4.
Yexus Khetos yuav pab koj
Phau Ntawv Nkauj 147:3
Yexus Khetos yog koj lub dag zog. Nws tau ua txhua yam uas yuav tsum ua kom koj muaj kev xyiv fab hauv lub neej no thiab nyob tas mus li. Thaum koj xaiv Nws thiab Nws txoj moo zoo, koj xaiv kev zoo siab thiab kev xyiv fab mus ib txhis li.
Txawm yog koj sim xaiv tej yam zoo los, tej lub sij hawm koj yuav ua yuam kev. Koj yuav ua tej yam uas kheev lam koj tsis tau ua. Txhua tus ua li ntawd. Thaum koj ua li no, yooj yim rau koj poob siab los sis txhawj hais tias koj yeej yuav zoo tsis txaus. Tiam sis yeej muaj txoj moo zoo—txoj moo uas muaj kev cia siab! Vim Vajtswv hlub koj, Nws txib Nws Leej Tub, Yexus Khetos, uas ris koj tej kev txhaum kom koj thiaj li hloov siab lees txim, txais kev zam txim, thiab ua zoo zuj zus mus ntxiv.
Tej Lus Tseeb uas Nyob Mus Ib Txhis
Yexus Khetos yuav txhawb koj lub dag zog. Nws yuav pab koj hloov koj tej kev ntshaw, koj tej kev xav, thiab tej yam koj ua. Thaum koj txhawj xeeb, ntshai, los sis nyuaj siab, Nws yuav nplij koj lub siab. Nws yuav pab koj ua txhua yam hauv koj lub neej. Tsim nyog uas koj tso siab rau Nws.
Kev hloov siab lees txim tsis yog kev rau txim vim koj ua txhaum; yeej yog txoj kev uas tus Cawm Seej tso peb dim kev txhaum. Kev hloov siab lees txim txhais tias yus hloov—tig ntawm kev txhaum mus thiab tig mus rau Vajtswv. Yog kev ua zoo dua ntxiv thiab kev txais kev zam txim. Txoj kev hloov no tsis yog ib yam uas yus ua ib zaug xwb; yeej yog ib tug txheej txheem uas yus ua tas li.
Lus Caw
Tsom ntsoov rau Yexus Khetos tas koj lub neej. Nrhiav Nws txoj kev pab thaum koj ua txhua yam.
Cia li hloov siab lees txim. Tig mus rau tus Tswv nrog koj txoj kev xav ua zoo dua. Thaum koj ua txhaum, cia li ua siab ncaj hais rau Vajtswv, thiab thaum twg yuav tsum ua li no, qhia koj tus npisov thiab thov txim ntawm tus uas koj ua tsis zoo rau. Ua zoo npaum li koj ua tau kho kom zoo.
Zoo siab vim tau txais lub txiaj ntsim koj thiaj li ua tau zoo dua thiab ua tau neeg zoo dua. Txawm yog tsis yooj yim los thiab yuav tsum siv sij hawm ntev dua li koj xav, tsis txhob tso tseg. Yeej meem ua hauj lwm thiab tso siab rau tus Tswv. Nws yuav pab koj txhua lub sij hawm.
Cov Koob Hmoov uas Vajtswv Cog Lus Tseg
Leej Txiv Saum Ntuj Ceeb Tsheej yuav zam txim rau koj thiab kho koj zoo thaum koj hloov siab lees txim. Nws yuav muab koj lub txim pauv kom muaj kev kaj siab lug thiab kev xyiv fab. Nws yuav tsis nco qab txog koj tej kev txhaum ntxiv. Yexus Khetos yog koj lub zog, thiab nrog Nws lub zog, koj txoj kev xav coj raws li Nws cov lus txib yuav loj tuaj.
Nws yuav hloov koj lub siab thiab koj lub neej. Ib qho ntxiv rau ib qho, koj yuav loj tuaj thiab hloov los ua neeg zoo li Nws.
Tej Lus Nug thiab tej Lus Teb
Yog li cas kuv thiaj paub tias Vajtswv tau zam txim pub rau kuv? Vajtswv cog lus tias Nws yuav zam txim rau cov uas hloov siab lees txim. Thaum koj hnov tus Ntsuj Plig nplij koj lub siab, koj yuav paub tias lub hwj chim ntawm Yexus Khetos txoj kev theej txhoj ua hauj lwm hauv koj lub neej.
Thaum twg kuv yuav tsum txais tau tus npisov txoj kev pab kom hloov siab lees txim? Koj tus npisov tuav cov yawm sij pov thawj hwj thiab muaj tej txiaj ntsim ntawm sab ntsuj plig kom pab koj hloov siab lees txim. Koj thov tau kom txais nws txoj kev pab thiab tej lus ntuas thaum twg los tau. Yog tias koj tau ua yuam kev loj heev, xws li koj ua txhaum txoj kev cai coj dawb huv, cia li nrog koj tus npisov tham. Nws yuav tsis rau txim rau koj. Nws sawv Yexus Khetos cev thiab yuav pab koj paub hloov siab lees txim tag nrho thiab txais tus Cawm Seej lub hwj chim kho mob thiab lub hwj chim uas txhawb koj lub dag zog.
Kuv sim hloov siab lees txim, tiam sis kuv tseem ua yuam kev ib yam li qub. Kuv yuav tsum ua li cas? Tsis txhob tso tseg. Cia li tig mus rau Yexus Khetos, thiab muab siab rau ntseeg Nws. Nws txoj kev tshav ntuj yeej txaus. Sim rov qab ua dua. Koj yeej tsis nyob koj ib leeg thaum koj sim ua zoo zuj zus. Yexus Khetos yeej nrog nraim koj nyob.
Saib Enos 1:6 (kuv txoj kev muaj txim yuav ploj huv tib si); Mauxiyas 4:3 (dhau los ntawm tus Vaj Ntsuj Plig Dawb Huv, Vajtswv cia koj paub tias koj tau txais kev zam txim); 26:30 (tus Cawm Seej zam txim thaum peb hloov siab lees txim); Ethaws 12:27 (tus Cawm Seej txoj kev tshav ntuj yuav ua kom tej uas qaug zog los ua tej uas muaj zog); Maulaunais 6:8 (tus Tswv zam txim rau cov uas hloov siab lees txim); 10:32 (los ua neeg zoo tag nrho vim yog los ntawm Yexus Khetos); Lus Qhuab Qhia thiab Kev Khi Lus 1:32 (tus Tswv zam txim rau cov uas hloov siab lees txim); 58:42–43 (kev hloov siab lees txim lees kev txhaum thiab tso kev txhaum tseg).
Tej Lus Nug Kom Tau Daim Ntawv Tso Cai Nkag Tuam Tsev
-
Koj puas muaj ib zaj lus tim khawv txog Yexus Khetos txoj Kev Theej Txhoj thiab txog Nws lub luag hauj lwm ua tus Cawm Seej thiab tus Txhiv Dim?
-
Puas muaj tej kev txhaum loj hauv koj lub neej uas tsim nyog koj daws kho nrog cov thawj coj ntawm lub pov thawj hwj kom pab koj hloov siab lees txim?