Ang mga ordinansa ug mga pakigsaad naghatag nimo og akses ngadto sa mga panalangin sa Dios

Ang mga ordinansa nagtudlo nimo ngadto ni Jesukristo. Ang ordinansa usa ka sagrado nga seremonya uban sa simbolikanhong mga kahulogan nga nagtudlo mahitungod ni Jesukristo. Ang sakramento, pananglitan, dili lang pan ug tubig. Kini nagpahinumdom nato sa Manluluwas.

Ang mga pakigsaad usa ka timaan sa gugma sa Dios, pagsalig, ug mga pagdahom. Mohimo kini sa imong relasyon sa Dios ngadto sa mas lawom nga lebel. Ang paghimo og pakigsaad nagpakita nga imong gihigugma ang Dios ug mapasaligon ngadto Kaniya. Ikaw makasalig Kaniya, ug Siya makasalig kanimo. Uban nianang mas lawom nga pasalig moabot ang mas dakong akses ngadto sa Iyang gahom ug tabang samtang nagtuman ka sa imong mga pakigsaad.

Naghimo ka og mga pakigsaad ngadto sa Dios sa dihang ikaw gibunyagan ug gikompirmahan ug kon ikaw moambit sa sakramento. Sa dihang ikaw nabunyagan, nagsaad ka nga imong dad-on ang ngalan ni Jesukristo sa imong kaugalingon, moserbisyo Kaniya, ug motuman sa Iyang mga sugo sa tibuok nimong kinabuhi. Atol sa sakramento, nagsaad ka nga sa kanunay mohinumdom Kaniya. Mao kini ang imong mga saad. Kon ikaw andam nga motuman niini, ang Dios nagsaad nga ihatag kanimo ang Espiritu Santo isip kanunay nga kauban.

Tratara ang sakramento sama sa usa ka sagrado nga gasa. Ipakita ang imong pasalig ngadto ni Jesukristo pinaagi sa pag-andam alang sa sagrado nga kasinatian atol sa sakramento. Pamalandongi kon unsay imong mabuhat sa paghimo niini nga ordinansa nga usa ka espirituwal nga makadasig sa imong semana.

Pangitaa ang Manluluwas diha sa mga ordinansa. Kon ikaw motan-aw o moapil sa ordinansa, pangutan-a ang imong kaugalingon, “Unsay akong makat-onan niini mahitungod ni Jesukristo?” o “Sa unsang paagi nga kini makapaduol nako ngadto Kaniya?” Hatagi og pagtagad ang unsay gitudlo sa Espiritu kanimo.

Himoa nga ang imong mga pakigsaad mogiya sa imong mga aksiyon. Kon ikaw adunay pagpili nga himoon, hinumdomi ang imong pakigsaad nga relasyon uban sa Dios. Magmaunongon ngadto Kaniya. Pangutan-a ang imong kaugalingon: Nahisubay ba kini sa akong mga pakigsaad? Pananglitan, ako ba nahigugma ug nangalagad sa uban, naghupay sa mga tawo nga nagkinahanglan og kahupay, ug nagbarog isip usa ka saksi ni Kristo—bisan asa ug sa kanunay?

Makabaton ka og gahom sa pagbuntog sa tentasyon, sala, ug mga pagsulay sa kinabuhi. Ang paghimo ug pagtuman sa mga pakigsaad naghatag nimo og akses sa gahom sa Dios. Uban niana nga gahom, masagubang nimo ang bisan unsang butang uban sa pagsalig. Si Jesukristo mao ang imong kalig-on!

Ikaw mahimong malimpyohan ug mapasaylo. Kabahin sa saad sa Dios nganha nimo tungod sa pagtuman sa imong pakigsaad sa bunyag mao ang kapasayloan sa imong mga sala. Kana nagpasabot nga kon ikaw maghinulsol ug motuman sa imong mga saad ngadto sa Dios, Siya mopasaylo nimo ug motabang nimo nga molambo.

Mahimo nimong ikauban ang Espiritu Santo sa kanunay. Ang laing saad nga konektado sa bunyag ug sa sakramento mao ang kanunay nga pakig-uban sa Iyang Espiritu ug ang pagpangalagad sa mga anghel. Dili gayod kinahanglan nga imong atubangon ang mga hagit nga mag-inusara. Ang Dios dili gayod mobiya sa Iyang mga anak sa pakigsaad—makasalig ka niana.

Makabaton ka sa suporta sa katawhan sa pakigsaad sa Dios. Nahisakop ka sa usa ka komunidad sa katawhan sa pakigsaad diha sa Simbahan sa Manluluwas. Kamo mobayaw ug moawhag sa usag usa. Kamo manag-uban sa pagbangotan ug manag-uban sa pagmaya. Kamo mopas-an sa mga palas-anon sa usag usa. Ang imong pamilya, bishop, mga lider, ug ubang mga miyembro sa Simbahan ania dinhi aron motabang nimo, ug ikaw makatabang nila.