Ang plano sa Dios alang kanimo

Ang Langitnong Amahan mao ang tigpasiugda sa plano. Siya ang Amahan sa imong espiritu, ug Siya nahigugma kanimo. Gusto Niyang ihatag kanimo ang Iyang labing mahinungdanong panalangin—mahangtorong kinabuhi uban Kaniya. Sa laing mga pulong, gusto Niya nga ikaw mas mahisama Kaniya ug magpuyo sa malipayon, mahimayaon nga kinabuhi nga Iyang gipuy-an. Siya aduna sa tanang gahom ug nasayod sa tanang butang. Makasalig ka Kaniya, bisan kon ang kinabuhi lisod.

Si Jesukristo naghimong posible sa plano. Sa wala pa gilalang ang kalibotan, ang Langitnong Amahan mipili Kaniya nga mahimo nimong Manluluwas. Si Jesukristo mao lamang ang bugtong makadala nimo og balik ngadto sa imong Amahan sa Langit. Kini ang hinungdan nga kita mopili sa pagsunod Kaniya. Ang tanang butang nag-agad niana nga pagpili!

Ang kaminyoon ug pamilya mahinungdanon sa plano sa Dios. Kabahin ka sa pamilya sa Dios, ug ang tanan Niyang espiritu nga mga anak moanhi sa yuta pinaagi sa usa ka inahan ug usa ka amahan. Gusto sa Dios nga ang Iyang mga anak nga babaye ug mga anak nga lalaki magdungan sa pag-uswag paingon ngadto sa mahangtorong kahingpitan. Ang matag usa sa mga lalaki ug mga babaye parehong makatampo ngadto sa usa ka mahigugmaon, nagkahiusa nga kaminyoon. Ang pamilya dinhi sa yuta—bisan sa tanang pagkadili hingpit niini—makahatag og dakong kalipay. Gituyo kini aron matabangan ka sa pagpangandam alang sa kinabuhing dayon uban sa Dios.

Pagbaton og mahangtorong panglantaw. Sa higayon nga mag-atubang ka og mga tentasyon, mga pagsulay, mga kasagmuyo, o lisod nga mga pagpili, pahinumdomi ang imong kaugalingon bahin sa plano sa Dios. Tan-awa kon sa unsang paagi nga ang mahangtorong mga kamatuoran nga imong nahibaloan mahitungod sa Iyang plano makatabang nimo sa pagtan-aw sa imong mga hagit sa lahi nga paagi.

Pangitaa ang impluwensya sa Dios diha sa imong kinabuhi. Bantayi ang mga paagi nga ang Dios nagpanalangin kanimo. Mahimong usa kini ka mabination nga buhat gikan sa usa ka tawo, usa ka gutlo sa kalinaw, o usa ka tubag sa pag-ampo.

Mopili sa pagsunod sa plano sa Dios. Magkat-on bahin sa unsay gusto sa imong Langitnong Amahan nga ipabuhat kanimo. Magtinguha sa Iyang giya samtang magtuon ka sa mga kasulatan, mga pulong sa buhi nga mga propeta, sa pamahayag sa pamilya, ug sa imong patriyarkal nga panalangin. Kini makatabang nimo sa pagpangandam sa pagserbisyo sa Ginoo, isip usa ka misyonaryo ug sa tibuok nimong kinabuhi. Iprayoridad ang pagserbisyo sa Ginoo, mahangtorong kaminyoon, ug pagpadako sa mga anak. Buhata ang imong bahin aron makabaton og usa ka malipayong pamilya karon pinaagi sa pagsunod sa mga pagtulun-an ni Jesukristo.

Ikaw makaatubang sa mga pagsulay sa kinabuhi uban sa kaisog ug paglaom diha ni Kristo. Tungod kay ikaw nasayod sa mahangtorong plano sa Dios, ikaw adunay mahinungdanong himan nga makatabang nimo atol sa lisod nga mga panahon. Ikaw nasayod nga adunay mas daghan pa sa kinabuhi kaysa sa unsay nahitabo tali sa pagkatawo ug pagkamatay. Ikaw nasayod kon kinsa gyod ka, unsay imong katuyoan, ug kinsa ka sa umaabot uban sa tabang sa Manluluwas. Si Jesukristo mao ang imong kalig-on!

Ikaw mahimong makadawat og kinabuhing dayon kon ikaw mosunod ni Jesukristo. Siya mohatag nimo og gahom nga mas mahisama Kaniya, makabalik ngadto sa imong langitnong mga ginikanan, ug magpuyo sa kalipay uban sa imong mga minahal sa kahangtoran. Mosalig ni Jesukristo.