Ko kakabwaiaaki man kiingin te nakoanibonga ao n te kariaia

Ni kabane kiingin te nakoanibonga ao kariaiakaki a roko rinanon Iesu Kristo. Ni kabane ake a taua te nakoanibonga a kona ni katanea rikaaki kariaiakaia nakon Iesu Kristo. Bon te Tia Kamaiu ae e baireia bwa antai ae na karekea te kariaiakaki aio ao antai ae e na karekei kiing n te nakoanibonga. Ti onimakina Wanawanana ae kororaoi.

E a tia Iesu Kristo ni kaoka Ana nakoanibonga i nanon ara bong. E kairia bwa e na kanga ni kabonganaaki te nakoanibonga. Atam, Mote, Betero, ao burabeti riki ake tabeman rinanon rongorongo aika tauaki mwiia a karekei kiing n te nakoanibonga. N ara bong, e karekei kiingin te nakoanibonga Iotebwa Timiti mairoun Ioane te Tia Bwabetito, Betero, Mote, Eriati, Eria, ao tabeman riki. Kaain te Moan Beretitentii ao te Kooram n Abotoro n te Tengaun ma Uoman a taui ni kabane kiingin te nakoanibonga i aon te aonaaba ni boong aikai. Taan kairiiri n te nakoanibonga n te tabo ao beretitenti ni kooram a taui naba kiingin te nakoanibonga ni kaineti ma nakoaia. Kiingin te Nakoanibonga a tararuaa ana mwakuri te Atua. A anga te kariaia ao n anga te mwaaka nakoia mwaane ao aine ni buoka waakin te mwakuri anne.

Kariaia n te nakoanibonga a kakabwaiaia natin te Atua ni kabane. Ibukina bwa e a manga kaokaki te nakoanibonga, ko kona ni karekei otenanti ao ni karaoi berita aika tabu ma te Atua. Ko kona ni mwakuri n aran te Atua ngkana ko karekei katabeakim ke wewete mairoun temanna are iai te kariaia irouna.

Butimwaai wewete n te Ekaretia ao beeku ma te kakaonimaki. Ngkana ko karekea te wewete man te Ekaretia, ko kaokoroaki man te kariaiakaki mairoun te Atua bwa ko na beku n te mwakuri anne. Ko kona naba ni karekea kairakim mairoun te Atua ibukin te mwakuri ae ko karaoia. Ngkai ko beku, ko bon tei ibukin Iesu Kristo. Anganna am kabanea n tamaroa.

Kamatoaia naake e weteia te Atua bwa a na beku. Te kamatoa e nano riki nanona nakon ae ti katean baim ngkana e warekaki te ara n tain bootakin te Ekaretia. E nanonaki bwa ko na boutoka ao ni ibuobuoki. Kakaei kawai ni kaotia bwa ko kamatoaiia aomata ake e weteiia Iesu Kristo ni beku n Ana Ekaretia.

Kakoroa nanon mwiokoam mairouia am tia kairiiri n te Ekaretia—ni ikotaki ma are mairoun am beretitentii n te kooram ke kiraati. Iai irouia te kariaiakaki mairoun te Atua, ike a anganiko iai te mwiokoaki ibukin te katabeaki anne. Tao ko na karekea katabeam ni karaoa te mwakuri n ibuobuoki nakon temanna, butimwaiia aomata ngkana a roko nakon te bootaki n toa, ke ibuobuoki n tain waaki ni kakukurei. Bwa tao tera mwiokoam, karikia bwa te tai n riki bwa te tia iriira Iesu Kristo ao ni beku ibukiia natin te Atua.

Ko kona n onimakinna ae te otenanti are ko karekea a bon kariaiakaki iroun Iesu Kristo. Aio teuana te bwai are e karika Ana Ekaretia Iesu Kristo n rangi n onoti. Rinanon otenanti n te nakoanibonga, e kaotaki raoi mwaakan te Atua.

Ko na riki bwa te bwai ni mwakuri ni bain te Uea. Ngkai ko beku ibukin te Uea man Ana kariaia ao iaan ana kairiiri Ana toro are e taui kingin te nakoanibonga, E na buokiko n ataia bwa ko na kanga ni buokiia tabeman i nanon Ana mwakuri. Iesu Kristo bon korakoram. Am ibuobuoki e na buokiko ni kaan riki Nakoina ao n uota te kimwareirei nakoim.