Feast Upon the Word [Magpakabusog sa Pulong], ni Liz Lemon Swindle. Sa Maayong Kabubut-on sa Havenlight

Ang kamatuoran mohimo kanimo nga gawasnon

Juan 8:32

Ang imong Langitnong Amahan mao ang Dios sa kamatuoran. Siya nasayod sa tanan. Ang tanan nga kamatuoran naggikan Kaniya ug paingon ngadto Kaniya. Imong mapakita nga gihatagan nimo og bili ang kamatuoran kon ikaw magtinguha sa pagkat-on, magpakabuhi uban sa kaligdong, ug maisogon nga mobarog sa unsay imong nahibaloan nga husto—bisan kon kinahanglan nga mobarog nga mag-inusara.

Mahangtoron nga mga Kamatuoran

Ang Langitnong Amahan gusto nga ang Iyang mga anak nga babaye ug mga anak nga lalaki kanunayng makakat-on. Ikaw adunay temporal ug espirituwal nga mga rason nga magtinguha ug gusto nga magkat-on. Ang edukasyon dili lang mahitungod sa pagpangita og kwarta. Kini kabahin sa imong mahangtoron nga tumong nga mas mahisama sa Langitnong Amahan.

Ang pagpuyo nga adunay kaligdong nagpasabot nga ikaw ganahan sa unsay husto sa panan-aw sa Dios—labaw pa kaysa imong ganahan nga personal nga kaharuhay, popularidad, o kasayon. Nagpasabot kini sa pagbuhat sa unsay matarong tungod lang kay kini husto.

Ikaw adunay butang nga bililhon nga ikapakigbahin. Ang ebanghelyo ni Jesukristo aduna sa mga tubag sa mga pangutana sa kinabuhi. Mao kini ang dalan ngadto sa kalinaw ug kalipay. Tingali wala ka kahibalo sa tanang butang, apan ikaw adunay igong kahibalo sa paghigugma sa imong silingan, sa pagpakigbahin sa tinuod nga mga baroganan ngadto nila, ug sa pagdapit nila sa pagkat-on og dugang.

Mga Imbitasyon

Kanunay nga magkat-on. Pangita og mga oportunidad sa pagpalapad sa imong hunahuna ug sa imong mga kahanas. Kini nga mga oportunidad naglakip sa pormal nga edukasyon sa eskwelahan o sa bokasyonal nga pagbansay, ingon man sa dili pormal nga pagkat-on gikan sa mga tinubdan nga imong kasaligan. Ilakip ang Ginoo diha sa imong mga paningkamot, ug Siya mogiya kanimo.

Magkat-on sa espirituwal nga mga kamatuoran. Samtang nagkat-on ka mahitungod sa kalibotan sa imong palibot, kat-oni usab ang mahitungod sa Manluluwas, kinsa milalang sa kalibotan. Tun-i ang Iyang kinabuhi ug mga pagtulun-an. Himoa ang seminary, institute, ug ang personal nga pagtuon sa ebanghelyo nga kabahin sa imong tibuok kinabuhi nga pagkat-on. Kini makaandam kanimo sa pagserbisyo og misyon ug sa pagpakigbahin sa ebanghelyo sa tibuok nimong kinabuhi.

Pagpakabuhi nga adunay kaligdong. Ayaw pangawat, pamakak, panikas, o panglingla sa bisan unsag paagi—diha sa eskwelahan, sa trabahoan, sa online, bisan asa. Pagpabilin nga mao gihapon nga matinud-anon nga sumusunod ni Jesukristo diha sa publiko ug sa pribado.

mga tawo nga nagluhod sa atubangan sa nabanhaw nga si Jesukristo

Gisaad nga mga Panalangin

Ang edukasyon makapalambo sa imong abilidad sa pagserbisyo sa Ginoo, lakip na isip usa ka misyonaryo. Kini mohatag kanimo og gahom sa pagpanalangin sa uban, ilabi na sa imong pamilya. Kon magkadaghaan ang imong makat-onan, mas makatabang ka sa pagpalig-on sa gingharian sa Dios ug makaimpluwensiya sa kalibotan alang sa maayo.

