6.
Hlub Vajtswv, hlub koj cov neeg zej zog
Mathais 22:37–40
Kom pab koj xaiv ua tej yam zoo, Vajtswv muab cov lus txib rau koj. Nws ua li no vim Nws hlub koj. Thiab qhov zoo tshaj plaws uas ua rau koj xav ua raws li Vajtswv cov lus txib yog vim koj hlub Nws. Kev hlub yog lub ntsiab ntawm Vajtswv cov lus txib.
Tej Lus Tseeb uas Nyob Mus Ib Txhis
Vajtswv hlub koj. Nws yog koj Leej Txiv. Nws txoj kev hlub zoo tag nrho yuav ua rau koj xav hlub Nws. Thaum koj txoj kev hlub Leej Txiv Saum Ntuj Ceeb Tsheej yog lub hwj huam tseem ceeb tshaj plaws hauv koj lub neej, ces ntau yam kev txiav txim siab yuav yooj yim dua.
Ob txoj lus txib tseem ceeb tshaj plaws yog kev hlub Vajtswv thiab kev hlub lwm tus kwv tij zej zog. Thiab leej twg yog koj tus kwv tij zej zog? Yog txhua leej txhua tus! Txhua yam ntxiv uas cov vaj lug kub thiab cov yaj saub qhia txuas rau ob txoj lus txib no.
Tag nrho cov neeg yog koj cov kwv tij thiab cov muam—tsis hais tib neeg uas txawv koj los sis tsis pom zoo rau koj. Leej Txiv Saum Ntuj Ceeb Tsheej xav kom Nws cov me nyuam sib hlub. Thaum koj ua hauj lwm pab Nws cov me nyuam, koj ua hauj lwm pab Nws.
Lus Caw
Cia li qhia Vajtswv tias koj hlub Nws thaum koj ua raws li Nws cov lus txib. Piv txwv hais tias, thaum koj hwm Hnub Caiv kom dawb huv, tsis hais kev rau siab ntseeg npaj txais lub cim nco txog, koj qhia Vajtswv tias koj txaus siab muab ib hnub hauv lub lim tiam tsom ntsoov rau Nws. Thaum koj yoo mov thiab them ib feem kaum thiab nyiaj pab, koj qhia Vajtswv tias Nws txoj hauj lwm yeej tseem ceeb rau koj dua li koj tej khoom. Thaum koj hwm Vajtswv thiab Yexus Khetos lub npe, tsis txhob hais Nkawd npe ua dog dig, ces koj qhia Nkawd tias koj ris Nkawd txiaj rau tag nrho tej yam uas Nkawd tau ua rau koj lawm.
Ua zoo rau txhua leej txhua tus vim lawv yog Vajtswv cov me nyuam. Vim koj yog Yexus Khetos ib tug thwj tim, koj ua tau ib tug thawj coj rau lwm tus pom txoj kev hlub thiab saib taus tib neeg los ntawm txhua haiv neeg, txhua txoj kev teev ntuj, thiab lwm pawg—qhov tseem ceeb yog cov uas tej zaum raug tej lus phem thiab raug luag ua phem rau lawv. Cia li pab cov uas kho siab, nyob lawv ib leeg, los sis pab tsis taus lawv tus kheej. Pab lawv hnov Leej Txiv Saum Ntuj Ceeb Tsheej txoj kev hlub dhau los ntawm koj. Qhia lawv txog cov koob hmoov uas Nws tau foom pub rau koj, thiab caw lawv coj raws li Yexus Khetos.
Ua tib zoo kom koj tej lus yuav qhia tias koj hlub Vajtswv thiab hlub lwm tus—tsis hais koj sib tham tab meeg tus ntawd los sis saum huab cua. Cia li hais tej yam uas txhawb nqa—txhob hais tej yam uas ua rau neeg sib nrug, mob siab, los sis tu siab, txawm yog tso dag xwb los xij. Koj tej lus muaj hwj chim. Cia koj tej lus yuav muaj hwj chim ua zoo.
Qhia koj tsev neeg tias koj hlub lawv. Kev hlub tag nrho Vajtswv cov me nyuam pib hauv tsev. Ua koj tes hauj lwm kom tib neeg paub txog tus Cawm Seej txoj kev hlub nyob hauv tsev.
Cov Koob Hmoov uas Vajtswv Cog Lus Tseg
Koj yuav nrog Vajtswv sib raug zoo ntxiv thaum koj qhia txog koj txoj kev hlub Nws los ntawm koj txoj kev ua raws li Nws cov lus txib thiab txoj kev ua raws li koj tej kev khi lus.
Koj yuav nrog lwm tus sib raug zoo ntxiv thaum koj qhia tias koj hlub lawv los ntawm koj txoj kev pab lawv zoo li Yexus Khetos. Koj yuav muaj kev xyiv fab heev thaum koj pab neeg ntiaj teb sib hlub ntxiv.
