E kan reitaki te Atua ma ngkoe

E kairiko te Tamnei nakon Tamara are i Karawa ao Iesu Kristo. Aio bon mwiokoan te Tamnei ae Raoiroi ae kakawaki. E na kaira naba nanom nakon te rairannano ao n iriira Iesu Kristo bwa ko aonga ni karekei kakabwaia man Ana Mwakuri ni Kamaiu. Ngkai ko rairannanom, e na kaitiakiko te Tamnei ao ni buokiko ni bitaki.

E taetae te Tamnei are Raoiroi nakon am iango ao nanom. A kona n roko rongorongo mairoun te Tamnei nakon am iango ni kawai aika mwaiti—rinanon iango aika kaunga te nano, kauring, te mataata ae itiaki, ao ururing n tamnei. E kona te Tamnei ae Raoiroi n taetae nako nanom rinanon namakin aika kaungako n aron te mweraoi, te onimaki, te rau, tangira, kimwareirei, nanorinano, kakaitau, ao taotaonaki n nano.

“Karekea te Tamnei ae Raoiroi.” Taeka aikai a taekinaki ngkana ko kamatoaaki bwa kaain ana Ekaretia Kristo. Ko kanga ni karekea te Tamnei ae Raoiroi? Man te ongotaeka nakon ana reirei Iesu Kristo. Ngaia bon korakoram. Iriirakin Kristo e kaoa te Tamnei ae Raoiroi nako nanon maium.

Ukora Tamam are i Karawa n te tataro. Bunra nanom Nakoina. Kaitaua ibukin kakabwaia aika mwaiti aika tamaroa ake E a tia n anganiko. Tibwaia ma Ngaia kimwareireim, tabeaiangam, ao am titiraki. Kainabwaabu ao ongoraa nakon Ana kaeka, are e kona n roko n te namakin ae rau, iango n am iango, ke namakin ni bwaai ae ko na karaoi.

Ongo bwanaan te Atua i nanon koroboki aika tabu. Booki aika tabu bon ana taeka te Atua nakoim! Reirei mai iai ni katoa bong ni kunea Bwanaana ao namakina Ana tangira. Ngkai ko wareware, iangoia bwa tera ae E kona n reireiniko, ao korei namakin ake a roko nakoim. Karikia bwa anuam ni kamatebwaii koroboki aika tabu ni katoa bong—riki Ana Boki Moomon—rinanon nako maium.

Mwakuri iaon namakin n tamnei ake ko karekei. Ngkana e roko n am iango ke am namakin bwa ko na karaoa te mwakuri n akoi are e na buoka temanna, karaoia! Bwaai ni kabane aika tamaroa a roko mairoun te Atua. Kaotia nakon Tamam are i Karawa bwa E kona n onimakiniko ni karaoan nanon te namakin are e roko mai Irouna.

E na anganiko te rau ao n kairiko te Tamnei ae Raoiroi. E kinaaki bwa bon te Tia Karaunano. E na buokiko i nanon am tai ni kataaki. E na buokiko n ataia bwa tera ae ko na taekinna ke ni karaoia. Man Ana kairoro, ko kona n ata te kaokoro imarenan ae tera ae e koaua ao tera ae e kairua. E kona ni buokiko n nora te tamaroa irouia tabeman ao i bon iroum. E kona naba te Tamnei ni kauringko ibukin taian kangaanga. E na kairiko nakon Iesu Kristo ao ni kararoako man te bure.

Ko kona ni karekei bwaintangira n tamnei. A mwaiti bwaintangira ae e angaanga te Atua nakoia Natina rinanon Tamneina. Tabeua ake a mwaneweaki ni boki aika tabu a raonaki ma te kaotioti, kakoaua iroun Iesu Kristo, atakin ae raoiroi ibukin temanna, ao te wanawana. Tataro ni butiia Tamara are i Karawa ibukin bwaintangira n tamnei are E a tia n anganiko, ko na kanga ni karikirakei, ao tera Nanona ibukim ni kabonganai ni kakabwaiaia aomata tabeman.