3.
Ko kona ni buoka ana mwakuri te Atua
E tangiriia natina ni kabane Tamara are i Karawa. E tangiria ni buokiia bwa a na kunea te kukurei ao te kimwareirei, n oki Nakoina, ao ni karekea te maiu ae akea tokina. Aio e aranaki bwa Ana mwakuri ni kamaiu ao te karietataaki, ao E kaoko bwa ko na ibuobuoki!
Koaua aika Akea Tokiia
Ana mwakuri ao mimitongin te Atua bwa E na uota te maiu ae aki mamate ao akea tokina. Te maiu ae aki mamate bon te maeka n akea tokina ma te rabwata ae mangauti. Te maiu ae akea tokina, ke te karietataaki, bon te riki n aron te Atua ao ni maeka ma Ngaia bwa utu aika akea tokiia. Aikai ni kabane a kona n koro nanoia mairoun Iesu Kristo ao Ana Mwakuri ni Kamaiu. Ko kona n Onimakinna.
Ko kona ni buoka ana mwakuri te Atua man rokom nakon Kristo ao ni buokiia tabeman ni karaoa naba anne. N taai ake ko karaoa te bwai teuana ni buoka temanna n iriira Iesu Kristo, ko ibuobuoki n ana mwakuri te Atua.
Kakao
Maiuakina te euangkerio. Karikirakea am onimaki iroun Iesu Kristo. Rairinanora ni katoa bong. Karekei otenanti n ana nakoanibong te Atua ao kawakin am berita aika tabu. Karaoa anne bwa te baeten ni maium ni karokoa tokin maium.
Tararuakiia naake iai kainnanoia. Kakaei aanga ni beku ao n ibuobuoki nakoia tabeman, n raonaki ma am utu, raoraom, ao am kaawa. Teuana te kawai ni buokiia aomata ake a kainano bon te ongeaba nakon tuan te aki mamatam ao n anga te mwane ibukin te aki mamatam.
Kaoia ni kabane bwa a na karekea te euangkerio. Karika am taeka ao am mwakuri bwa a na kaota am onimaki iroun Iesu Kristo. Tauraoi n tuanga temanna are e titirakiniko iaon te kantaninga ao te kukurei are ko namakinna ngkai Ana reirei ngkoe. Ibukiia ataeinimwaane, te beku bwa te mitinare ae bwanin taina bon taben te nakoanibonga. Ibukiia ataeinaine, bon te tai ae moan te korakora; tataromwaaka bwa ko na ataa nanon te Uea ibukim. Katauraoi n tibwa te euangkerio i nanon nako maium.
Katiteuanaia utu ibukn te maiu ae akea tokina man karaoan rongorongon te utu ao te mwakuri n te tembora. Reiakina rongorongoia am bakatibu. Kakaea bwa antai ae e kainanoi otenanti n te tembora. Nakon te tembora ni katoa tai ngkana ko konaa ni bwabetitoaki ao ni kamatoaaki ibukiia. Ngkana ko kainnanoa te ibuobuoki, nakon FamilySearch.org.
Kakabwaia Aika Beritanaki
Ko na karekea ana ibuobuoki te Atua. E aki kantaningaia Tamara are i Karawa bwa ko na karaoa te mwakuri aio n ti ngkoe. E memena irarikim. Ngkana ko nanorinano n anga am tai ao nanom, E na karaoi bwaai aika a kamimii rinanom. Iesu Kristo bon korakoram!
Ko na kaonaki n te kimwareirei. Ana mwakuri te Atua bon te mwakuri ae kakukurei! Ngkai ko ikarekebai ni karaoana, ko na namakina te kimwareirei are E namakinna. Iangoa te kimwareirei are ko tibwaia ma Tamara are i Karawa ao Natina ake ko buokiia ni kairiia Nakoina!
Titiraki ao Kaekaaia
E bon kona te Atua ni kabonganaai n Ana mwakuri? Eng! A mwaiti aanga ni ibuobuoki n te mwakuri. E tara n ae tabeman aomata a rangi n tarena ke n rabakau riki, ma Tamara are i Karawa e nora konabwaim. E a tia n anganiko bwaintangira ake ko kona ni kabonganai ni beku ao ni botiia Natina. Akea te kangaanga ngkana bwaintangira aikai a kaokoro ma ake irouia aomata tabeman. Ni koauana, ngaia anne bukina ae a rangi ni kakaawaki am bwaintangira. Ko kainanoaki!
Taraa Mataio 10:39 (ngkana ko kabuaa maium n ana mwakuri te Tia Kamaiu, ko na bon kunea); 1 I-Korinto 12:14–27 (ni kabane membwa a kainanoaki n rabwatan Kristo); I-Biribi 1:6 (karekea onimakinan ae te Atua e mwamwakuri inanom); Iakobwa 5:72 (Uean te o-ni-kureebe e mwakuri ma ngkoe); Reirei ao Berita aika Tabu 18:15–16 (e na korakora kimwareireim ma naake ko kairiia nakon Kristo); 64:33–34 (mwakuri aika korakora a riki man bwaai aika uarereke man bebete); Mote 1:6 (“Iai te mwakuri ae N na anganiko”); 6:31–34 (a tau naake a weteaki iroun te Atua, e ngae ngke a namakina kabwakaia).
Titiraki ibukin te Kariaia nakon te Tembora
-
Iai am koaua ibukin Kaokan ana euangkerio Iesu Kristo?