Higugmaa ang Dios, higugmaa ang imong silingan

Ang Dios nahigugma kanimo. Siya ang imong Amahan. Ang Iyang hingpit nga gugma makadasig kanimo sa paghigugma Kaniya. Kon ang imong gugma alang sa Langitnong Amahan mao ang labing importante nga impluwensya sa imong kinabuhi, daghang desisyon ang mahimong mas sayon.

Ang duha sa labing mahinungdanon sa tanang sugo mao ang paghigugma sa Dios ug ang paghigugma sa imong silingan. Ug kinsa ang imong silingan? Ang tanan! Ang tanan nga gitudlo diha sa mga kasulatan ug sa mga propeta konektado ngadto niining duha ka sugo.

Ang tanang tawo imong igsoon nga mga lalaki ug igsoon nga mga babaye—lakip, siyempre, sa mga tawo kinsa lahi kanimo o dili mouyon kanimo. Ang Langitnong Amahan gusto nga ang Iyang mga anak maghigugmaay sa usag usa. Kon moserbisyo ka sa Iyang mga anak, ikaw nagserbisyo Kaniya.

Pagpakita og gugma sa Dios pinaagi sa pagtuman sa Iyang mga sugo. Sama pananglit, pinaagi sa pagbalaan sa adlaw nga Igpapahulay, lakip sa matinud-anong pagpangandam ug pag-ambit sa sakramento, imong mapakita sa Dios nga ikaw andam nga mopahinungod sa usa ka adlaw kada semana ngadto Kaniya. Samtang ikaw magpuasa ug mobayad og mga ikapulo ug mga halad, imong gipakita sa Dios nga ang Iyang buhat mas importante kanimo kaysa materyal nga mga butang. Kon gamiton nimo ang mga ngalan sa Dios ug ni Kristo nga adunay balaang pagtahod, dili sa walay kapuslanan o kaswal nga paagi, imong gipakita nga ikaw mapasalamaton sa tanan nga Ilang gibuhat alang kanimo.

Tagda ang tanan isip anak sa Dios. Isip usa ka disipulo ni Jesukristo, mahimo ka nga mangulo sa pagtratar sa mga tawo sa tanang kaliwatan, ug mga relihiyon, ug bisan unsang grupo uban sa gugma ug pagtahod—ilabi na niadtong usahay mga biktima sa makapasakit nga mga pulong ug mga aksiyon. Tabangi kadtong tingali mibati nga nag-inusara, nahilayo, o walay mahimo. Tabangi sila nga mobati sa gugma sa Langitnong Amahan pinaagi kanimo. Ipakigbahin ngadto kanila ang mga panalangin nga Iyang gihatag kanimo, ug dapita sila nga mosunod ni Jesukristo.

Seguroha nga ang imong pinulongan nagpakita sa imong gugma sa Dios ug sa uban—nakig-istorya man ka sa personal o sa birtuwal nga paagi. Pagsulti og mga butang nga makapabayaw—dili makapabahin, makapasakit, o makapasilo, bisan og tiawtiaw. Ang imong mga pulong gamhanan. Tugoti kini nga mahimong gamhanan alang sa kaayohan.

Pagpakita og gugma ngadto sa imong pamilya. Ang paghigugma sa tanang anak sa Dios magsugod sa panimalay. Himoa ang imong bahin aron sa paghimo sa imong panimalay nga usa ka dapit diin ang tanan mobati sa gugma sa Manluluwas.

Ang imong relasyon sa Dios mapalawman samtang ikaw mopahayag sa imong gugma pinaagi sa pagsunod sa Iyang mga sugo ug pagtuman sa imong mga pakigsaad ngadto Kaniya.

Ang imong relasyon sa uban mapalawman samtang ikaw mopahayag sa imong gugma pinaagi sa Kristohanan nga pagserbisyo. Makaplagan nimo ang hingpit nga kalipay sa paghimo sa kalibotan nga usa ka mas mahigugmaon nga dapit.