Ikaw gipanalanginan og mga yawe ug awtoridad sa pagkapari

Ang tanang yawe sa pagkapari nagagikan ni Jesukristo. Ang matag naghupot sa pagkapari makasubay sa iyang awtoridad balik ngadto Kaniya. Ang Manluluwas ang motino kon kinsa ang makadawat niini nga awtoridad ug kinsa ang makadawat sa mga yawe sa pagkapari. Kita nagsalig sa Iyang hingpit nga kahibalo.

Si Jesukristo mipahiuli sa Iyang pagkapari sa atong panahon. Siya ang nagdumala kon unsaon paggamit ang pagkapari. Sila si Adan, Moises, Pedro, ug daghang uban pang mga propeta sa tibuok kasaysayan nakadawat sa mga yawe sa pagkapari. Sa atong panahon, si Joseph Smith nakadawat sa mga yawe sa pagkapari gikan nila ni Juan Bautista, Pedro, Moises, Elias, Elijah, ug uban pa. Ang mga sakop sa Unang Kapangulohan ug sa Korum sa Napulog Duha ka Apostoles naghupot sa tanang yawe sa pagkapari dinhi sa yuta karon. Ang lokal nga mga lider ug ang mga presidente sa korum naghupot usab sa mga yawe sa pagkapari alang sa ilang mga calling. Ang mga yawe sa pagkapari mao ang nagdumala sa buhat sa Dios. Kini ang nagtugot ug naghatag og gahom sa kalalakin-an ug kababayen-an sa pagtabang niana nga buhat.

Ang awtoridad sa pagkapari mopanalangin sa tanang anak sa Dios. Tungod kay ang pagkapari gipahiuli, ikaw makadawat sa mga ordinansa ug makahimo og mga pakigsaad ngadto sa Dios. Ikaw makalihok sa ngalan sa Dios kon ikaw makadawat og buluhaton o calling gikan sa usa ka tawo nga adunay awtoridad.

Modawat sa mga calling sa Simbahan ug matinud-anong moserbisyo. Kon ikaw modawat og calling sa Simbahan, i-set apart ka uban sa awtoridad gikan sa Dios sa pagserbisyo niana nga tahas. Makadawat usab ka og giya gikan sa Dios alang sa imong pagserbisyo. Sa imong pagserbisyo, ikaw nagrepresentar ni Jesukristo. Ihatag Kaniya ang imong labing maayo.

Mopaluyo niadtong gitawag sa Dios sa pagserbisyo. Ang pagsuporta nagpasabot nga labaw pa kaysa pagpataas sa imong kamot kon ang ngalan basahon diha sa miting sa Simbahan. Nagpasabot kini nga mosuporta ug motabang. Pangita og mga paagi aron mapakita nga imong gipaluyohan ang mga tawo nga gitawag ni Jesukristo nga moserbisyo diha sa Iyang Simbahan.

Mobuhat sa mga buluhaton gikan sa imong mga lider sa Simbahan—lakip na gikan sa imong kapangulohan sa korum o sa klase. Sila adunay awtoridad gikan sa Dios, nga ilang idelegar nganha nimo alang niana nga buluhaton. Mahimong sangonan ka sa pagpangalagad ngadto sa usa ka tawo, sa pag-abiabi sa mga tawo sa ilang pag-abot sa panagtigom alang sa sakramento, o sa pagtabang sa kalihokan. Bisan unsa pa ang buluhaton, tan-awa kini isip usa ka oportunidad nga mahimong disipulo ni Jesukristo ug sa pagserbisyo sa mga anak sa Dios.

Makasalig ka nga ang mga ordinansa nga imong nadawat gitugotan ni Jesukristo. Mao kini ang usa sa mga butang nga nakapahimong talagsaon sa Simbahan ni Jesukristo. Pinaagi sa mga ordinansa sa pagkapari, ang gahom sa Dios mapakita.

Ikaw mahimong instrumento diha sa mga kamot sa Ginoo. Samtang magserbisyo ka sa Ginoo uban sa Iyang awtoridad ug ubos sa direksyon sa Iyang mga sulugoon nga naghupot sa mga yawe sa pagkapari, Siya motabang nimo nga mahibalo kon unsaon pagserbisyo sa uban diha sa Iyang buhat. Si Jesukristo mao ang imong kalig-on. Ang imong serbisyo makatabang nimo nga mas mapaduol ngadto Kaniya ug makahatag kanimo og kalipay.