Rongorongo man te Moan Beretitentii

Ti tangiri ngkami ao iai onimakinakimi iroura. Kam bon mena ni koaua ibuakoia tamnei ake a rineaki iroun Tamara are i Karawa, a kanakoaki nako aon te aba n te tai aei ni karaoi bwaai aika a kakawaki.

Kam korakora ao n rangi ni konabwai nakon ae kam ataia. Ao ngkana kam onimakina te Tia Kamaiu, e na rikirake riki korakorami. Bon Ngaia “korakoraia kairake.”

Te kairi aei e na buoki ngkami ni katea aami ae matoa ibukin karaoan rinerine n tiku iaon te kawai are e kairi nakon te maiu ae akea tokina. E na buoki ngkami ni katauraoi ngkami ni karaoi berita aika tabu inanon te tembora, katauraoi ni beku n te mition, ao ni kunea te kimwareirei n iriira Iesu Kristo rinanon maiumi. Iai nnemi ae moan te kakawaki inanon Ana Ekaretia. E na buoki ngkami Iesu Kristo ni kakoroa nanon Ana kantaninga ibukimi.

Ti ataia ae maiu te Atua. Bon ara tataro bwa kam na tiku ni matoa iaon kawain te berita ae tabu—te kawai ni karaoan ao kawakinan berita aika tabu ma te Atua. Aio te kawai are e kairi ngkami rikaaki nakon Tamami are i Karawa. Ngkai kam karaoa aei, kam na riki bwa bwaai n anainano ibukin te raoiroi, tibwaua kakukurein te euangkerio, ni ikotiia natin te Atua, ao ni katauraoa te aonaaba ibukin kauaokin te Tia Kamaiu. Uringnga: Iesu Kristo bon korakorami!