Ikaw makatabang sa buhat sa Dios

Ang buhat ug ang himaya sa Dios mao ang pagpahinabo sa imong pagka-imortal ug sa kinabuhing dayon. Ang pagka-imortal mao ang pagpuyo sa kahangtoran uban sa nabanhaw nga lawas. Ang kinabuhing dayon, o kahimayaan, mao ang pagkahimong sama sa Dios ug pagpuyo uban Kaniya sa kahangtoran isip mga pamilya. Kining tanan posible tungod ni Jesukristo ug sa Iyang Pag-ula. Kamo makasalig Kaniya.

Ikaw makatabang sa buhat sa Dios pinaagi sa pagduol ngadto ni Kristo ug sa pagtabang sa uban sa pagbuhat sa ingon. Bisan kanus-a nga ikaw maghimo sa bisan unsa nga butang sa pagtabang sa usa ka tawo nga mosunod ni Jesukristo, ikaw nagtabang sa buhat sa Dios.

Mosunod sa ebanghelyo. Lig-ona ang imong pagtuo diha ni Jesukristo. Maghinulsol matag adlaw. Modawat sa mga ordinansa sa pagkapari sa Dios ug motuman sa imong mga pakigsaad. Himoa kana nga sumbanan sa tibuok nimong kinabuhi.

Moatiman niadtong nanginahanglan. Mangita og mga paagi sa pagserbisyo ug sa pagpangalagad sa uban, lakip na sa imong pamilya, ug mga higala, ug sa imong komunidad. Usa ka maayong paagi sa pagtabang sa mga tawo nga nanginahanglan mao ang pagsunod sa balaod sa puasa ug paghatag sa mga halad sa puasa.

Pagdapit sa tanan nga modawat sa ebanghelyo. Tugoti nga ang imong mga pulong ug mga binuhatan nagpakita sa imong pagtuo diha ni Jesukristo. Mangandam sa pagsulti ni bisan kinsa nga mangutana nimo mahitungod sa paglaom ug kalipay nga imong gibati isip Iyang disipulo. Alang sa mga batan-ong lalaki, ang pagserbisyo og full-time nga misyon usa ka responsibilidad sa pagkapari. Alang sa mga batan-ong babaye, usa kini ka gamhanang oportunidad; mag-ampo aron masayod kon ang Ginoo gusto ba nga ikaw moserbisyo. Mangandam sa pagpakigbahin sa ebanghelyo sa tibuok nimong kinabuhi.

Mohiusa sa mga pamilya alang sa kahangtoran pinaagi sa paghimo sa family history ug buhat sa templo. Magkat-on mahitungod sa imong mga katigulangan. Mangita kon kinsa ang nanginahanglan sa mga ordinansa sa templo. Moadto sa templo kanunay kutob sa imong mahimo aron magpabunyag ug magpakompirma alang nila. Kon gusto mo nga motabang, adto sa FamilySearch.org.

Tabangan ka sa Dios. Ang Langitnong Amahan wala magpaabot nga imong himoon kini nga buhat nga ikaw ra. Siya mag-uban nimo. Kon ikaw mapaubsanong mohatag sa imong panahon ug kasingkasing, Siya mohimo og nindot nga mga butang pinaagi kanimo. Si Jesukristo mao ang imong kalig-on!

Ikaw mapuno sa kalipay. Ang buhat sa Dios usa ka makalipay nga buhat! Samtang moapil ka niini, bation nimo ang kalipay nga Iyang gibati. Hunahunaa ang kalipay nga imong ipakigbahin sa Langitnong Amahan ug sa Iyang mga anak nga imong gitabangan nga madala ngadto Kaniya!