Karaoi rinerine aika a kaungaaki

Inanon Ibukin Kakorakoraia Kairake, ko na kunea ana reirei Iesu Kristo ao Ana burabeti. Ma koaua aikai ake a riki bwa kairam, ko kona ni karaoi rinerine aika kaungaaki are e na kakabwaiako ibukin ngkai ao n aki tokina.

Ngkoe natin te Atua n tamnei ae bati n tangiraki. Ana babaire ni kakukurei ae korakora e kangaraoia ibukim bwa ko na rikirake n te maiu n tamnei ao karikirakea am konabwai mai ieta. E kanakoa Iesu Kristo bwa e na riki bwa am Tia Kamaiu.

Tamara are i Karawa e onimakiniko. E a tia n anganiko te kakabwaia aika a korakora, n ikotaki ma bwaninin te euangkerio ao otenanti aika tabu ao berita are e kabaeko Nakoina ao ni uoti Mwaakana inanon maium. N raonaki ma berita aikai a roko kakukurei ao tibwanga aika a raka. E ataia ae ko kona ni karaoa te kaokoro n te aonaaba, ao are e kainanoaki, n arona aika mwaiti, n riki ni kaokoro man te aonaaba. Ukora ana kairi Tamam are i Karawa ngkai ko karaoa am rinerine. E na kakabwaiako ma te kaunganano rinanon te Tamnei ae Raoiroi.

Iesu Kristo bon te kawai nakon te kimwareirei ae akea tokina. Ngkai ko kabongana inaomatam n rinerine ni iriira Iesu Kristo, ko a mena iaon te kawai are kairi nakon te kakukurei. Karika Iesu Kristo bwa am kainibaire, te atiibu ae matoatoa bwa aam. Katea maium iaon Ana reirei, ao katinei am rinerine mai iai. Berita aika tabu ake ko karaoi n te bwabetito, inanon te toa, ao inanon te tembora bon taian atiibu ni kateitei man aam ae matoa iroun Kristo. Ko na teimatoa n rinanon ikakorakora ma kariiriaki, ma Tamara are i Karawa ao te Tia Kamaiu a na buokiko n rinanoia ni kabane.

Te kantaninga Ibukin Kakorakoraia Kairaki tiaki ae e na anganiko “eng” ke “tiaki” ibukin rinerine n tatabeua nako aika a kona n riki ake ko na kaaitarai. Ma e kaoko te Uea bwa ko na maiuakina te kawai ae rietata riki ao ni mimitong riki—te maiu are boboto iaon te koaua ae akea tokina ao kakabwaia ake e beritani te Uea. Aio Ana kawai. Te kairi aei e na reireiniko taekan Ana kawai. E kabwarabwarai koaua are E a tia ni kaotia. Karaoi koaua aikai bwa kairi ibukin karaoan rinerine—rinerine aika a bubura, n aron karaoan berita aika tabu n te tembora ao mwakuri ni mitinare, ti te arona naba ma rinerine ni katoa bong, n aron ae ko na kanga n akoiia aomata ke arom ni baronga raoi am tai.

Ngkai a kona ni ibuobuoki tabeman, e bon nakoim aron rikirakem n te maiu n tamnei. Bon te tibwanga! Karaoa am kabanea n tamaroa n kanakoraoa am bong nako, kawakin ana tua te Atua ao kawakin am berita, ao buokiia tabeman bwa a na kaan nakon te Tia Kamaiu.

Taraa Motiaea 4:29–30 (kawai nakon te bure a rang ni mwaiti, ngaia are ti bon riai ni kawakiniira t); Ereman 5:12 (katea aam iaon Kristo); Reirei ao Berita aika Tabu 45:57 (anaa te Tamnei ae Raoiroi ibukin kairami); 25:13 (kabaeingkami n te berita ae tabu nakon te Uea).