E tabu rabwatam

Rabwatam bon katotongan te Atua—te moani mimitong, karineaki Ngaia i karawa ma aonaaba. Koroboki aika tabu e kabotaua rabwatara nakon te tembora ae tabu, te tabo are e maeka iai te Tamnei. Eng, rabwatam e bon aki kororaoi ngkai. Ma am taneiai are ko karekea n rabwatam e kona ni buokiko ni katauraoi ni butimwaea te kororaoi n te bong teuana, mangauti, mimitongin te rabwata.

Tamneim e bon karaoaki man rabwatam ao tamneim. E nanonaki n aei, marurungin te rabwata ao marurungin te tamnei a bon tomaki ni koaua. Te Tia Kamaiu e kaota Tuan te Mauri n reirei te tua n tararuakin rabwatam ao ni berita ake a taekinaki ni kakabwaiaakin te rabwata ao te tamnei.

Namakin iaon mwakuri n taanga bon te mwakoro ae kakawaki n ana baire te Atua ni karaoa te mare ae kakukurei ao te utu ae akea tokina. Namakin aikai a bon aki bure—a bon tabu. Ibukina namakin iaon mwakuri n taanga a bon tabu ao mwaaka. Te Atua e anganiko Ana tua n tuan te itiaki ni katauroiko ni kabonganai namakin aikai n aron are E kantaningaia. E kamatataaki tuan te itiaki bwa te Atua e kariaia waakin mwakuri n taanga tii imarenan te mwaane ao te aine ake a tia ni mareaki. A mwaiti aomata aika a katinanikua ke a bwainikiriina ana tua te Atua, ma e kaoia te Uea bwa a na riki bwa Ana reirei ao ni maiuakina te kainbaire ae rietata riki.

Tararua rabwatam—ao rabwataia tabeman—ma te karinerine. Ngkana ko karaoi babaire iaon am kunikai, karaoan iram, ao aron taraakim, titirakiniko, “I karinea ngkai rabwatau n aron te bwaintangira mairoun te Atua?” E tangiriira Tamara are i Karawa bwa ti na taraira n tatabeman ibukina bwa antai raoi ngaira: tiaki ti rabwata ma Natina aika tangiraki ma tokin kawaira ae mai ieta. Totokoi aekan katein onea ake a anaa taraakim ke n katika taraan rabwatam bwa antai ngkoe ngkai bon natin te Atua ngkoe ma maiun rimwi ae akea tokina. Anga itiakin naano ao tangiran ana kairi te Atua n ara rinerine. Ukoukora te reirei mairouia am utu.

Karaoi bwaai ake a na kakorakora rabwatam, tiaki bwaai are e na kammarakia ke uruanna. Kakukureiko ma te kakaitau ni mwaitin bwaai aika a tamaroa are te Atua e a tia ni katauraoi. Uringnga bwa te arekoro, bakee, kobee, ii, ao tabeua turaki aika a kamamate ao bwaai ake a renganaki a bon aki tau ibukin rabwatam ke tamneim. Riki ibuobuoki man bwaai ake a renganaki, n aron turaki ake iai kabwarabwarakia, a kona ni kaikoaki ngkana aki kabonganaaki raoi.

Kawakin mwakuri n taanga ao namakin iaon mwakuri n taanga bwa a tabu. A riai n aki riki bwa atuun karaki n te manikangare ke te kakukurei. Itinanikun te mare imarenan te mwaane ao te aine, e bon bure ringan taabo aika raba, taabo aika a tabuaki ni mwakoron rabwatan temanna e ngae ngkana e raba n te kunikai. N am rinerine iaona bwa tera ko na karaoia, taraakina, warekana, ongora nako iai, iangoa taekana, katanoata, ke tekiti, totokoi bwaai nako are iai nanoia ni kauta te namakin n iango buaka irouia tabeman ke boni ngkoe. Aei are reitaki ma tamnei aika buakaka n aekaia nako. Ngkana ko kunea bwa te aroaro ke waaki ni kakukurei e karekea te kariiri ae korakora, totokoi. Ko ataia bwa tera aekan aroaro ao waaki ni kakukurei akanne. Ao ngkana ko aki koaua raoi, te Tamnei, am karo, ao am taan kairiri a kona ni buokiko bwa ko na ataia. Kaotia nakon Tamam are i Karawa are ko kawakin boraraoi ao karinea te mwaaka ae tabu ni karaon te maiu.

Am karinerine ibukim ao tabeman e na rikirake ngkana ko karinea rabwatam rinanon ongeabam, taraakim, ao kunikaim.

Te Uea e beritani korakoran te kaubwai n te atatai nakoia koraki ake a kawakin Tuan te Mauri. Te rabwata ae marurung, inanaomata man anua aika a kareke, e karikirakea naba am atatai ni karekei kaotioti i bon iroum, iango ae itiaki, ao beku iroun te Uea.

Maiuakinan te itiaki e uota ana kariaia te Atua ao te mwaaka n tamnei i bon iroum. E kataniko ma am utu n taai aika a na roko. Ngkana ko a tia ni mare, te tua aei e na uota korakoran te tangira, onimaki, ao te katiteuanaaki n am mare. Te ongeaaba n te tua aei e na karaoi angaraoi ibukim n rikirake n akea tokina ao riki n ai aron Tamam are i Karawa. Am kakoaua raoi e na rikirake ngkai ko maiu n ai aron ana reirei Iesu Kristo.