E uota te kimwareirei Iesu Kristo

E kimwareirei n taainako Tamam are i Karawa E tangiriko, Natina, bwa ko na karekea te kimwareirei are e kona n reke. Aio bukina ngkai E katauraoa te baire ni kakukurei E kanakoa Natina, ae Iesu Kristo, bwa e na riki bwa am Tia Kamaiu ao e reireia Ana euangkerio. Te taeka ae gospel nanona “rongorongo ae tamaroa,” ao te rongorongo ae tamaroa bwa ibukina Iesu Kristo, ko kona ni karekea te kukurei n te maiu aei ao n akea tokina ni kabwanina te kimwareirei.

Koaua aika Akea Tokiia

Ko kantaningaaki bwa ko na karekea te kukurei ao te kimwareirei Anne oin te kantaninga inanon maium. Bon oin te kantaninga n ana baire Tamara are i Karawa n te babaire ni kakukurei. E aki nanonaki n aei bwa ko na bon aki nanokawaki ke ni karekei taai aika a kangaanga. Ma e nanonaki bwa e kona ni buokiko n ribuakon taai aika a kangaanga te Tia Kamaiu ao ni kunea te kimwareirei.

Te kimwareirei e aki roko man arom are ko mena inanona; e roko man iriirakin Iesu Kristo. Ko kona ni karekea te bong ae aki nakoraoi, te wiiki ae aki nakoraoi, ke te ririki ae aki nakoraoi. Ma te kimwareirei bon tiaki akean te rawawata inanon maium, bon raonakim iroun Kristo inanon maium.

Ana kimwareirei te Tia Kamaiu e korakora riki ao e teimaan riki nakon bwaai nako. E na kaririiko Tatan bwa ko na ukoukora te kakukurei ao te raunnano n aro ni bangaomata ke man kakukurein te aonaaba. Bwaai nako ake a kaitarai Iesu Kristo ao Ana tua nako a bon aki kona n uota te kimwareirei ae teimaan ao te kakukurei ni koaua. Urinnga bwa aki teimaan bwain te aonaaba aei. Ana euangkerio Iesu Kristo e anga te kimwareirei ao te kukurei aika a korakora riki, mimitong man tabu, ao akea tokiia.

Kakao

Rinea te kimwareirei. E ngae ngke e koaua bwa iai te kananokawaki ao te rawawata n te aonaaba aei, Tamara are i Karawa e kaona naba te aonaaba ma bwaai aika a tamaroa, aika a kakukurei. Ukoukori bwaai akanne. Kataia bwa kona ataia bwa bukin tera kona kimwareirei ni katoa bong—ke tao ko bon kona ni korei. Aikai bwaintangira mairoun Tamara are i Karawa ae tatangira.

Uota te kimwareirei ao te kukurei nakoia aomata. E kunea bwaninin te kimwareirei Iesu Kristo ngkai e anganiira te kimwareirei. Ko kona n ira ana banna ni katooto man karekean te kimwareirei ao te kukurei man buokakiia aomata. Buoka temanna bwa e na namakina ae tangiraki. Anga te katekeraoi ae e nako man te nano. Kaunga temanna ae iai rawawatana. Ngkana ko namakinna bwa ko kainnanoa riki te kimwareirei inanon maium, kataia moa uota te kimwareirei nakon temanna.

Bwaina te kimwareirei n neboan te Uea. Ngkana ko nako n taromauri, kabotoa am iango iaon te kimwareirei are e anganiko Iesu Kristo, ao nebonebo nakoina ibukin anne! Karaoa tibwangam n tibwatibwa te tamnei ni kimwareirei inanon bootaki n am Ekaretia. Karika te anene ae tabu bwa mwakoron am nebonebo ni mweengam ao n te Ekaretia.

Kakabwaia aika a taekinaki n te Berita

Ko kona n namakina te kimwareirei e ngae ngke e matoatoa te maiu. Ko na bae ni kan ataia bwa e kanga n riki aei, ma e bon koaua. Am onimaki iroun Iesu Kristo, mwaakana ni kamaiu, ao ana berita ae akea tokina e kona n anganiko te kimwareirei n tainako. Ana kimwareirei e tokanikai iaon te rawawata ao e uota te rau nakon kantaninga aika a bati.

Bwanin te kimwareirei e tataningaiko n abanuean te Atua ae te tiretio. E tokanikai Iesu Kristo iaon bwaai nako ake a kona n totokoiko man karekean te kimwareirei ae akea tokina. Ngkai ko onimakinna ao n iriiria, te kimwareirei aei e na riki bwa am bwai.

Titiraki ao Kaekaaia

Ngkana e kakukurei te euangkerio, bukin tera ngkai I namakina te nanokawaki? Namakinan te nanokawaki bon tiaki te kanikina bwa ko aki maiuakina te euangkerio. A bane aomata ni kabane n rinanon kakaitara, kataaki, ao karawawata. Iriiran Iesu Kristo e aki bita aio, ma e reitiko ma te Tia Kamaiu are e kona ni karaua nanom ao ni buokiko ni karekea te kimwareirei ao te kukurei.

Bukin tera e korakora te korakai n te aonaaba? Tabeua korakai n te aonaaba a roko ibukina bwa aomata a kabonganai oin inaomataia n rinerine ni karaoi rinerine aika a kairua. Aio are e rootaki iai maiuia ao aomata riki tabeman. N te aro anne, te kairua bon akea ae bukintaeka iai—a bon riki ibukina bwa e bwa e bon aki kororaoi te aonaaba aei. Ni bwaai nako ake a riki, e kona n urua te nano n noora temanna ni korakai, riki temanna ae ko tangiria. Kakoauaa bwa te Atua e nanokawaki naba ngkana ko korakai. E kariaia te kataaki n te maiu ae mamate bwa e na buokiko n rikirake ao n tauraoi ibukin te kimwareirei ae akea tokina ma Ngaia, ma E aki kiitaniko bwa ko na korakai n ti ngkoe. E kanakoa Iesu Kristo bwa e na katoka iaona marakim bwa e aonga ni kona ni buokiko. Iesu Kristo bon korakoram! Ao E kaoko, bwa ko na riki bwa temanna te tia iriira, ni karaoa te bwai are ko kona ni buoka kabebeteaia aomata ake a korakai.

Taraa Taian Areru 16:11 (ike e mena iai te Atua iai te kimwareirei ae bwanin); 95:1 (anene nakon te Uea); Ioane 16:33 (kakukureiko, bwa Iesu Kristo e tokanikai iaon te aonaaba); I-Karatia 5:22 (uaan te tamnei bon te kimwareirei); Ebera 12:2 (Iesu Kristo e rinanon te korakai ibukin te kimwareirei ni kamaiuakiia natin te Atua); 2 Nibwaai 2:25 (Te Atua e tangiriko bwa ko na karekea te kimwareirei); Aramwa 26:15–16 (karaoan ana mwakuri te Atua e kairi nakon te kimwareirei); Reirei ao Berita aika Tabu 18:15–16 (ai korakora ra riki kimwareireimi ngkana kam kairiia aomata aika a mwaiti nakon Kristo).

Titiraki ibukin Rekomente nakon te Tembora

Iai am koaua n Ana Mwakuri ni Kamaiu Iesu Kristo ao n Ana beku ngkai am Tia Kamaiu ao te Tia Kabooira?