Otenanti ao berita aika a tabu n te tembora a anganiko korakoram ni karekei Ana kakabwaia te Atua

Te entaumente bon te bwaintangira n te atatai ao te mwaaka. N taian otenanti n te entaumente n te tembora, ko katoka aran te Tia Kamaiu iaom n ae bwanin raoi. Ko berita bwa ko na ongotaeka iroun te Atua, kabanea nanom ni karaoa Nanona, maiuakina Ana euangkerio Iesu Kristo, ongotaeka nakon tuan te itiaki, ao katabua—ke anga—maium ao bwaai ni kabane ake e a tia n anganiko te Atua nakon Ana Ekaretia. Aikai kakabwaia nakoim. E berita te Atua bwa E na kakabwaiako ma te atatai ae korakora, kamanoaki, ao ni kona ni karekea Mwaakana. E berita naba bwa E na anganiko te maiu ae akea tokina ma Ngaia. Ngkai mwakoron te waaki n te entaumente, ko karekea te kariaiakaki ae tabu ni kunikaiaki n ana kaamenti te nakoanibong ae tabu. Te kaamenti bon te kanikina ibukin Iesu Kristo ao te kauring ibukin am berita aika tabu n te tembora.

Te kabaebae n te tembora e katiteuanaiia taanga ao utu ibukin te maiu ae akea tokina. N te otenanti n te kabaebae n te tembora, ngkoe ao kainabam kam na karaoa te berita ae tabu ma te Atua ao i marenami. Kam na berita bwa kam na kakaonimaki nakon te Atua ao i marenami, ao n tangiri ao ni ibuobuoki i marenami, ao ni uaia ni mwakuri ni kawakin ana tua te Atua. Aio am berita. E berita te Uea bwa am reitaki ma kainnabam ao natim e kona n reitinako n akea tokina. E berita naba bwa ko kona ni karekea te mimitong are e rietaata ma Ngaia n te abanuea are tiretio ngkana ko kawakin am berita aika tabu. Te kakabwaia aio e aranaki bwa te karietataaki.

E na iai n taainako am beeba ni kariaia nakon te tembora. Marooro ma te membwa n am bitobiriki ni karekea teuana. E na titirakiniko taian titiraki bwa ko kanga ni maiuakin ana tua nako te Uea ibukin rinim n Ana auti ae tabu. Rinanoi taian titiraki aikai ni katoa tai. (Ko kona ni kunei n te abentekiti inanon te boki ni kairi aei.) E ngae ngkana ko maeka n raroanako ma n te tembora, karika am rekomente bwa te kanikina n am tangira ibukin te Uea ao am motinnano ni maiuakin Ana tua nako.

Nanakon te tembora ni katoa tai ngkana ko konaa. Ma am beeba ni kariaia nakon te tembora, ko kona n rin n Ana auti te Uea ao ni bwabetitoaki ao ni kamatoaaki ibukiia am bakatibu, bwa aonga ni karekei kakabwaia ake ko a tia n anganaki. Kabongana raoi te tai ae reke n nanakon te tembora. Kunea te Uea i nanon Ana auti. Ukoria inanon taian otenanti, taian kanikinaa, ao te Tamnei are ko namakinna. Are ko na bon kunea.

Katauraoi ni karaoi berita aika tabu i nanon ana auti te Uea. Teuana te kawai ae rangi n tamaroa ni karaoan aei bon arom ni kawakina am berita n te bwabetito. Karikia bwa teuana am kouru ni kairam ni karekei otenanti n te tembora ao n riki bwa te tia kawakina te berita i nanon nako maium. Moanna ma ngkai ni maiuakina te tua are ko berita bwa ko na ongotaeka nako iai n te tembora: ongotaeka nakon ana tua te Atua, te anga karea, ana euangkerio Iesu Kristo, maiuakinan te itiaki, ao tuan te anganano. Am utu, bitiobi, ao taan kairiiri tabeman a kona ni buokiko.

Ko kona n riki n aron Iesu Kristo. E na buokiko n riki bwa te tia kakaota te kokoaua ae matoatoa. Otenanti ao berita aika tabu n te tembora a na reireiniko bwa ko na kanga n rin imatan te Atua ao ni karekea te maiu ae akea tokina ma Ngaia.

E na katokaaki i aom mwaakan te Atua. Berita aika tabu n te tembora a airi ma te berita bwa mwaakan ao mimitongin te Atua a na toka i aom. A na kawakiniko Ana anera.

Am tai i nanon te tembora e na reitiko ni kaaniiko nakon Iesu Kristo ao te Tamnei ae Raoiroi. Ko na namakina ana raoi ao ana rau te Atua. Ko na ongo Bwanaana n ae rangi ni mataata. E na kaukaki karawa nakoim, ao ko na rangi ni mataata ni Kawaina nako. E na reke riki kakorakoraam ni kaitarai kakaewenako ake ko kaitarai ibukina bwa nanom e reitaki Nakoina.