Koj tau koob hmoov los ntawm cov yawm sij thiab txoj cai pov thawj hwj

Txhua tus yawm sij thiab txoj cai pov thawj hwj yog los ntawm Yexus Khetos. Txhua tus uas tuav lub pov thawj hwj yeej muaj Nws txoj cai. Tus Cawm Seej txiav txim seb leej twg txais txoj cai no thiab leej twg txais cov yawm sij pov thawj hwj. Peb tso siab rau Nws txoj kev txawj ntse zoo tag nrho.

Yexus Khetos tau muab Nws lub pov thawj hwj txum tim rov qab los nyob hauv peb lub caij nyoog. Nws coj txoj kev siv lub pov thawj hwj. Adas, Mauxes, Petus, thiab ntau tus yaj saub nyob hauv peb zaj keeb kwm tau txais cov yawm sij pov thawj hwj. Nyob hauv peb lub caij nyoog, Joseph Smith tau txais cov yawm sij pov thawj hwj los ntawm Yauhas tus Muab Neeg Ua Kev Cai Raus Dej, Petus, Mauxes, Eli-as, Eliyas, thiab lwm tus. Cov nyob hauv Thawj Pawg Thawj Tswj Hwm thiab Pawg Kaum Ob tug Thwj Tim tuav txhua tus yawm sij pov thawj hwj nyob hauv lub ntiaj teb hnub no. Cov thawj coj pov thawj hwj thiab tej pawg thawj tswj hwm hauv zej zog kuj tuav yawm sij pov thawj hwj rau lawv tej kev hu. Cov yawm sij pov thawj hwj kav Vajtswv txoj hauj lwm. Cov yawm sij no tso cai thiab muab hwj chim rau cov txiv neej thiab cov poj niam pab ua txoj hauj lwm ntawd.

Txoj cai pov thawj hwj foom koob hmoov rau tag nrho Vajtswv cov me nyuam. Vim tau muab lub pov thawj hwj txum tim rov qab los, koj txais tau cov kab ke thiab nrog Vajtswv khi lus los tau. Koj ua tau tej yam los ntawm Vajtswv lub npe thaum ib tug uas muaj txoj cai ntawd txib koj los hu koj ua hauj lwm.

Cia li lees txais tej kev hu ua hauj lwm hauv lub Koom Txoos thiab rau siab ua txoj hauj lwm ntawd. Thaum koj lees txais ib txoj kev hu ua hauj lwm hauv lub Koom Txoos, lawv siv Vajtswv txoj cai tsa koj ua txoj hauj lwm ntawd. Koj kuj txais tau Vajtswv tej lus qhia thaum koj ua hauj lwm pab li no. Thaum koj ua hauj lwm no, koj sawv Yexus Khetos cev. Cia li ua zoo npaum li koj ua taus rau Nws.

Txhawb nqa pom zoo rau cov uas Vajtswv tau hu kom ua hauj lwm. Txhawb nqa pom zoo tsis yog kev tsa tes thaum lawv hais tus ntawd lub npe nyob hauv lub Koom Txoos txoj kev sib ntsib xwb. Lo lus no txhais tias yus txhawb nqa thiab pab tus ntawd. Nrhiav kev qhia tias koj txhawb nqa pom zoo cov neeg uas Yexus Khetos tau hu kom ua hauj lwm hauv Nws lub Koom Txoos.

Cia li ua raws li tej yam uas koj cov thawj coj hauv lub Koom Txoos txib koj ua—tsis hais koj pawg los sis chav kawm pawg thawj tswj hwm. Lawv muaj txoj cai los ntawm Vajtswv, uas lawv muab rau koj kom ua raws li lawv txib koj ua. Tej zaum koj yuav txais kev txib kom txhawb pab lwm tus, tos txais tib neeg thaum lawv tuaj rau kev sib ntsib txais lub cim nco txog, los sis pab ua ib yam ntxim saib ntxim ua. Txawm yog lawv txib koj ua dab tsi los, cia li xav yog ib lub cib fim rau koj ua Yexus Khetos ib tug thwj tim thiab pab ua hauj lwm rau Vajtswv cov me nyuam.

Koj tso siab tau hais tias cov kab ke uas koj ua yog cov kab ke uas Yexus Khetos tso cai ua. Nov yog ib yam uas ua rau Yexus Khetos lub Koom Txoos txawv lwm lub. Dhau los ntawm cov kab ke pov thawj hwj yuav muab Vajtswv lub hwj chim tshwm sim rau peb.

Koj yuav ua ib tug cuab yeej hauv tus Tswv txhais tes. Thaum koj siv tus Tswv txoj cai ua hauj lwm rau Nws thiab raws li Nws cov tub qhe uas tuav cov yawm sij pov thawj hwj txoj kev coj kev, Nws yuav pab koj paub ua li cas pab lwm tus thaum koj ua Nws txoj hauj lwm. Yexus Khetos yog koj lub dag zog. Koj txoj kev pab ua hauj lwm yuav pab koj muab siab npuab Nws ntxiv thiab ua rau koj muaj kev xyiv fab.