Paghimo og dinasig nga mga pagpili

Diha sa Alang sa Kalig-on sa mga Kabatan-onan, imong makit-an ang mga pagtulun-an ni Jesukristo ug sa Iyang mga propeta. Gamit niining mga kamatuoran isip imong giya, ikaw makahimo og dinasig nga mga pagpili nga mopanalangin kanimo karon ug sa tibuok kahangtoran.

Ikaw minahal nga espiritu nga anak sa Dios. Ang iyang mahinungdanon nga plano sa kalipay nakapahimo niining posible alang kanimo aron motubo sa espirituhanong paagi ug molambo ang imong balaanong potensiyal. Gipadala Niya si Jesukristo nga mamahimo nga imong Manluluwas.

Ang imong Amahan sa Langit misalig kanimo. Siya mihatag kanimo og talagsaong mga panalangin, lakip ang kahingpitan sa ebanghelyo ug ang sagradong mga ordinansa nga nagbugkos kanimo ngadto Kaniya ug gihatag ang Iyang gahom sa imong kinabuhi. Pinaagi niini nga mga pakigsaad moabot ang dugang nga kalipay ug responsibilidad. Siya nasayod nga makahimo ka og kalainan sa kalibotan, ug kana nagkinahanglan, sa daghang kahimtang, nga lahi gikan sa kalibotan. Tinguhaa ang giya sa imong Langitnong Amahan samtang naghimo ka og mga pagpili. Siya mopanalangin kanimo uban sa inspirasyon pinaagi sa Espiritu Santo.

Si Jesukristo mao ang dalan ngadto sa mahangtoron nga kalipay. Samtang mogamit ka sa imong kagawasan sa pagpili sa pagsunod ni Jesukristo, ikaw anaa sa dalan padulong ngadto sa mahangtoron nga kalipay. Himoa si Jesukristo nga imong sumbanan, ang imong lig-on nga bato nga pundasyon. Tukora ang imong kinabuhi diha sa Iyang mga pagtulun-an, ug ipahiangay ang imong mga pagpili pinaagi niini. Ang mga pakigsaad nga imong gihimo sa bunyag, atol sa sakramento, ug diha sa templo mao ang mga bloking igtutukod sa imong lig-on nga pundasyon diha ni Kristo. Mag-atubang gihapon ka og mga panlimbasog ug mga tentasyon, apan ang Langitnong Amahan ug ang Manluluwas motabang kanimo latas niining tanan.

Ang katuyoan sa Alang sa Kalig-on sa mga Kabatan-onan dili ang paghatag kanimo og “oo” o “dili” mahitungod sa matag posible nga pagpili nga lagmit nimong atubangon. Hinuon, ang Ginoo nagdapit kanimo sa pagpakabuhi diha sa mas halangdon ug mas balaan nga pamaagi—usa ka kinabuhi nga nagtutok sa mahangtorong mga kamatuoran ug sa mga gisaad sa Ginoo nga mga panalangin. Kini ang Iyang pamaagi. Kini nga giya motudlo kanimo kabahin sa Iyang pamaagi. Kini mopasabot sa mga kamatuoran nga Iyang gipadayag. Himoa kini nga mga kamatuoran nga imong giya alang sa paghimo og mga pagpili—dinagko nga mga pagpili, sama sa paghimo og mga pakigsaad diha sa templo ug pagserbisyo og misyon, ingon man sa inadlaw nga mga pagpili, sama sa unsaon pagtratar ang mga tawo o unsaon sa paggamit sa imong panahon.

Samtang ang uban makatabang kanimo, ang imong espirituhanong pagtubo personal. Kini ang imong responsibilidad. Buhata ang imong labing maayo nga molambo sa matag adlaw, motuman sa mga sugo sa Dios ug motuman sa imong mga pakigsaad, ug motabang sa uban nga mas mapaduol ngadto sa Manluluwas.

Tan-awa sa Mosiah 4:29–30 (ang mga paagi sa paghimo og sala hilabihan ka daghan, busa kita kinahanglan gayod nga magbantay sa atong kaugalingon); Helaman 5:12 (tukora ang imong pundasyon diha ni Kristo); Doktrina ug mga Pakigsaad 45:57 (dawata ang Balaang Espiritu alang sa imong giya); 25:13 (mohupot ngadto sa imong mga pakigsaad).