Mloog Ntsoov Txoj Lus, los ntawm Liz Lemon Swindle. Havenlight tau pub siv
11.
Qhov tseeb yuav tso nej dim
Yauhas 8:32
Koj Leej Txiv Saum Ntuj Ceeb Tsheej yog ib tug Vajtswv ntawm qhov tseeb. Nws paub txhua yam. Txhua yam tseeb los ntawm Nws thiab yuav coj koj mus rau Nws. Koj qhia tias koj saib qhov tseeb muaj nqis thaum koj nrhiav kev kawm, ua neej raws li kev ncaj ncees, thiab ua siab loj ua raws li qhov yog—txawm yog koj ua koj ib leeg xwb.
Tej Lus Tseeb uas Nyob Mus Ib Txhis
Leej Txiv Saum Ntuj Ceeb Tsheej xav kom Nws cov ntxhais thiab cov tub kawm txhua lub sij hawm. Muaj tej yam ntawm sab cev nqaij daim tawv thiab sab ntsuj plig uas qhia vim li cas koj yuav tsum nrhiav kev kawm ntawv thiab nyiam kawm ntawv. Kev kawm ntawv tsis yog kom koj khaws tau nyiaj xwb. Kev kawm ntawv yog ib feem ntawm koj lub hom phiaj hloov los ua neeg zoo li Leej Txiv Saum Ntuj Ceeb Tsheej.
Kev ua neej raws li kev ncaj ncees txhais tias koj nyiam ua tej yam uas Vajtswv pom zoo—ntau tshaj koj nyiam ua tej yam kom koj txaus siab, kom koj muaj npe, los sis kom yooj yim rau koj. Koj ua qhov yog vim tias yeej yog qhov yog xwb.
Koj muaj ib yam uas muaj nqis heev qhia rau lwm tus. Yexus Khetos txoj moo zoo muaj tej lus teb tej lus nug txog lub neej no. Yog txoj kev kaj siab lug thiab kev zoo siab. Tej zaum koj tsis paub txhua yam, tiam sis koj paub txaus kom hlub koj tus kwv tij zej zog, qhia tej lub ntsiab cai rau lawv, thiab caw lawv kawm ntxiv.
Lus Caw
Kawm txhua zaus. Cia li nrhiav cib fim kom muaj kev txawj ntse thiab tej txuj ci ntxiv. Tej lub cib fim no los tej zaum yuav nyob hauv ib lub tsev kawm ntawv los sis kev kawm ua hauj lwm, tiam sis kuj los ntawm kev kawm koj tus kheej ntawm cov ntawv uas koj ntseeg. Cia li thov tus Tswv pab, thiab Nws yuav coj koj mus.
Cia li kawm tej yam tseeb ntawm sab ntsuj plig. Thaum koj kawm txog lub ntiaj teb ib puag ncig koj, kawm txog tus Cawm Seej thiab, tus uas tau tsim lub ntiaj teb. Kawm txog Nws lub neej thiab tej lus qhia. Kawm hauv seminary, institute, thiab kawm txog txoj moo zoo koj tus kheej tas koj lub neej. Tej no pab tau koj npaj mus ua tub txib thiab qhia txog txoj moo zoo tas koj lub neej.
Ua neej raws li kev ncaj ncees. Tsis txhob nyiag khoom, dag, khib lav, los sis ntxias lwm tus hlo li—nyob hauv tsev kawm ntawv, tom hauj lwm, nyob saum huab cua, txhua qhov chaw. Coj raws nraim li Yexus Khetos tab meeg sawv daws thiab thaum tsis muaj leej twg pom.
Cov Koob Hmoov uas Vajtswv Cog Lus Tseg
Kev kawm ntawv ua rau koj haj yam txawj ua hauj lwm rau tus Tswv, tsis hais thaum ua tub txib. Kev kawm ntawv yuav pab koj muaj hwj chim foom koob hmoov rau lwm tus, qhov tseem ceeb yog koj tsev neeg. Koj yim kawm ntxiv, koj yim pab tau txhim tsa Vajtswv lub nceeg vaj thiab pab neeg ntiaj teb ua zoo.
