Ang imong lawas sagrado

Ang imong lawas sama sa panagway sa Dios—ang labing mahimayaon, halangdon nga Binuhat sa uniberso. Ang mga kasulatan nagtandi sa atong mga lawas ngadto sa usa ka balaan nga templo, usa ka dapit diin makapuyo ang Espiritu. Siyempre, ang imong lawas dili pa hingpit karon. Apan ang mga kasinatian nimo nga nasinati sa imong lawas makatabang nimo nga maandam nga usa ka adlaw makadawat og usa ka hingpit, nabanhaw, mahimayaon nga lawas.

Ang imong kalag naglangkob sa imong lawas ug sa imong espiritu. Tungod niini nga rason, konektado kaayo ang pisikal nga kahimsog ug ang espirituwal nga kahimsog. Ang Manluluwas mipadayag sa Pulong sa Kaalam aron sa pagtudlo sa mga baroganan sa pag-atiman sa imong lawas ug sa pagsaad og pisikal ug espirituwal nga mga panalangin.

Ang sekswal nga mga pagbati importante nga bahin sa plano sa Dios aron sa pagmugna og malipayon nga mga kaminyoon ug mahangtoron nga mga pamilya. Kini nga mga pagbati dili pagpakasala—kini sagrado. Tungod kay ang sekswal nga mga pagbati sagrado kaayo ug gamhanan kaayo, ang Dios mihatag kanimo sa Iyang balaod sa kaputli sa pag-andam nimo nga gamiton kini nga mga pagbati sa Iyang mga katuyoan. Ang balaod sa kaputli nagpahayag nga ang Dios nagtugot sa sekswal nga kalihokan tali lamang sa usa ka lalaki ug usa ka babaye kinsa minyo. Daghan sa mga tawo ang nagbaliwala o gani nagbugalbugal sa balaod sa Dios, apan ang Ginoo nagdapit kanato nga mahimong Iyang mga disipulo ug mosunod sa mas taas nga sumbanan.

Itratar ang imong lawas—ug ang mga lawas sa ubang tawo—uban sa pagrespeto. Samtang mohimo ka og mga desisyon mahitungod sa imong sininaan, estilo sa buhok, ug panagway, pangutan-a ang imong kaugalingon, “Gitahod ba nako ang akong lawas isip usa ka sagrado nga gasa gikan sa Dios?” Gusto sa Langitnong Amahan nga makita nato ang usag usa kon kinsa gayod kita: dili lang sa pisikal nga mga lawas apan Iyang hinigugmang mga anak nga adunay balaanon nga padulngan. Likayi ang mga estilo nga mopakita o maghatag og dili tukma nga atensiyon sa imong pisikal nga lawas imbes sa kon kinsa ka isip usa ka anak sa Dios nga adunay mahangtoron nga kaugmaon. Himoa nga ang moral nga kalimpyo ug ang gugma alang sa Dios ang mogiya sa imong mga pagpili. Pagtinguha og tambag gikan sa imong pamilya.

Buhata ang mga butang nga makapalig-on sa imong lawas, dili ang mga butang nga makapasakit o makadaot niini. Tagamtama uban sa pagpasalamat ang daghang maayo nga mga butang nga gihatag sa Dios. Hinumdomi nga ang ilimnon nga makahubog, tabako, kape, tsa, ug ubang makadaot nga mga droga ug mga sangkap dili alang sa imong lawas o sa imong espiritu. Bisan ang makatabang nga mga sangkap, sama sa gireseta nga mga droga, mahimong makadaot kon dili gamiton sa hustong paagi.

Ipabiling sagrado ang pakighilawas ug ang sekswal nga mga pagbati. Kinahanglan nga dili kini mao ang hilisgotan sa mga pakatawa o lingaw-lingaw. Gawas sa kaminyoon tali sa usa ka lalaki ug usa ka babaye, sayop ang paghikap sa pribado, sagrado nga mga bahin sa lawas sa laing tawo, bisan pa kon nagsinina. Sa imong mga pagpili mahitungod kon unsa ang imong buhaton, tan-awon, basahon, paminawon, hunahunaon, i-post, o i-text, likayi ang bisan unsang tinuyo nga makapaaghat og mahigalon nga mga emosyon diha sa uban o sa imong kaugalingon. Kini naglakip sa pornograpiya sa bisan unsang matang. Kon imong makita nga ang mga sitwasyon o mga kalihokan mas makapakusog sa mga tentasyon, likayi kini. Nahibalo ka kon unsa kini nga mga sitwasyon ug mga kalihokan. Ug kon dili ka segurado, ang Espiritu, ang imong pamilya, ug ang imong mga lider makatabang kanimo nga mahibalo. Ipakita sa imong Amahan sa Langit nga ikaw nagpasidungog ug nagtahod sa sagrado nga gahom sa pagmugna og kinabuhi.

Ang imong pagtahod sa imong kaugalingon ug sa uban molambo kon ikaw nagtahod sa imong lawas pinaagi sa imong kinaiya, panagway, ug sininaan.

Ang Ginoo misaad og dakong mga bahandi sa kahibalo ngadto niadtong kinsa motuman sa Pulong sa Kaalam. Ang usa ka himsog nga lawas, nga gawasnon gikan sa pagkaadik, mopalambo usab sa imong abilidad sa pagdawat og personal nga pagpadayag, klaro nga paghunahuna, ug pagserbisyo sa Ginoo.

Ang pagsunod sa balaod sa kaputli magdala sa pag-uyon sa Dios ug personal nga espirituwal nga gahom. Kini manalipod kanimo ug sa imong umaabot nga pamilya. Kon ikaw maminyo, kini nga balaod magdala og mas dako nga gugma, pagsalig, ug paghiusa sa imong kaminyoon. Ang pagsunod niini nga balaod mohimong posible nga ikaw mouswag sa kahangtoran ug mahimong mas sama sa imong Langitnong Amahan. Ang imong pagsalig molambo kon ikaw magpakabuhi isip usa ka disipulo ni Jesukristo.