Tej Lus Nug thiab tej Lus Teb
Yog li cas kuv thiaj hnov tau Vajtswv txoj kev hlub? Leej Txiv Saum Ntuj Ceeb Tsheej txoj kev hlub los yeej tsis ploj mus. Nrog Nws tham ntau zaus thaum koj thov Vajtswv. Qhia Nws tias koj xav li cas, thiab tsom ntsoov rau tej kev tshoov siab los ntawm Nws. Cia li nyeem Nws tej lus hauv cov vaj lug kub. Xav txog tag nrho tej yam uas Nws tau ua rau koj. Siv sij hawm nyob hauv tej qhov chaw thiab ua tej yam uas Nws tus Ntsuj Plig nyob ntawd.
Tus Tswv puas xav tias kuv yuav tsum hlub txhua tus, tsis hais cov uas ua tsis zoo rau kuv? Tus Tswv xav kom koj hlub koj cov yeeb ncuab thiab thov Nws pab cov uas ua phem rau koj. Tiam sis, qhov no tsis hais tias koj yuav tsum tseem nyob raug xwm txheej uas ua rau koj raug mob ntawm sab siab ntsws, sab cev nqaij daim tawv, los sis sab ntsuj plig. Teeb tej ciaj ciam kom koj nyab xeeb. Yog tias leej twg tsim txom los sis ua lim hiam rau koj, los sis koj paub tias lwm tus raug tej yam no, nrog ib tug neeg laus uas koj ntseeg tau tham.
Thaum twg thiab yog li cas kuv thiaj yuav nrog cov hluas nkauj los hluas nraug tham? Txoj kev zoo tshaj plaws kom sib paub yog thaum koj nrog lwm tus ua phooj ywg tiag. Thaum koj tseem hluas, ua phooj ywg zoo rau neeg coob. Muaj tej kab lig kev cai uas cov tub hluas ntxhais hluas sib paub thaum lawv koom ua ke ua tej yam lom zem thiab zoo. Kom koj loj hlob tuaj zoo ntawm sab siab ntsws thiab sab ntsuj plig thiab muaj kev nyab xeeb, cia li tos ua ntej koj loj hlob me ntsis ua ntej yuav nyob ob leeg xwb—qhov uas yuav tsum muaj 16 xyoo ua ntej yog ib txoj kev cai zoo. Cia li nrog koj tsev neeg thiab cov thawj coj sib tham. Tos txog thaum koj laus me ntsis kom muaj hluas nkauj los hluas nraug. Siv sij hawm nrog cov uas pab koj ua raws li koj tau cog lus rau Yexus Khetos.
Kuv yuav ua li cas yog tias tsis muaj kev sib hlub hauv kuv lub tsev? Koj tus Cawm Seej paub koj raug xwm txheej dab tsi, thiab Nws hlub koj. Ua siab ntev, yeej meem ua raws li Vajtswv cov lus txib, thiab coj yam ntxwv zoo rau koj tsev neeg. Tej yam koj ua kom hlub lawv los kuj pab taus ntau thiab. Tej zaum koj yuav xav ua tej yam kom nrog koj pawg ntseeg sib raug zoo. Cia li npaj tam sim no kom muaj ib tsev neeg uas tsom ntsoov rau Yexus Khetos tej lus qhia. Cia li nco ntsoov tias: Yexus Khetos yog koj lub dag zog!
Saib Yaxayas 58:3–11 (tej lub ntsiab ntawm kev yoo mov); 58:13–14 (cov koob hmoov los ntawm kev hwm Hnub Caiv); Malakis 3:8–10 (cov koob hmoov los ntawm kev them ib feem kaum); Lukas 6:27–28 (hlub koj cov yeeb ncuab); 10:25–37 (leej twg yog kuv tus neeg zej zog?); Yauhas 3:16–17 (Vajtswv hlub peb, Nws thiaj li txib Nws Leej Tub); 14:15 (peb coj raws li cov lus txib vim peb hlub Vajtswv); 1 Yauhas 4:19 (peb hlub Vajtswv vim Nws hlub peb); Mauxiyas 2:17 (thaum peb ua hauj lwm pab lwm tus, peb ua hauj lwm rau Vajtswv).
Tej Lus Nug Kom Tau Daim Ntawv Tso Cai Nkag Tuam Tsev
-
Koj puas ua raws li Yexus Khetos lub Koom Txoos tej lus qhia thaum koj ua tej yam rau koj tsev neeg thiab lwm tus rau lawv saib xwb thiab tab meeg sawv daws?
-
Koj puas yog ib tug uas them nyiaj ib feem kaum tag nrho?