Si Jesukristo nagdala og kalipay

Ang imong katuyoan mao aron makabaton og kalipay ug kamaya. Kana ang katuyoan sa imong kinabuhi. Kini ang katuyoan sa plano sa Langitnong Amahan alang sa kalipay. Wala kini magpasabot nga ikaw dili gayod maguol o walay lisod nga mga panahon. Apan kini nagpasabot nga ang Manluluwas makatabang nimo nga makasugakod sa lisod nga mga panahon ug makakaplag og kamaya.

Ang kamaya dili magagikan sa imong mga kahimtang; magagikan kini sa pagsunod ni Jesukristo. Tingali ikaw adunay bati nga adlaw, bati nga semana, o bati nga tuig. Apan ang kamaya dili ang pagkawalay kaguol sa imong kinabuhi; kini ang pagkaanaa ni Kristo sa imong kinabuhi.

Ang kamaya sa Manluluwas mas mahinungdanon ug mas molungtad kaysa bisan unsang butang. Si Satanas motental nimo sa pagtinguha sa kalingawan ug katagbawan sa hinakog nga mga paagi o gikan sa kalibotanong kalipay. Ang bisan unsang butang nga supak ni Jesukristo ug sa Iyang mga sugo dili makahatag kanimo og tinuod, malungtarong kamaya ug kalipay. Hinumdomi nga ang mga butang dinhi sa yuta temporaryo lang. Ang ebanghelyo ni Jesukristo nagtanyag og kamaya ug kalipay nga lawom, balaan, ug walay kataposan.

Pilia ang kamaya. Bisan tinuod nga adunay kagul-anan ug kalisdanan dinhi sa kalibotan, ang Langitnong Amahan mipuno usab sa kalibotan og daghang matahom, maayo nga mga butang. Tinguhaa kini. Sulayi ang pagmatikod sa mga rason nga magmaya matag adlaw—gani isulat kini. Kini mga gasa gikan sa imong mahigugmaong Amahan sa Langit.

Pagdala og kamaya ug kalipay ngadto sa uban. Si Jesukristo nakakaplag og hingpit nga kamaya diha sa pagdala nato og kamaya. Ikaw makasunod sa Iyang ehemplo pinaagi sa pagkaplag og kamaya ug kalipay diha sa pagserbisyo sa uban. Motabang sa usa ka tawo nga mobati nga gihigugma. Paghatag og sinsero nga komplimento. Moawhag sa usa ka tawo nga nanglimbasog. Kon ikaw mibati nga nagkinahanglan og dugang nga kamaya sa imong kinabuhi, sulayi ang pagdala og kamaya ngadto sa laing tawo.

Magmalipayon sa pagsimba sa Ginoo. Kon moadto ka sa simbahan, tutoki ang kamaya nga gihatag ni Jesukristo kanimo, ug dayga Siya alang niana! Buhata ang imong bahin nga makatampo ngadto sa malipayong espiritu diha sa inyong mga panagtigom sa Simbahan. Himoa ang sagrado nga musika nga kabahin sa imong pagsimba diha sa panimalay ug sa simbahan.

Mahimo ka nga mobati og kamaya bisan kon lisod ang kinabuhi. Tingali maghunahuna ka kon usaon nga kini posible, apan tinuod kini. Ang imong pagtuo diha ni Jesukristo, ang Iyang makaayo nga gahom, ug ang Iyang mahangtorong mga saad makahatag nimo og makanunayong kamaya. Ang Iyang kamaya motabon sa kasubo ug maghatag og kalinaw nga labaw pa sa tanang panabot.

Ang hingpit nga kamaya naghulat nimo didto sa celestial nga gingharian sa Dios. Si Jesukristo mibuntog sa tanang butang nga makapugong nimo sa pagdawat sa mahangtorong kamaya. Kon ikaw mosalig Kaniya ug mosunod Kaniya, kini nga kamaya maangkon nimo.