Ang mga ordinansa ug mga pakigsaad sa templo maghatag kanimo og mas dakong akses ngadto sa mga panalangin sa Dios

Ang pagtuga usa ka gasa sa kahibalo ug gahom. Diha sa mga ordinansa sa pagtuga sa templo, hingpit nimong dad-on ang ngalan sa Manluluwas. Ikaw makigsaad nga mosunod sa Dios, magsakripisyo sa pagbuhat sa Iyang kabubut-on, mosunod sa ebanghelyo ni Jesukristo, mosunod sa balaod sa kaputli, ug mopahinungod—o mohalad—sa imong kinabuhi ug sa tanan nga gihatan sa Dios kanimo ngadto sa Iyang Simbahan. Mao kini ang imong mga saad. Ang Dios nagsaad sa pagpanalangin nimo og mas dakong kahibalo, proteksyon, ug akses ngadto sa Iyang gahom. Siya usab nagsaad sa paghatag nimo og kinabuhing dayon uban Kaniya. Isip kabahin sa pagtuga, ikaw makadawat og sagradong pribilihiyo sa pagsul-ob sa garment sa balaang pagkapari. Ang garment usa ka simbolo ni Jesukristo ug usa ka pahinumdom sa inyong mga pakigsaad sa templo.

Ang pagselyo sa mga magtiayon ug mga pamilya mohiusa sa mga magtiayon ug mga pamilya alang sa kahangtoran. Diha sa ordinansa sa pagselyo templo, ikaw ug ang imong kapikas maghimo og pakigsaad ngadto sa Dios ug sa usag usa. Kamo mosaad nga hingpit nga magmaunongon ngadto sa Dios ug ngadto sa usag usa, sa paghigugma ug sa pagserbisyo sa usag usa, ug sa pagtinabangay sa pagtuman sa mga balaod sa Dios. Kini ang inyong saad. Ang Dios nagsaad nga ang imong relasyon ngadto sa imong kapikas ug sa inyong mga anak molungtad sa kahangtoran. Siya usab nagsaad nga kamo makadawat sa kinatas-an nga himaya uban Kaniya didto sa celestial nga gingharian kon kamo motuman sa inyong mga pakigsaad. Kini nga panalangin gitawag og kahimayaan.

Pagbaton kanunay og rekomend sa templo. Pakigkita sa usa ka sakop sa inyong bishopric aron makadawat niini. Siya mangutana nimo og mga pangutana kon kumusta ang imong pagsunod sa mga sumbanan sa Ginoo alang sa pagsulod sa Iyang balaan nga balay. Rebyoha kanunay kini nga mga pangutana. (Makita nimo kini sa apendiks niini nga giya.) Bisan kon nagpuyo ka layo sa templo, tugoti nga ang imong rekomend mahimong simbolo sa imong gugma alang sa Ginoo ug sa imong pasalig sa pagsunod sa Iyang mga sumbanan.

Moadto sa templo kanunay kutob sa imong mahimo. Uban sa imong rekomend sa templo, makasulod ka sa balay sa Ginoo ug magpabunyag ug magpakompirma alang sa imong mga katigulangan, aron sila makadawat sa mga panalangin nga gihatag kanimo. Pahimusli ang matag oportunidad nga maanaa sa templo. Pangitaa ang Ginoo diha sa Iyang balay. Pangitaa Siya diha sa mga ordinansa, sa mga simbolo, ug sa Espiritu nga imong bation. Makaplagan nimo Siya.

Pangandam sa paghimo og mga pakigsaad diha sa balay sa Ginoo. Usa sa labing maayo nga mga paagi sa paghimo niini mao ang pagtuman sa imong pakigsaad sa bunyag. Himoa kining usa sa imong giya nga mga tumong sa pagdawat sa mga ordinansa sa templo ug mahimong tigtuman sa pakigsaad sa tibuok kinabuhi. Sugdi karon ang pagsunod sa mga balaod nga imong isaad nga sundon didto sa templo: pagkamasulundon sa mga sugo sa Dios, sakripisyo, ang ebanghelyo ni Jesukristo, kaputli, ug pagpahinungod. Ang imong pamilya, bishop, ug ubang mga lider sa Simbahan makatabang kanimo.

Ikaw mahimong mas mahisama ni Jesukristo. Siya motabang nimo nga mahimong mas maayo nga sumusunod sa pagkamatarong. Ang mga ordinansa ug mga pakigsaad sa templo motudlo kanimo kon unsaon pagsulod ngadto sa presensya sa Dios ug modawat sa kinabuhing dayon uban Kaniya.

Ikaw masangkapan sa gahom sa Dios. Ang mga pakigsaad sa templo adunay saad nga ang gahom ug himaya sa Dios ihatag kanimo. Ang Iyang mga anghel magbantay kanimo.

Ang panahon diha sa templo mas makapaduol nimo ngadto ni Jesukristo ug sa Espiritu Santo. Ikaw mobati sa kalinaw ug kapahulayan sa Dios. Madungog nimo ang Iyang tingog sa mas klaro nga paagi. Ang kalangitan moabli nganha kanimo, ug mas masabtan nimo ang Iyang mga paagi. Makabaton ka og mas dakong kalig-on sa pag-atubang sa imong mga hagit tungod kay ang imong kasingkasing konektado ngadto sa Iyang kasingkasing.