntsuj Plig); Maulaunais 7:18–19 (Khetos txoj kev kaj); Lus Qhuab Qhia thiab Kev Khi Lus 6:23 (tus Tswv hais lus ua rau peb lub siab kaj); 20:77, 79 (ob zag lus thov Vajtswv foom koob hmoov rau lub cim nco txog).
Tej Lus Nug Kom Tau Daim Ntawv Tso Cai Nkag Tuam Tsev
-
Tus Tswv tau hais tias yuav tsum ua txhua yam “raws li kev huv si” rau Nws pom (Lus Qhuab Qhia thiab Kev Khi Lus 42:41). Koj puas rau siab coj huv si ntawm koj tej kev xav thiab tej yam koj ua?