Ang pagkamatinuoron makahatag og kalinaw ug pagtahod sa kaugalingon. Kon ang imong mga pulong ug mga aksiyon nagsubay sa kamatuoran, imong gipakita nga ikaw masaligan sa ubang mga tawo ug sa Ginoo.

Kon ikaw mobarog alang sa mga pagtulun-an ni Jesukristo, Siya mobarog uban kanimo. Si Jesukristo mao ang imong kalig-on! Ang uban mahimong dili mouyon sa imong mga gituohan, apan ang imong kaisog ug sinseridad mabantayan. Mosunod man o dili ang uban sa imong ehemplo, ang imong pagpamatuod, kamasaligon, ug pagtuo diha ni Kristo molambo.

Mga Pangutana ug mga Tubag

Sayop ba ang pagbaton og mga pangutana mahitungod sa Simbahan? Unsaon nako sa pagpangita og mga tubag? Ang pagbaton og mga pangutana dili usa ka timailhan sa kahuyang o kulang sa pagtuo. Gani, ang pagpangutana makatabang sa pagpalig-on sa pagtuo. Ang Pagpahiuli sa ebanghelyo misugod sa dihang ang 14 anyos nga si Joseph Smith nangutana inubanan sa pagtuo. Pangitaa ang mga tubag diha sa mga kasulatan, diha sa mga pulong sa mga propeta sa Dios, gikan sa imong mga lider ug sa matinud-anong sakop sa pamilya, ug gikan sa Dios Mismo. Kon ang mga tubag dili moabot dihadiha dayon, salig nga ikaw makakat-on og pagtulun-an human sa laing pagtulun-an. Ipadayon ang pagsunod sa unsay imo nang nahibaloan, ug ipadayon ang pagpangita sa kamatuoran.

Unsaon nako sa pagbarog alang sa unsay husto nga dili makasilo niadtong kinsa adunay lahi og tinuohan? Pagsugod pinaagi sa pagsiguro nga ang imong mga pulong ug mga aksiyon dinasig sa gugma alang sa Dios ug sa Iyang mga anak. Ang pagpaambit sa ebanghelyo kinahanglang dili himoon diha sa usa ka diwa sa panagbingkil apan hinoon adunay katin-awan, kaaghop, ug kamabination. Mahimo kita nga magmahigugmaon ngadto sa uban bisan kon kamo dili mouyon sa ilang mga panglantaw. Magmahimong maayong ehemplo nga sumusunod ni Jesukristo sa paagi sa imong pagpakabuhi.

Tan-awa sa Mateo 5:14–16 (ipadan-ag ang inyong kahayag); Juan 14:6 (si Jesus mao ang kamatuoran); 1 Pedro 3:15 (mangandam kanunay sa pagpakigbahin sa inyong paglaom diha ni Kristo); Doktrina ug mga Pakigsaad 88:77–80 (mga butang nga gusto sa Ginoo nga atong makat-onan); 88:118 (tinguhaa ang kaalam gikan sa labing maayo nga mga basahon); 93:36 (ang himaya sa Dios mao ang salabotan); 124:15 (ang kaligdong nagpasabot og paghigugma sa unsay matarong); 130:18 (ang atong salabotan madala uban kanato kon kita mabanhaw).

Mga Pangutana sa Rekomend sa Templo

Ikaw ba naningkamot nga magmatinuoron sa tanan nimong gibuhat?
Ikaw ba nagsuporta o nag-awhag og bisan unsa nga mga pagtulun-an, mga binuhatan, o doktrina nga nahisupak niadtong gidawat sa Ang Simbahan ni Jesukristo sa mga Santos sa Ulahing mga Adlaw?