Ang Dios gusto nga makigsulti kanimo

Ang Espiritu mogiya nimo ngadto sa Langitnong Amahan ug ni Jesukristo. Kini ang importante nga tahas sa Espiritu Santo. Siya usab modasig nimo sa paghinulsol ug pagsunod ni Jesukristo aron makadawat ka sa mga panalangin sa Iyang Pag-ula. Kon ikaw maghinulsol, ang Espiritu moputli nimo ug motabang nimo nga mausab.

Ang Espiritu Santo mamulong sa imong hunahuna ug kasingkasing. Ang mga mensahe gikan sa Epiritu moabot sa imong hunahuna sa daghang paagi—pinaagi sa dinasig nga mga hunahuna, mga pasidaan, klaro nga panabot, ug espirituwal nga mga panumdoman. Ang Espiritu Santo mamulong nganha sa imong kasingkasing pinaagi sa makabayaw nga mga pagbati sama sa kahupay, pagsalig, kalinaw, gugma, kalipay, pagpaubos, pagpasalamat, ug pagpailob.

“Dawata ang Espiritu Santo.” Kini nga mga pulong gisulti sa dihang ikaw gikompirmahan isip miyembro sa Simbahan ni Kristo. Unsaon man nga imong madawat ang Espiriitu Santo? Pinaagi sa pagsunod sa mga pagtulun-an ni Jesukristo. Siya ang imong kalig-on. Ang pagsunod Kaniya nagdapit sa Espiritu Santo nganha sa imong kinabuhi.

Tinguhaa ang imong Langitnong Amahan diha sa pag-ampo. Ibubo ang imong kasingkasing ngadto Kaniya. Magpasalamat Kaniya alang sa daghang nindot nga mga panalangin nga Iyang gihatag kanimo. Ipakigbahin ngadto Kaniya ang imong mga kalipay, mga kabalaka, ug mga pangutana. Hunong ug paminawa ang Iyang mga tubag, nga mahimong moabot isip mga pagbati sa kalinaw, imong mga hunahuna, o mga impresyon sa pagbuhat sa usa ka butang.

Paminawa ang tingog sa Dios diha sa mga kasulatan. Ang mga kasulatan mao ang mga pulong sa Dios nganha kanimo! Pagkat-on gikan niini matag adlaw aron madiskobrehan ang Iyang tingog ug mabati ang Iyang gugma. Samtang magbasa ka, pamalandongi kon unsa kaha ang Iyang itudlo nganha kanimo, ug isulat ang mga impresyon nga moabot. Himoa kini nga mabatasan sa matag adlaw nga magtuon sa mga kasulatan—ilabi na sa Basahon ni Mormon—sa tibuok nimong kinabuhi.

Buhata ang espirituwal nga mga impresyon nga imong madawat. Kon ikaw adunay hunahuna o impresyon sa pagbuhat sa usa ka butang nga mabination nga mopanalangin sa usa ka tawo, buhata kini! Ang tanang maayong mga butang nagagikan sa Dios. Ipakita sa imong Langitnong Amahan nga Siya makasalig kanimo nga mosunod sa mga impresyon gikan Kaniya.

Ang Espiritu Santo mohupay ug mogiya kanimo. Nailhan Siya isip ang Maghuhupay. Siya mosuporta kanimo sa mga panahon sa pagsulay. Siya motabang kanimo unsay isulti o buhaton. Pinaagi sa Iyang impluwensya, makasulti ka sa kalainan tali sa unsay tinuod ug unsay dili tinuod. Siya makatabang kanimo sa pagpangita sa maayo diha sa uban ug sa imong kaugalingon. Ang Espiritu makapasidaan usab kanimo bahin sa kakuyaw. Siya mogiya kanimo paingon ni Jesukristo ug palayo sa sala.

Makadawat ka og espirituwal nga mga gasa. Adunay daghang gasa nga ihatag sa Dios sa Iyang mga anak pinaagi sa Iyang Espiritu. Ang pipila nga gihisgotan diha sa kasulatan naglakip sa pagpadayag, pagtuo diha ni Jesukristo, pagtudlo, pag-ila, ug kaalam. Pag-ampo aron mangutana sa Langitnong Amahan mahitungod sa espirituwal nga mga gasa nga iyang gihatag kanimo, unsaon nimo kini sa pagpalambo, ug unsaon nimo sa paggamit niini sumala sa Iyang gusto aron sa pagpanalangin sa uban.