Vajtswv npaj ib txoj hau kev rau koj

Leej Txiv Saum Ntuj Ceeb Tsheej yog tus uas npaj txoj hauj kev no. Nws yog Leej Txiv ntawm koj tus ntsuj plig, thiab Nws hlub koj. Nws yuav muab Nws txoj koob hmoov zoo tshaj plaws rau koj—uas yog txoj sia nyob mus ib txhis. Los yog hais tias, Nws xav kom koj hloov los ua neeg zoo li Nws ntxiv thiab ua neej ib yam li Nws lub neej uas zoo siab thiab muaj yeeb koob. Nws muaj hwj chim tag nrho thiab paub txhua yam. Koj tso siab rau Nws los tau, tsis hais thaum koj lub neej nyuaj los yog.

Yexus Khetos muaj peev xwm qhib kev rau txoj hau kev no. Ua ntej ntuj tsim teb raug, Leej Txiv Saum Ntuj Ceeb Tsheej xaiv Nws los ua koj tus Cawm Seej. Yexus Khetos yog tib tug uas coj tau koj rov qab mus cuag koj Leej Txiv Saum Ntuj Ceeb Tsheej. Nov yog vim li cas peb xaiv coj raws li Nws. Txhua yam nyob ntawm txoj kev xaiv ntawd!

Kev sib yuav thiab tsev neeg yeej tseem ceeb rau Vajtswv txoj hau kev. Koj yog ib tug nyob hauv Vajtswv tsev neeg, thiab tag nrho Nws cov me nyuam ntsuj plig muaj niam muaj txiv thiaj li los rau hauv lub ntiaj teb. Vajtswv xav kom Nws cov ntxhais thiab cov tub koom ua ke ua zoo zuj zus mus txog thaum lawv zoo tag nrho mus ib txhis li. Txiv neej thiab poj niam, ob leeg ua hauj lwm sib luag zos kom tau kev sib yuav uas muaj kev hlub thiab koom siab ua ke. Kev ua neej nrog ib tsev neeg hauv lub ntiaj teb no—tsis hais thaum muaj teeb meem los yog—yeej ua rau tib neeg muaj kev xyiv fab. Yuav pab koj npaj nrog Vajtswv nyob mus ib txhis li.

Cia li xam pom mus ib txhis li. Thaum twg koj raug tej kev ntxias, tej kev sim siab, kev poob siab, los sis tej yam uas nyuaj xaiv, cia li nco ntsoov txog Vajtswv txoj hau kev. Saib hais tias tej lus tseeb mus ib txhis uas koj paub txog Nws txoj hau kev yuav pab koj saib koj tej teeb meem txawv.

Nrhiav seb Vajtswv tau pab koj li cas hauv koj lub neej. Cia li saib thaum twg Vajtswv foom kob hmoov rau koj. Tej zaum yog ib tug txoj kev ua siab zoo rau koj, ib lub sij hawm thaum koj nyob kaj siab lug, los sis thaum Vajtswv teb koj tej lus thov.

Cia li xaiv kom coj raws li Vajtswv txoj hau kev. Cia li kawm seb koj Leej Txiv Saum Ntuj Ceeb Tsheej xav kom koj ua dab tsi. Cia li nrhiav Nws tej lus qhia thaum koj kawm cov vaj lug kub, cov yaj saub tej lus, zaj lus tshaj tawm txog tsev neeg, thiab koj yawg suab txoj koob hmoov. Ua li no yuav pab koj npaj ua hauj lwm rau tus Tswv, thaum ua tub txib thiab mus tas koj lub neej. Cia li saib kev ua hauj lwm rau tus Tswv, txoj kev sib yuav mus ib txhis, thiab kev tu me nyuam yog tej yam tseem ceeb. Ua tej yam koj ua taus kom muaj ib tsev neeg zoo siab tam sim no thaum koj coj raws li Yexus Khetos tej lus qhia.

Thaum koj raug tej kev sim siab hauv lub neej no los koj muaj peev xwm ua siab loj thiab cia siab rau Yexus Khetos. Vim koj paub txog Vajtswv txoj hau kev mus ib txhis li, koj muaj ib yam muaj nqis heev uas pab tau koj thaum koj raug tej yam nyuaj. Koj paub tias lub neej no tsis yog ib lub sij hawm tom qab yug los thiab ua ntej tuag xwb. Koj paub tias koj yog leej twg tiag, koj lub hom phiaj yog dab tsi, thiab koj hloov tau los ua neeg zoo li cas thaum tus Cawm Seej pab koj. Yexus Khetos yog koj lub dag zog!

Koj txais tau txoj sia nyob mus ib txhis thaum koj coj raws li Yexus Khetos. Nws yuav muab hwj chim rau koj kom koj hloov los ua neeg zoo li Nws, rov qab mus cuag koj leej niam leej txiv saum ntuj ceeb tsheej, thiab muaj kev xyiv fab nrog cov uas koj hlub nyob. Tso siab rau Yexus Khetos.