1.
Ana babaire te Atua bon ibukim
Imwaain rokom n te aonaaba, ko a tia n maeka ma am karo ake i karawa. Natina ngkoe ae ko tangiraki. I karawa, ko reiakina taekan ana babaire te Atua ibukiia Ana utu. Ko butimwaea te babaire aio ma te kimwareirei ibukina bwa e na kona ni buokiko n rikirake ao ni waaki rake n riki n ai aron te Atua man karekean rabwatara ae mamate, bwa mwakoron te utu n te aonaaba, ao n rinanon waakin te maiu n te aonaaba. Tabeua mai buakon taneiai aikai a na bon matoatoa. E ataa aio Tamara, ngaia are mwakoron Ana babaire, E kanakoa te Tia Kamaiu, Iesu Kristo, bwa E na buokiko. Ti arana aio bwa te babaire ni kamaiu ke te babaire ni kakukurei.
Koaua aika Akea Tokiia
Tamara are i Karawa bon ngaia ae karaoa te babaire. Bon Ngaia Taman tamneim, ao E tangiriko. E tangiria n anganiko Ana kakabwaia ae korakora—te maiu ae akea tokina ma Ngaia. N taekana teuana, E tangiria bwa kona riki n aekakina ao ni maiuakina te maiu ae kakukurei, ni mimitong n ai arona. Iai te mwaaka Irouna ni kabane ao E atai bwaai ni kabane. Ko kona n Onimakinna, e ngae ngkana e a matoatoa te maiu.
E kakoroa nanon te babaire Iesu Kristo. Imwain karikan te aonaaba, e rinea Iesu Tamara are i Karawa bwa e na riki bwa am Tia Kamaiu. Bon ti Iesu Kristo ae e kona ni kairiko n oki nakon Tamam are i Karawa. Ngaia anne bukina ae ti rineia ni iriiria. A bane ni boboto bwaai ni kabane iaon te rinerine anne!
Te mare ao te utu a kakawaki n Ana babaire te Atua. Ngkami bon mwakoron ana utu te Atua, ao Natina ni kabane aika tamnei a roko nako aon te aba rinanon te tina ao te karo. E tangiriia natina aine ao mwaane te Atua bwa a na uaia n rikirake nakon te kororaoi ae akea tokina. Mwaane ao aine n tatabemaniia titebo are a aanga nakon te mare n te tangira, ae katiteuanaaki. Te maiu n te utu n te aonaaba aei—e ngae n aki kororaoi ni kabane—e kona n uota te kimwareirei ae korakora. A bon riki aikai bwa a na buoki ngkami ni katauraoi ngkami ibukin te maiu ae akea tokina ma te Atua.
Kakao
Kateimatoa te nonori ae akea tokina. I nanon taai ake ko kaitara iai ma kariiri, kataaki, bwarannano, ke rinerine aika kangaanga, manga kauringko Ana babaire te Atua. Noria bwa a kanga koaua aika akea tokiia iaon Ana babaire ni kona ni buoki ngkami n tarai kangaanga akanne n te taratara ae okoro.
Noora bain te Atua inanon maium. Noori kawai ae e kakabwaiako iai te Atua. E na kona n ae ana mwakuri n akoi temanna, te tai n rau, ke kaekaan te tataro.
Rineia n iriira Ana babaire te Atua. Reiakinna bwa tera ae tangiria Tamam are i Karawa bwa ko na karaoia. Ukora Ana kairiiri ngkai ko kamatebwai koroboki aika tabu, aia taeka burabeti aika maiu, te katanoata ibukin te utu, ao am kakabwaia n tamaniuea. E na katauraoiko aio ni beku ibukin te Uea, n am tai ni mitinare ao rinanon nako maium. Karika te beku nakon te Uea, te mare ae akea tokina, ao karikirakeaia ataei bwa te moanibwai. Karaoa tabem ni karika ami utu bwa a na kukureiko ngkai man irirakin ana reirei Iesu Kristo.
Kakabwaia Aika Beritanaki
Ko kona ni kaitarai kataaki n te maiu ma te ninikoria ao te kantaninga iroun Kristo. Ibukina bwa ko ataa taekan Ana babaire te Atua ae akea tokina, iai iroum te bwai ni mwakuri ae kakawaki are e kona ni buokiko i nanon taai ni kangaanga. Ko ataia bwa a mwaiti riki kanoan te maiu aei nakon bwaai aika a riki i marenan te bungiaki ao te mate. Ko ataiko bwa antai raoi ngkoe, tera te kantaninga ibukim, ao antai ae ko kona n riki n ai arona n ana ibuobuoki te Tia Kamaiu. Iesu Kristo bon korakoram!
Ko kona ni karekea te maiu ae akea tokina ngkai ko iriira Iesu Kristo. E na anganiko te mwaaka n riki n ai arona, n oki nakoia am karo ake i karawa, ao ni maeka ma te kimwareirei ma ake ko tangiriia n aki toki. Onimakina Iesu Kristo.
Titiraki ao Kaekaaia
Bukin tera te maiu aei e matoatoa n tabetai? N na kanga ni kunea te korakora? Baike ko rinanoi n te maiu aei—bwa tao bwaai aika a kangaanga—a kona n riki bon ibukin kabwaiam. A kona ni buokiko n rikirake ao ni waaki rake ngkai ko rairaki nakon te Tia Kamaiu. Akea te bwai ae ko na rinanona ae e aki mataata iai Iesu Kristo ibukin Ana anga karea ni kamaiu. E ataia raoi bwa e na kanga ni buokiko. Kabotoa maium Iaona, ao E na tabekikorake iaon nanououa ao maaku ni kabane.
N tabetai, te iango n te utu ao te mare ae kakukurei a taraa n rangi ni matoatoa rekeia. N na kanga ni karekea ae na bon onimaki? E ngae ngke tera ae ko rinanona, tai kanakoa am onimaki i aon Ana babaire Tamara are i Karawa. E aki kona ni bwara nanona iroum. Ngkana ko kakaonimaki nakon te Tia Kamaiu ao n am berita aika tabu, ko na kunei kaeka n Ana reirei Iesu Kristo. E mataata nakon bwaai ni kabane ake ko rinanoi. Bwa rinanon Iesu, ko na karekea te korakora n ongeaba nakon ana tua te Atua ao ni karekea te kakabwaia are E beritanna. Onimakinna ma Ana euangkerio.
Taraa 2 Nibwaai 9:13 (ai korakora ra ana babaire Atuara!); Motiaea 2:41 (naake a kawakina ana tua a kona ni maeka ma te Atua n te aro ni kukurei ae aki totoki); Aramwa 12:28–34 (te Atua e kaota nakoia Natina te babaire ni kabomwi); Aberam 3:22–26 (Ana babaire te Atua e raonaki ma kanakoara nakon te aonaaba, ike ti na kona n rinerine ibon iroura n iriira Ana tua).
Titiraki ibukin Kariaia nakon te Tembora
-
Iai am onimaki i nanom ao am koaua iroun te Atua, te Tama ae Akea Tokina; Natina, Iesu Kristo; ao te Tamnei ae Raoiroi?