E na buokiko Iesu Kristo

Taian Areru 147:3

Iesu Kristo bon korakoram. E a tia ni karaoi bwaai ni kabane aika riai ibukim ni karekea te kimwareirei n te maiu aei ao n aki toki. Man rinean Kristo ao Ana euangkerio, ko bon rinea te kukurei ao te kimwareirei ae akea tokina.

E ngae ngkana ko kataia ni karaoa am kabanea n tamaroa ni karaoi rinerine aika eti, n tabetai kona bon konaa n tibanako. Ko na karaoi bwaai aika ko tangiria n aki karaoi. A karaoia aomata nako. Ngkana e riki aio, e bon bebete namakinan te bwarannano ke ko na taku bwa e aki tau tamaroam. Ma iai te rongorongo ae tamaroa—e kakukurei, te rongorongo ae anga te kantaninga! Ibukina bwa e tangiriko te Atua, E kanakoa Natina, Iesu Kristo, are e katokaa Iaona am bure n te aro bwa ko na kona n rairananom, ni kabwaraki am bure, ao n reitinako n rikirake.

Koaua aika Akea Tokiia

E na kakorakorako Iesu Kristo. E na buokiko ni bitii baike ko tangiri, am iango, ao am mwakuri. Ngkana ko raraoma, maaku ke ikakorakora n aanga nako, E na kabebeteko. E na buokiko n am kantaninga ni kabane ni maium. Ko kona n onimakinna.

Te rairannano bon tiaki te katuaa ibukin te bure; bon te kawai are e kainaomataira iai te Tia Kamaiu man te bure. Te rairannano bon te bitaki—te tannako man te bure ao kaineta te Atua. E nanonaki iai bwa te katamaroa ao karekean te kabwarabure. Te aeka ni bitaki aei bon tiaki n ti teuana te tai; bon te waaki ae reitinako.

Kakao

Karika Iesu Kristo bwa boton maium. Ukora Ana buoka ni bwaai nako ake ko karaoi.

Raira nanom. Rairaki nakon te Uea ma te nano ni kan rikirake. Ngkana ko a tia ni karaoa te bwai teuana ae bure, kokoaua ni kaotia imatan te Atua ao, n aron kainnanoana, nakon am bitiobi ao temanna are ko a tia ni kammarakia. Karaoa am kabanea n tamaroa ni kanakoraoi bwaai nakon etiia.

Kimwareirei n te bwaintangira ni karaoan te tamaroa ao katamaroa riki. E ngae ngkana e aki bebete ao ni maan nakon ae ko tangiria, tai toki ni kataia. Teimatoa mwakuriia ao onimaki iroun Uea. E na buokiiko inanon nako waakin maium.

E tekateka Iesu irarikin te mwanibwa ma ainen Tamaria

Kakabwaia Aika Beritanaki

E na kabwarai am bure ao ni kamarurungko Tamara are i Karawa ngkana ko rairananom. E na onea mwin am bure ma te rau ao te kimwareirei. E na aki manga uring am bure. Iesu Kristo bon korakoram, ao man Korakorana, nanom ni kan kawakin Ana tua e na rikirake.

E na bita nanom ao maium. Teutana imwin teutana, ko na rikirake ao n riki n ai Arona.

Titiraki ao Kaekaaia

N na kanga n ataia ngkana e a tia ni kabwarai au bure te Atua? E berita te Atua bwa e na kabwarai aia bure ake a rairinanoia. Ngkana ko namakina te kabebeteaki mairoun te Tamnei, ko kona n ataia bwa mwaakan ana mwakuri ni kamaiu te Tia Kamaiu e bon mwakuri inanon maium.

Ningai ae N na kainanoa ana buoka te bitiobi n rairananou? E taui kingin te nakoanibonga am bitiobi ao iai irouna bwaintangira n tamnei ni kona ni buokiko n am rairannano. Ko kona ni ukora ana buoka ao ana marooro n te tai are ko baireia. Ngkana ko a tia ni karaoa te kaairua ae kakaiaki, n aron uruan tuan te itiaki, marooro ma am bitiobi. E aki kona ni kabuakakako. Bon ngaia ana tia tei Iesu Kristo ao e na buokiko n ataia bwa ko na kanga n rairananom ni koaua ao ni karekea ana kamarurung te Tia Kamaiu ao mwaakan korakorana.

I kataia n rairananou, ma I teimatoa ni karaoa te kaairua. Tera ae I riai ni karaoia? Tai kabwara nanom. Rairaki nakon Kristo, ao katuka am onimaki Iaona. E tau Ana akoi. Kataia riki. Ko aki tiku n tii ngkoe i nanon am kekeiaki n rikirake. E mena iroun n taaiko Iesu Kristo.

Taraa Enoti 1:6 (te bure e kona ni kamaunaaki); Motiaea 4:3 (rinanon te Tamnei ae Raoiroi, te Atua e tuangko e a kabwaraaki am bure); 26:30 (te Tia Kamaiu e kabwarai buure n tainako ngkana ti rairinanora); Ita 12:27 (ana akoi te Tia Kamaiu e kona ni karaoi mamaara bwa a na korakora) Moronaai 6:8 (koraki ake a rairinanoia a kabwaraaki aia bure); 10:32 (riki ni kororaoi iroun Kristo); Reirei ao Berita aika Tabu 1:32 (te Uea e kabwarai aia bure ake a rairinanoia); 58:42–43 (te rairannano e raonaki ma kaotan ao katokan te bure).

Titiraki ibukin te Kariaia Nakon te Tembora

Iai am koaua ibukin Ana Mwakuri ni Kamaiu Iesu Kristo ao n Ana beku ngkai am Tia Kamaiu ao te Tia Kabooira?
Iai am bure aika a kakaiaki i nanon maium ae ko riai ni kaitiaki ma mataniwi n te nakoanibonga bwa mwakoron am rairannano?