Koj pab tau ua Vajtswv txoj hauj lwm

Leej Txiv Saum Ntuj Ceeb Tsheej hlub tag nrho Nws cov me nyuam. Nws xav pab lawv nrhiav kev zoo siab thiab kev xyiv fab, rov qab mus cuag Nws, thiab tau txoj sia nyob mus ib txhis. Nov yog Nws txoj hauj lwm cawm seej thiab kev tsa nto, thiab Nws caw nej los pab!

Tej Lus Tseeb uas Nyob Mus Ib Txhis

Vajtswv txoj hauj lwm thiab lub yeeb koob yog ua kom tib neeg tsis txawj tuag thiab tau txoj sia nyob mus ib txhis. Kev tsis txawj tuag yog kev nyob tas mus li thaum muaj ib lub cev uas tau sawv rov los. Txoj sia nyob mus ib txhis, los sis kev tsa nto, yog kev hloov los ua neeg zoo li Vajtswv ntxiv thaum yus ua ib tsev neeg nrog Nws nyob mus ib txhis li. Peb ua tau tag nrho tej yam no vim muaj Yexus Khetos thiab Nws txoj Kev Theej Txhoj. Tsim nyog uas koj tso siab rau Nws.

Koj pab tau ua Vajtswv txoj hauj lwm thaum koj los cuag Khetos thiab pab lwm tus ua ib yam li ntawd. Txhua lub sij hawm koj ua ib yam dab tsi pab lwm tus coj raws li Yexus Khetos, koj pab ua Vajtswv txoj hauj lwm.

Lus Caw

Ua neej raws li txoj moo zoo. Txhawb koj txoj kev ntseeg Yexus Khetos kom muaj zog. Hloov siab lees txim txhua hnub. Txais Vajtswv cov kab ke pov thawj hwj thiab ua raws li koj tej kev khi lus. Ua li ntawd tas koj lub neej.

Saib xyuas cov neeg uas xav tau kev pab. Nrhiav kev pab thiab txhawb nqa lwm tus, tsis hais koj tsev neeg, koj cov phooj ywg, thiab koj zej zog los yog. Ib txoj kev zoo kawg kom pab tib neeg uas txom nyem yog kev ua raws li kev cai yoo mov thiab muab nyiaj yoo mov.

Caw txhua tus los txais txoj moo zoo. Cia koj tej lus thiab tej yam koj ua qhia txog kev ntseeg Yexus Khetos. Cia li npaj siab qhia leej twg uas nug koj txog koj txoj kev cia siab thiab kev zoo siab vim koj yog Nws tus thwj tim. Rau cov tub hluas, kev mus ua tub txib yog ib txoj kev lav ris pov thawj hwj. Rau cov ntxhais hluas, yeej yog ib lub cib fim zoo kawg; thov Vajtswv kom paub seb tus Tswv puas xav kom koj mus ua li ntawd. Cia li npaj qhia txoj moo zoo tas koj lub neej.

Muab tsev neeg koom ua ke mus ib txhis li thaum koj nrhiav tsev neeg zaj keeb kwm thiab ua hauj lwm hauv lub tuam tsev. Cia li kawm txog koj cov poj koob yawm txwv. Kawm seb leej twg xav tau cov kab ke hauv lub tuam tsev. Cia li mus rau lub tuam tsev ntau npaum li koj mus tau kom sawv lawv cev ua kev cai raus dej thiab kev cai pom zoo. Yog koj xav tau kev pab, cia li mus saib FamilySearch.org.

Cov Koob Hmoov uas Vajtswv Cog Lus Tseg

Koj yuav muaj Vajtswv txoj kev pab. Leej Txiv Saum Ntuj Ceeb Tsheej tsis xav tias koj yuav ua txoj hauj lwm no koj tus kheej xwb. Nws nrog koj nyob. Thaum koj txo hwj chim muab sij hawm thiab muab koj lub siab rau Nws, Nws yuav siv koj los ua tej yam zoo kawg nkaus. Yexus Khetos yog koj lub dag zog!

Koj yuav muaj kev xyiv fab puv npo. Vajtswv txoj hauj lwm yog ib txoj hauj lwm zoo siab! Thaum koj koom tes ua txoj hauj lwm no, koj yuav muaj kev xyiv fab uas Nws muaj. Cia li xav seb koj yuav zoo siab npaum li cas nrog Leej Txiv Saum Ntuj Ceeb Tsheej thiab Nws cov me nyuam uas koj pab coj mus rau Nws!

Tej Lus Nug thiab tej Lus Teb

Vajtswv puas yuav siv kuv ua Nws txoj hauj lwm tiag? Yog mas! Muaj ntau txoj kev kom pab ua txoj hauj lwm no. Tej zaum ua rau koj xav tias lwm tus neeg muaj txuj ci los sis muaj peev xwm tshaj koj, tiam sis koj Leej Txiv Saum Ntuj Ceeb Tsheej txawj pom tej yam koj yuav muaj peev xwm ua thaum yav tom ntej. Nws tau muab tej txiaj ntsim rau koj uas koj siv tau kom pab thiab muab Nws cov me nyuam sau los ua ke. Yeej tsis ua li cas yog tias tej txiaj ntsim no txawv ntawm tej txiaj ntsim uas lwm tus tib neeg muaj. Muaj tseeb tiag, yog vim li ntawd koj tej txiaj ntsim thiaj muaj nqis heev. Xav tau koj pab tiag!

Saib Mathais 10:39 (yog koj tsis khuv xim koj txoj sia ua tus Cawm Seej tej hauj lwm, ces koj yuav tau txoj sia); 1 Kauleethaus 12:14–27 (yuav tsum muaj txhua tus koom ua ke hauv Khetos lub cev); Filipis 1:6 (cia siab tias Vajtswv ua hauj lwm zoo rau hauv koj lub siab); Yakhauj 5:72 (tus Tswv ntawm lub vaj txiv ntoo roj nrog koj ua hauj lwm); Lus Qhuab Qhia thiab Kev Khi Lus 18:15–16 (koj txoj kev xyiv fab yuav loj heev nrog cov uas koj coj mus rau Yexus Khetos); 64:33–34 (ib txoj hauj lwm tseem ceeb los ntawm tej yam me thiab yooj yim); Mauxes 1:6 (“Kuv muaj ib txoj hauj lwm rau koj ua”); 6:31–34 (Vajtswv txhawb nqa cov uas Nws hu, txawm yog lawv xav tias lawv tsis tsim nyog).

Tej Lus Nug Kom Tau Daim Ntawv Tso Cai Nkag Tuam Tsev

Koj puas muaj ib zaj lus tim khawv tias tau muab Yexus Khetos txoj moo zoo Txum Tim Rov Qab Los?