Feast Upon the Word [Kanuaiko n te Taeka], iroun Liz Lemon Swindle Anganano n te tamnei man Havenlight.
11.
E na kainaomatako te Koaua
Ioane 8:32
Tamam are i Karawa bon te Atua ae koaua. E bon atai bwaai-ni kabane. A roko koaua ni kabane mai Irouna ao ni kairaki Nakoina. Ko kaotia bwa a kakawaki koaua ake ko ukori n reiakin, maiuna te kokoaua, ao n tei ninikoria ibukin ataakin te eti—e ngae ngkana bon ti ngkoe.
Koaua aika Akea Tokiia
E tangiriia natina ni kabane aika aine ao mwaane Tamara are i Karawa bwa a na reiakinaki n taainako. Iai iroumi nanon te maiu n tamnei ao rabwata ni ukoria ao tangira te reiakinaki. Te reirei bon tiaki ti taekan karekean te mwane. Bon mwakoron ami kouru ae akea tokina n riki n ai aron Tamara are i Karawa.
Maiuakinan te kokoaua nanona bwa ko tangira te bwai ae eti i matan te Atua—e raka riki nakon tangiran te mweengaraoi, te kinaaki, ke ae angaraoi. E nanonaki karaoan ae eti bwa bukina e bon eti.
Iai bwaai aika kakawaki bwa ko na tibwaia. Ana euangkerio Iesu Kristo iai taian kaeka nakon titirakin te maiu. Bon te kawai nakon te rau ao te kukurei. Ko kona n aki atai bwaai ni kabane, ma ko ata ae tau n tangiriia kain rarikim, n tibwaua te reirei ae koaua ma ngaia, ao ni kaoia bwa a na atatai riki.
Kakao
Reiakinna n taainako. Tarai aanga aika a na karababaa riki am iango ao am konabwai. Aanga aikai a kona n reita reirei aika riai ke kataneiai ni mwakuri n aron naba te reiakinaki man bwaai n ibuobuoki ake ko onimakin. Kairekerekea te Uea inanon am kekeiaki, ao E na kairiko.
Kamatebwaian koaua n tamnei Ngkana ko reiakina taekan te aonaaba ni katobibiko, reiakina naba taekan te Tia Kamaiu, are e karika te aonaaba. Kamatebwaia Maiuna ao ana reirei. Karaoa te tieminari, intituute, ao kamatebwaia te euangkerio i bon iroum bwa mwakoron reiakinam inanon maium. E kona ni katauraoiko ni karaoan te mwakuri ni mitinare ao n tibwa te euangkerio rinanon maium.
Maiuakina te raoiroi Kona tai iraa, babakanikawai, ke ni kewe n aro nako—n te reirei, n te mwakuri, iaon te rain, n tabo nako. Riiki n aron te tia ririmwia Iesu Kristo ae kakaonimaki i mataia aomata ao ae n ti ngkoe iai.
Berita Aika Beritanaki
E karikirakea am atatai ni beku te reirei ibukin te Uea, n raonaki ma te mitinare. E anganiko bwa ko na kona ni kakabwaia tabeman, riki am utu. Mwaitin are ko reiakinna, mwaitin riki are ko kona ni buoka katean abanuean te Atua ao n anaa nanon te aonaaba ibukin te raoiroi.
Ni koauana e uota te rau ao te ika-rinerine. Ngkana a boraoi am taeka ao am mwakuri ma te koaua, ko kaotia bwa ko kona n onimakinaki—irouia tabeman aomata ao iroun te Uea.
Ngkana ko tei rake ibukin ana reirei Iesu Kristo, E tei ma ngkoe. Iesu Kristo bon korakoram. Tabeman a na aki boraoi ma ngkoe, ma e na nooraki ninikoriam ao onimakinam. Tao tabeman a na ira ke n aki ira am katooto, am kakoaua, nanomatoam, ao e na rikirake onimakinan Kristo.
Titiraki ao Kaekaaia
E bure ngkana iai am titiraki iaon te Ekaretia? N na kanga ni kunea kaekaaia? Karekean te titiraki bon tiaki kanikinaean te mamaara ke aki taun te onimaki. Ni koauana, titirakinan taian titiraki e kona ni buoka karikirakean te onimaki. Kaokan te euangkerio e moanaki ngke e titiraki ma te onimaki Iotebwa Timiti ae 14 ana ririki. Ukorii kaekaaia inanon koroboki aika tabu, n aia taeka ana burabeti te Atua, mairouia am taan kairiiri ao kain am utu aika kakaonimaki, ao bon mairoun te Atua. Ngkana akea te kaeka ae roko n te tai naba anne, kakoaua are ko na reiakinna teutana imwin teutana. Teimatoa bwa tera ae ko maiuakinna are ko a kaman ataia, ao teimatoa ukori koaua.
N na kanga n tei rake ibukin te bwai ae eti n aki kauniia koraki ake a kaokoro aia onimaki? Moanna man karaoan raoi am taeka bwa ana mwakuri man kaunganano man ana tangira te Atua ao Natina. Tibwauan te euangkerio e riai n aki karaoaki n tamnei n te kakauntaeka ma e na mataata, nanorinano, ao akoakoi. Ko kona n riki n tatangira nakoia tabeman engae ngkana ko aki boraoi ma aia iango. Ko na riki bwa te banna ni katoto iroun te tia iriira Iesu Kristo man arom ni maeka.
Taraa Mataio 5:14–16 (kaotanako otami); Ioane 14:6 (Iesu bon te koaua); 1 Betero 3:15 (bwaina te tatauraoi n tainako n tibwa am kantaninga iroun Kristo); Reirei ao Berita aika Tabu 88:77–80 (bwaai aika e tangiriira te Uea bwa ti na atai); 88:118 (ukoukora te ataibwai man te boki ae tamaroa); 93:36 (mimitongin te Atua bon te wanawana); 124:15 (te tamaroa nanona tangiran te bwai ae eti); 130:18 (te rabakau are ti karekea n te maiu aei, e na iri ma ngaira n te mangauti).
Titiraki ibukin Kariaia Nakon te Tembora
-
Ko kekeiaki bwa ko na kokoaua ni bwaai ni kabane aika ko karaoi?
-
Ko boutokai ao ni kaungai taian reirei, mwakuri, ke koaua aika a kaitara ma ake n ana Ekaretia Iesu Kristo ibukiia Aika Itiaki ni Boong aika Kaitira?