E Aki Kai Nanou, iroun Yongsung Kim Kabwarabwaraan tamnei man Havenlight.
5.
Nakonako n otan te Atua
I-Karatia 5:25
Ko kona n noori raoi bwaai ngkana ko karaoi rinerine aika a tamaroa. Anne bukina ngkai e rang kakawaki te ota, te ota e kabebetea nooran te kawai ae eti. Tamara are i Karawa e anganiko kawaim ni karekea otan karawa—te Tamnei ae Raoiroi—e na buokiko n nooria raoi bwa tera ae raoiroi ao ae buakaka, eti ke bure.
Koaua aika akea tokiia
Ko kona ni karekea te Tamnei ae Tabu bwa e na raoniko n tainako. Ngkana ko a kamatoaki bwa te membwa n te Ekaretia, ko kaoaki bwa ko na “karekea te Tamnei ae Raoiroi.” Te tai ni karekea te Tamnei bwa raraom n tainako bon teuana man ana bwaintangira te Atua ae korakora ibukim.
Karaoan rinerine aika tamaroa e na anganiko am atatai n namakina te Tamnei. A mwaiti bwaai aika raraoi ao n tamaroa n te aonaaba. N aron ae rabwatam e rootaki bwa man bwaai ake ko kanna ao nimma, am iango ao tamneim e namakina korakoran rootakim bwa man tera are ko warekia, matakuakinna, ao n ongoraeakinna.
Kakao
Bairea am tai ibukin te Uea ni katoa bong. Reiakina Taekana. Ururingnga n tainako. Tataro nakon Tamam are i Karawa. Kamatebwaii booki aika tabu ao aia taeka burabeti aika a maiu. Ngkanne kataia ni maiuakin bwaai ake ko reiakinii.
Ukoukora are e na uotiko rake, kaungako, ao ni kaoa te Tamnei. N aron karaoan am rinerine bwa tera ae ko na matakuakinna, warekia, ongoraeakinna, ke n iria, iangoia bwa aekara te namakin ae e na anganiko. E kaoa te iango ae tamaroa? Kateiraroako man bwaai ake e kaenaenai bwaai aika tabu ke aki itiaki. Tai iri bwaai ake e kawaeremea am motikitaeka ke kairootakim nakon te Tamnei, n aron te aki rau, te arekooro, ao te turaki aika a kamamate. Karekea te ninikoria n tiringa te witeo ke te takakaro, otinako man te tamnei ke te taenti, bita am katangitang, ke kitanii bwaai ake e aki boraoi ma te Tamnei.
Kabonganai bwaai ni kareke rongorongo n kaungaiia. Bwaai n reitaki ibukin te botanaomata e kona n riki bwa bwaai n reitaki aika korakora. Ngkana ko kabonganai, kabotoa am taratara, onimaki, ao koaua. Tai kabotaua maium nakon aia taneiai aomata tabeman. Uringnga are taum e roko man natinakim irouia kaaro i karawa, tiaki man bwaai n reitaki ibukin te botanaomata.
Ukora tamaroan taian taneiai ao koaua n te reitaki ae reitinako. Taratara raoi bwa kamanenaakin bwaai n rabakau aika boou ao bwaai ni kareke rongorongo e na aki oneamwin am tai ae ko na kamanena ma am utu ao raoraom. Bwaai n reitaki ibukin te botanaomata ao tabeua bwaai n rabakau aika a boou a kona n anaa am tai ae bati n anganiko uaana ae akea manenana. Motirawaiko man te aonaaba ae kabonganai bwaai n rereitaki n bwaai ni itoman , ao reitaki ma bon aomata ni koaua n te maiu.
Berita Aika Beritanaki
Ko kona ni karekea te Tamnei iroum n taainako. Te berita aei ni mwakoron te berita ae tabu ake ko karaoi ni katoa tai n anaakin te toa. Te Tamnei ae Raoiroi e na kaota nakoim koauan Tamara are i Karawa ao Iesu Kristo. E na kabebeteko, kairiko, kauringko, ao katabuko. E na buokiko n ataa te koaua ao n noora te tamaroa n te aonaaba.
Titiraki ao Kaekaaia
N na kanga n ataia ngkana I a namakina te Tamnei ae Raoiroi? Reiakinan ataakin te Tamnei ae Raoiroi e anaa te tai, kataneiai, ao taotaonakinano. E taetae nakoia aomata aika a kakaokoro ni kawai aika kaokoro. Tai tarariaoi bwaai aika bebete—te namakin ae rau are ko karekea n ongoraean ana koaua temanna ke am namakin are e tuai rauaki imwin karaoan te rinerine ae bure. Ukorii booki aika tabu ibukin reitakin te Tamnei ae Raoiroi ni kawai aika kaokoro, tataroakinna, ao teimatoa n tarai aanga n namakinan te Tamnei.
Tera tamnei aika buakaka? Bukin tera N na totokoia? Tamnei aika a buakaka e bon tei ibukin, taian tamnei ke taian taeka, are e karaoaki nakon kautan te namakin n te tangako. Tamnei aika a buakaka a roko n aroia aika a mwaiti, n raonaki ma witeo, tamnei, booki, ao katangitang. E kona naba n riki bwa rongorongo ke tamnei ni kanakoaki imarenaia rao. Tamnei aika buakaka e riaon bwaai are a tabu—rabwatara ao namakinan te tangako—ma akean te karinerine. Ko na kona n rinanon tamnei aika buakaka n akean nanom nako iai. Tao ko na rinanon tamnei aika buakaka ni bon oin nanom ke tiaki, waekoa tannako. Ko kona naba n tangiria ni marooro ma te karo ke tabeman ikawai aika onimakinaki. Ni bon oin nanom ni mataku n tamnei aika buakaka bon te bure ao kabuakaka am atatai n namakina te Tamnei. E kamamaraa tauan nanom ao nunora tein arom n taraiko ao tabeman. Iai mwaakan Iesu Kristo ni buokiko n totokoi tamanei aika buakaka ao rairannano. Rairaki Nakoina; tannako man te bure. E kona ni buokiko am bitiobi ni karekea te korakora ao kabwarabure rinanon te Tia Kamaiu. Iesu Kristo bon korakoram.
Taraa Taian Areru 119:105 (Ana taeka te Atua ai aron te ota iaon kawaira); Amoti 5:14 (ukoukora ae tamaroa); I-Karatia 5:22–23 (uaan te tamneit); Moronaai 7:18–19 (otan Kristo); Reirei ao Berita aika Tabu 6:23 (te Uea e taekina te rau); 20:77, 79 (tataron te toa).
Titiraki ibukin Rekomente nakon te tembora
-
E a tia te Uea n taekinna bwa bwaai nako ana bane ni “karaoaki n te itiaki” i Matana (Reirei ao Berita aika Tabu 42:41). Ko kekeiaki ibukin ataakin te itiaki n am iango ao n anuam?