Vajtswv xav nrog koj sib txuas lus

Tus Ntsuj Plig coj koj mus rau Leej Txiv Saum Ntuj Ceeb Tsheej thiab Yexus Khetos. Nov yog ib lub luag hauj lwm tseem ceeb ntawm tus Vaj Ntsuj Plig Dawb Huv. Nws kuj yuav tshoov koj lub siab kom hloov siab lees txim thiab coj raws li Yexus Khetos kom koj thiaj li txais tau cov koob hmoov los ntawm Nws txoj Kev Theej Txhoj. Thaum koj hloov siab lees txim, tus Ntsuj Plig hloov koj los ua neeg dawb huv thiab pab koj hloov siab.

Tus Vaj Ntsuj Plig Dawb Huv hais lus rau koj lub hlwb thiab koj lub siab. Muaj ntau txoj kev uas tej lus los ntawm tus Ntsuj Plig yuav los rau hauv koj lub hlwb—los ntawm kev tshoov siab, tej lus ceeb toom, kev to taub meej, thiab tej kev nco txog sab ntsuj plig. Tus Vaj Ntsuj Plig Dawb Huv hais tau rau koj lub siab los ntawm tej kev xav uas txhawb nqa koj xws li kev nplij siab, kev ntseeg tus kheej, kev kaj siab lug, kev hlub, kev xyiv fab, kev txo hwj chim, kev ris txiaj, thiab kev ua siab ntev.

“Cia li txais tus Vaj Ntsuj Plig Dawb Huv.” Twb hais tej lus no thaum muab koj pom zoo ua ib tug mej zeej hauv Khetos lub Koom Txoos. Yog li cas koj thiaj txais tau tus Vaj Ntsuj Plig Dawb Huv? Thaum koj ua raws li Yexus Khetos tej lus qhia. Nws yog koj lub dag zog. Kev coj raws li Nws caw tus Vaj Ntsuj Plig Dawb Huv nyob hauv koj lub neej.

Thov koj Leej Txiv Saum Ntuj Ceeb Tsheej. Thov Nws kawg siab kawg ntsws. Ua Nws tsaug rau tej koob hmoov zoo kawg uas Nws muab rau koj. Qhia Nws txog koj tej kev xyiv fab, tej kev txhawj xeeb, thiab tej lus nug. Cia li nyob tus thiab mloog Nws tej lus teb, uas tej zaum yuav los thaum koj nyob kaj siab lug, xav hauv koj lub siab, los sis txais kev tshoov siab ua tej yam.

Mloog Vajtswv lub suab nyob hauv cov vaj lug kub. Cov vaj lug kub yog Vajtswv txoj lus rau koj! Cia li kawm los ntawm cov vaj lug kub txhua hnub kom hnov Nws lub suab thiab Nws txoj kev hlub. Thaum koj nyeem, cia li xav seb Nws qhia dab tsi rau koj, thiab sau ntawv txog tej kev tshoov siab uas los. Cia li ua tib zoo kom kawm vaj lug kub txhua hnub—qhov tseem ceeb yog Phau Ntawv Maumoos—tas koj lub neej.

Cia li ua raws li tej kev tshoov siab ntawm sab ntsuj plig uas koj txais. Yog tias koj muaj kev xav los sis koj txais kev tshoov siab ua dab tsi zoo rau lwm tus, cia li ua xwb! Txhua yam zoo yeej los ntawm Vajtswv. Cia li qhia koj Leej Txiv Saum Ntuj Ceeb Tsheej tias tsim nyog uas Nws yuav tso siab rau koj thaum koj coj raws li tej kev tshoov siab uas Nws muab rau koj.

Tus Vaj Ntsuj Plig Dawb Huv yuav nplij koj lub siab thiab coj koj kev. Nws yog tus uas Nplij koj lub Siab. Nws yuav txhawb nqa koj thaum koj raug tej kev sim siab. Nws yuav pab koj paub hais li cas thiab ua li cas. Nrog Nws lub hwj huam, koj yuav paub tej yam twg muaj tseeb thiab tej yam twg tsis muaj tseeb. Nws pab tau koj nrhiav tej yam zoo hauv lwm tus thiab koj tus kheej. Tus Ntsuj Plig kuj ceeb toom koj thaum muaj xwm txheej txaus ntshai. Nws yuav coj koj mus rau Yexus Khetos thiab coj koj txav mus deb ntawm kev txhaum.

Koj txais tau tej txiaj ntsim ntawm sab ntsuj plig. Muaj ntau lub txiaj ntsim uas Vajtswv muab rau Nws cov me nyuam dhau los ntawm Nws tus Ntsuj Plig. Tej uas cov vaj lug kub hais txog yog kev tshwm sim, kev ntseeg Yexus Khetos, kev txawj qhia, kev paub qhov zoo thiab qhov phem, thiab kev muaj tswv yim. Cia li thov Leej Txiv Saum Ntuj Ceeb Tsheej seb Nws tau muab tej txiaj ntsim ntawm sab ntsuj plig twg rau koj, koj yuav ua li cas kom siv tej ntawd, thiab Nws xav kom koj ua li cas kom siv tej ntawd thiaj ua rau lwm tus tau koob hmoov.