Kev ua siab ncaj ua rau koj nyob kaj siab lug thiab saib taus koj tus kheej. Thaum koj tej lus thiab tej yam koj ua yog raws li qhov tseeb, koj qhia tias lwm tus neeg thiab tus Tswv tso siab tau rau koj.
Thaum koj hais lus pom zoo rau Yexus Khetos tej lus qhia, Nws kuj yuav pom zoo rau koj. Yexus Khetos yog koj lub dag zog! Tej zaum lwm tus yuav tsis pom zoo rau tej yam uas koj ntseeg, tiam sis lawv yuav pom koj txoj kev ua siab loj thiab kev ua siab tiag. Txawm yog lwm tus coj raws li koj tus yam ntxwv, koj zaj lus tim khawv, koj txoj kev ua siab loj, thiab koj txoj kev ntseeg los tsis coj mas, koj txoj kev ntseeg Yexus Khetos yuav loj tuaj.
Tej Lus Nug thiab tej Lus Teb
Puas yog kev txhaum yog kuv muaj lus nug txog lub Koom Txoos? Yog li cas kuv thiaj yuav nrhiav tau tej lus teb? Qhov uas koj muaj lus nug yeej tsis yog ib lub cim uas qhia tias koj tsis tshua ntseeg. Muaj tseeb tiag, tej lus nug pab tau kom txhawb nqa koj txoj kev ntseeg. Twb pib muab txoj moo zoo txum tim rov qab los thaum Joseph Smith uas muaj 14 xyoos nug txog txoj kev ntseeg. Cia li nrhiav tej lus teb hauv cov vaj lug kub, hauv Vajtswv cov yaj saub tej lus, nug koj cov thawj coj thiab tsev neeg uas rau siab ntseeg, thiab thov Vajtswv. Yog tias tsis txais lus teb tam sim ntawd, cia li tso siab tias koj yuav kawm ib nqe lus ntxiv rau ib nqe lus. Yeej meem ua neej raws li tej yam uas koj paub lawm, thiab nrhiav qhov tseeb mus ntxiv.
Kuv yuav li cas kom qhia tias kuv pom zoo qhov yog thiab tsis txhob ua rau cov uas ntseeg txawv kuv tu siab? Thaum xub thawj ua tib zoo hais tej lus thiab ua tej yam los ntawm koj txoj kev hlub Vajtswv thiab hlub Nws cov me nyuam. Tsis tsim nyog qhia txoj moo zoo raws li kev muaj siab xav sib cav sib ceg tiam sis yuav tsum qhia meej, muaj siab mos siab muag, thiab ua siab zoo. Koj hlub tau lwm tus txawm yog koj tsis pom zoo rau tej yam uas lawv ntseeg. Cia li coj yam ntxwv zoo ib yam li ib tug uas coj raws li Yexus Khetos los ntawm koj txoj kev ua neej.
Saib Mathais 5:14–16 (ci rau sawv daws pom tej hauj lwm zoo uas koj ua); Yauhas 14:6 (Yexus yog qhov tseeb); 1 Petus 3:15 (npaj qhia lwm tus txog koj txoj kev cia siab rau Yexus Khetos); Lus Qhuab Qhia thiab Kev Khi Lus 88:77–80 (tej yam uas tus Tswv xav kom peb kawm); 88:118 (nrhiav tej lus tswv yim hauv tej phau ntawv zoo tshaj plaws); 93:36 (Vajtswv lub yeeb koob yog kev txawj ntse); 124:15 (kev coj zoo txhais tias peb nyiam yam uas yog qhov yog); 130:18 (kev txawj ntse hauv lub neej no yuav sawv los nrog peb nyob hauv lub caij sawv rov los).
Tej Lus Nug Kom Tau Daim Ntawv Tso Cai Nkag Tuam Tsev
-
Koj puas rau siab ua siab ncaj thaum koj ua txhua yam?
-
Koj puas txhawb nqa los sis tshaj tawm tej lus qhia, tej kev, los sis tej lus qhuab qhia uas fab ntxeev tej lus qhia los ntawm Yexus Khetos lub Koom Txoos ntawm Tsoom Haiv Neeg Ntseeg hauv Hnub Nyoog Kawg?