Xaiv raws li kev tshoov siab

Nyob hauv phau Ntxiv Dag Zog rau cov Tub Hluas Ntxhais Hluas, koj yuav kawm Yexus Khetos thiab Nws cov yaj saub tej lus qhia. Thaum koj cia tej lus tseeb no coj koj lub neej, koj yuav xaiv raws li kev tshoov siab thiaj li yuav tau koob hmoov tam sim no thiab nyob mus ib txhis li.

Koj yog Vajtswv ib tug me nyuam ntsuj plig uas Nws hlub. Nws txoj hau kev zoo siab ua rau koj sab ntsuj plig muaj cib fim ua zoo zuj zus thiab hloov los ua neeg zoo li Vajtswv. Nws tau txib Yexus Khetos los ua koj tus Cawm Seej.

Koj Leej Txiv Saum Ntuj Ceeb Tsheej tso siab rau koj. Nws tau muab cov koob hmoov zoo kawg rau koj, tsis hais txoj moo zoo thiab cov kab ke thiab tej kev khi lus uas khi koj rau Nws thiab ua rau koj muaj Nws lub hwj chim hauv koj lub neej. Cov koob hmoov no muaj kev xyiv fab thiab tej kev lav ris ntxiv. Nws paub tias koj muaj peev xwm pab neeg ntiaj teb, koj thiaj li yuav tsum ua tej yam uas neeg ntiaj teb tsis ua. Cia li nrhiav koj Leej Txiv Saum Ntuj Ceeb Tsheej tej lus qhia thaum koj xaiv ua tej yam. Nws yuav foom koob hmoov rau koj dhau los ntawm tus Vaj Ntsuj Plig Dawb Huv tej kev tshoov siab.

Yexus Khetos yog txoj kev kom txais tau kev xyiv fab uas kav ib txhis. Thaum koj siv koj txoj kev ywj siab xaiv coj raws li Yexus Khetos, koj taug txoj kev uas yuav ua rau koj txais tau txoj kev zoo siab mus ib txhis li. Coj raws li Yexus Khetos tus yam ntxwv, cia Nws ua koj lub hauv paus ruaj nrees. Cia li ua neej raws li Nws tej lus qhia, thiab ntsuam xyuas tej yam koj xaiv seb puas haum tej lus qhia ntawd. Tej kev khi lus uas koj khi thaum koj ua kev cai raus dej, txais lub cim nco txog, thiab nyob hauv lub tuam tsev yog tej yam uas pab koj teeb tau ib lub hauv paus nyob rau saum Yexus Khetos. Koj tseem yuav raug teeb meem thiab tej kev ntxias, tiam sis Leej Txiv Saum Ntuj Ceeb Tsheej thiab tus Cawm Seej yuav pab koj dhau tag nrho tej ntawd.

Lub hom phiaj ntawm phau Ntxiv Dag Zog rau cov Tub Hluas Ntxhais Hluas tsis yog kom hais tias “ua” los sis “tsis txhob ua” txog txhua yam uas koj xaiv tau. Tiam sis, tus Tswv caw koj ua neej raws li ib txoj kev siab dua thiab dawb huv ntxiv—ib lub neej uas tsom ntsoov rau tej lus tseeb mus ib txhis li thiab tus Tswv cov koob hmoov uas Nws cog lus rau koj. Nov yog Nws txoj kev. Phau no yuav qhia koj txog Nws txoj kev. Phau no yuav piav txog tej lus tseeb uas Nws muab tshwm sim lawm. Cia tej lus tseeb coj koj txoj hau kev thaum koj xaiv ua tej yam—xaiv tej yam tseem ceeb, xws li thaum yuav khi lus hauv lub tuam tsev thiab ua tub txib, thiab thaum xaiv tej yam txhua hnub, xws li yuav ua li cas rau tib neeg los sis yuav siv sij hawm li cas.

Txawm yog lwm tus pab koj los, koj sab ntsuj plig txoj kev loj hlob tuaj yeej nyob ntawm koj. Nov yog koj txoj kev lav ris. Cia li ua zoo npaum li koj ua tau kom ua zoo dua txhua hnub, ua raws li Vajtswv cov lus txib thiab koj tej kev khi lus, thiab pab lwm tus nyob ze tus Cawm Seej ntxiv.

Saib Mauxiyas 4:29–30 (muaj ntau txoj kev txhaum suav tsis txheeb, yog li ntawd peb yuav tsum saib xyuas peb tus kheej); Hilamas 5:12 (ua koj lub hauv paus nyob rau saum Yexus Khetos); Lus Qhuab Qhia thiab Kev Khi Lus 45:57 (cia tus Ntsuj Plig Dawb Huv coj koj mus); 25:13 (muab siab npuab koj tej kev khi lus).