Cov kab ke thiab tej kev khi lus hauv lub tuam tsev qhib kev rau koj txais tau Vajtswv cov koob hmoov ntxiv

Ib txhia ntawm Leej Txiv Saum Ntuj Ceeb Tsheej cov koob hmoov yeej dawb ceev heev, Nws thiaj li txib peb kom ua tej qhov chaw tshwj xeeb thiab dawb huv kom peb txais tau cov koob hmoov ntawd: hu ua cov tuam tsev. Nyob hauv lub tuam tsev, tus Tswv lub tsev, koj txais tau cov kab ke siab tshaj plaws—vaj txiaj ntsim thiab kev sib khi—thiab txais tau Nws cov lus cog tseg tseem ceeb dua.

Tej Lus Tseeb uas Nyob Mus Ib Txhis

Vaj txiaj ntsim yog ib lub txiaj ntsim ntawm kev txawj ntse thiab lub hwj chim. Nyob hauv cov kab ke ntawm lub tuam tsev vaj txiaj ntsim, koj ris tus Cawm Seej lub npe ntxiv. Koj khi lus tias koj yuav mloog Vajtswv lus, ua kev txi kom ua raws li Nws lub siab nyiam, ua neej raws li Yexus Khetos txoj moo zoo, ua raws li txoj kev cai coj dawb huv, thiab muab koj lub neej thiab txhua yam uas Vajtswv tau muab rau koj fij rau Nws lub Koom txoos. Nov yog tej yam uas koj cog lus rau Nws. Vajtswv cog lus tias Nws yuav foom koob hmoov rau koj pub kev txawj ntse, kev pov hwm, thiab Nws lub hwj chim ntxiv. Nws kuj cog lus tias koj yuav nrog Nws nyob mus ib txhis li. Los ntawm vaj txiaj ntsim no, koj txais lub cib fim dawb ceev hnav cev tsoos tsho ntawm lub pov thawj hwj dawb huv. Cev tsoos tsho yog ib lub cim txog Yexus Khetos thiab ua rau koj nco txog koj tej kev khi lus hauv lub tuam tsev.

Kev cai sib khi hauv lub tuam tsev muab tej khub niam txiv thiab tsev neeg khi ua ke kom lawv nyob ua ke mus ib txhis li. Nyob hauv txoj kab ke ua kev cai sib khi hauv lub tuam tsev, koj thiab koj tus khub yuav khi lus rau Vajtswv thiab ib leeg khi lus rau ib leeg. Koj yuav cog lus tias koj yuav muab siab npuab rau Vajtswv tag nrho thiab ib leeg muab siab npuab rau ib leeg, kom sib hlub thiab sib pab, thiab ua hauj lwm ua ke kom ua raws li Vajtswv cov lus txib. Nov yog qhov uas koj cog lus. Vajtswv cog lus tias koj txoj kev koom nrog koj tus khub thiab koj cov me nyuam yuav kav mus ib txhis. Nws kuj cog lus tias koj txais tau lub yeeb koob siab tshaj plaws nrog Nws nyob hauv lub nceeg vaj xilethi-aus thaum koj ua raws li koj tej kev khi lus. Txoj koob hmoov no hu ua kev tsa nto.

Lus Caw

Cia li muaj ib daim ntawv tso cai nkag tuam tsev txhua lub sij hawm. Nrog ib tug hauv koj pawg npisov tham kom txais tau ib daim. Nws yuav nug koj seb koj puas ua neej raws li tus Tswv tej kev cai kom koj nkag tau mus rau hauv Nws lub tsev dawb huv. Nyeem tej lus nug no ntau zaus. (Koj nrhiav tau tej lus nug no nyob hauv cov ntawv ntxiv tom kawg ntawm phau no.) Txawm yog koj nyob deb ntawm ib lub tuam tsev, saib koj daim ntawv tso cai yog ib lub cim txog koj txoj kev hlub tus Tswv thiab koj txoj kev cog lus tias koj yuav ua raws li Nws tej kev cai.

Mus rau lub tuam tsev ntau npaum li koj mus taus. Yog muaj koj daim ntawv tso cai nkag tuam tsev, koj nkag tau hauv tus Tswv lub tsev thiab ua kev cai raus dej thiab ua kev cai pom zoo rau koj cov poj koob yawm txwv, lawv thiaj li txais tau cov koob hmoov uas koj txais lawm. Cia li mus txhua zaus koj mus taus rau lub tuam tsev. Nrhiav tus Tswv nyob hauv Nws lub tsev. Nrhiav Nws nyob hauv cov kab ke, tej lub cim, thiab tus Ntsuj Plig. Koj yeej yuav nrhiav tau Nws.

Cia li npaj khi lus hauv tus Tswv lub tsev. Ib txoj kev zoo ua li no yog ua raws li koj tej kev khi lus thaum koj ua kev cai raus dej. Cuab ib lub hom phiaj kom txais tau cov kab ke hauv lub tuam tsev thiab ua raws li koj tej kev khi lus tas koj lub neej. Pib tam sim no kom ua raws li tej kev cai uas koj yuav cog lus ua hauv lub tuam tsev: mloog Vajtswv cov lus txib, ua kev txi, ua raws li Yexus Khetos txoj moo zoo, coj dawb huv, thiab fij tseg. Koj tsev neeg, tus npisov, thiab lwm tus thawj coj ntawm lub Koom Txoos pab tau koj.

