Mensahe gikan sa Unang Kapangulohan

Gimahal namo kamo, ug kami adunay pagsalig kaninyo. Kamo sa tinuod naapil sa pinili nga mga espiritu sa Langitnong Amahan, gipadala sa kalibotan niining panahona aron sa pagbuhat og importanteng mga butang.

Kamo mas lig-on ug mas makahimo kay sa inyong mahunahunaan. Ug kon kamo mosalig sa Manluluwas, ang inyong kalig-on mas madugangan. Siya mao ang “kalig-on sa kabatan-onan.”

Kini nga giya motabang kaninyo sa pagtukod og lig-on nga pundasyon alang sa paghimo og mga pagpili aron magpabilin diha sa dalan paingon sa kinabuhing dayon. Kini motabang kaninyo nga maandam sa paghimo og sagrado nga mga pakigsaad diha sa templo, maandam sa pagserbisyo og misyon, ug makakaplag og hingpit nga kalipay sa pagsunod ni Jesukristo sa tibuok ninyong kinabuhi. Kamo adunay importante nga luna diha sa Iyang Simbahan. Si Jesukristo motabang ninyo nga matuman ang Iyang mga katuyoan alang ninyo.

Kami nasayod nga ang Dios buhi. Kini mao ang among pag-ampo nga kamo magpabiling lig-on diha sa dalan sa pakigsaad—ang dalan sa paghimo ug pagtuman sa mga pakigsaad uban sa Dios. Kana ang dalan pauli ngadto sa inyong Amahan sa Langit. Kon inyong buhaton, kamo mahimong usa ka impluwensya alang sa kaayohan, malipayong mopakigbahin sa ebanghelyo, mopundok sa mga anak sa Dios, ug moandam sa kalibotan alang sa ikaduhang Pag-anhi sa Manluluwas. Hinumdomi: Si Jesukristo mao ang imong kalig-on!