Cov Koob Hmoov uas Vajtswv Cog Lus Tseg

Koj hloov tau los ua neeg zoo li Yexus Khetos. Nws yuav pab koj hloov los ua ib tug uas coj ncaj ncees. Cov kab ke thiab tej kev khi lus ntawm lub tuam tsev yuav qhia koj kom paub mus hauv Vajtswv lub xub ntiag thiab txais txoj sia nyob mus ib txhis li nrog Nws.

Koj yuav muaj Vajtswv lub hwj chim. Tej kev khi lus ntawm lub tuam tsev kuj muaj kev cog lus tias lub hwj chim thiab lub yeeb koob ntawm Vajtswv los yuav muab rau koj. Nws cov tim tswv yuav saib xyuas koj.

Kev siv sij hawm hauv lub tuam tsev yuav ua rau koj muab siab npuab Yexus Khetos thiab mloog tus Vaj Ntsuj Plig Dawb Huv ntxiv. Koj yuav hnov Vajtswv txoj kev kaj siab lug thiab txoj kev so. Koj yuav hnov Nws lub suab meej ntxiv. Lub ntuj ceeb tsheej yuav qhib rau koj, thiab koj yuav to taub Nws tej kev zoo dua. Koj yuav muaj dag zog ntxiv kom kov yeej koj tej teeb meem vim koj muab siab npuab Nws.

Tej Lus Nug thiab tej Lus Teb

Kuv txais tau vaj txiaj ntsim thaum twg? Kev txiav txim txais koj vaj txiaj ntsim yeej nyob ntawm koj; cia li thov Vajtswv txog txoj kev txiav txim no. Nrog koj tsev neeg thiab cov thawj coj ntawm lub Koom Txoos sib tham. Kom txais koj vaj txiaj ntsim, koj yuav tsum muaj 18 xyoo thiab tsis kawm ntawv qib siab high school ntxiv li lawm. Koj yuav txais koj vaj txiaj ntsim ua ntej koj ua tub txib los sis ua kev cai sib khi, tiam sis koj tsis tas tos txog ob lub sij hawm no ua ntej koj txais koj vaj txiaj ntsim. Koj yuav tsum muaj siab xav ua thiab npaj khi lus thiab ua raws li tej kev khi lus nrog koj Leej Txiv Saum Ntuj Ceeb Tsheej. Koj tus npisov los sis ceg ntseeg tus thawj tswj hwm pab tau koj paub seb koj puas npaj siab lawm. Tsis txhob saib vaj txiaj ntsim yog ib yam uas yuav tsum ua kom tau txoj sia nyob mus ib txhis xwb. Cia li saib vaj txiaj ntsim yog ib yam zoo nkauj uas muaj yeeb koob ntawm koj txoj kev los cuag Khetos thiab txais tau Vajtswv cov koob hmoov ntawm sab ntsuj plig zoo tshaj plaws.

Vim li cas kuv yuav tsum muaj ib daim ntawv tso cai nkag tuam tsev? Lub tuam tsev yog tus Tswv lub tsev, thiab nws tsa tej kev cai rau peb nkag tau haud. Cov kab ke thiab tej kev khi lus ntawm lub tuam tsev yeej dawb ceev heev thiaj li yuav tsum ua tej yam tshwj xeeb kom npaj yus sab ntsuj plig. Muaj txoj kev xam phaj nug tej lus kom tau ib daim ntawv tso cai nkag tuam tsev thiaj li yuav paub meej tias koj sab ntsuj plig tau npaj lawm kom txais tau cov koob hmoov siab dua los ntawm koj tej kev khi lus hauv lub tuam tsev. Leej Txiv Saum Ntuj Ceeb Tsheej caw tag nrho Nws cov me nyuam npaj siab cog lus rau Nws nyob hauv Nws lub tsev dawb huv.

Puas yog kuv yuav tsum hloov los ua neeg zoo tag nrho lawm kom khi lus hauv lub tuam tsev? Tsis muaj leej twg zoo tag nrho. Vajtswv hais kom koj ua siab ncaj thiab muaj lub siab uas xav ua raws li Nws cov lus txib. Kev khi lus thiab kev ua raws li koj tej kev khi lus nrog Vajtswv yog qhov uas ua rau koj muaj hwj chim hloov los ua neeg zoo tag nrho dhau los ntawm Yexus Khetos. Nws yog koj lub dag zog!

Saib Yaxayas 2:2–3 (Vajtswv qhia peb txog Nws tej kev nyob hauv lub tuam tsev); Mathais 11:28–30 (kwv tus Cawm Seej tus quab); 1 Nifais 14:14 (Vajtswv lub hwj chim nyob ntawm Nws cov neeg khi lus); Lus Qhuab Qhia thiab Kev Khi Lus 97:15–16 (Vajtswv thiab nws lub yeeb koob nyob hauv Nws lub tsev); 109:22 (nyob hauv lub tuam tsev peb txais tau Vajtswv lub hwj chim); 131:1–4; 132:4–6, 15–20 (kom txais tau txoj sia nyob mus ib txhis, ib tug txiv neej thiab ib tug poj niam yuav tsum sib khi ua ke mus ib txhis li dhau los ntawm txoj kev khi lus tshiab thiab kav ib txhis ntawm kev sib yuav); Anplaham 1:2 (Anplaham xav coj raws li kev ncaj ncees thiab txais kev txawj ntse ntxiv).

Tej Lus Nug Kom Tau Daim Ntawv Tso Cai Nkag Tuam Tsev

Koj puas xav hais tias koj tsim nyog nkag mus hauv tus Tswv lub tsev thiab koom ua lub tuam tsev tej kab ke?