Jisas Kraes i givim glad

Yu stap ia blong harem gud mo stap glad. Hemia i stamba blong laef blong yu. Hemia i stamba blong plan ia blong glad we i kam long Papa blong Heven. I no minim se bae yu neva harem nogud o gat hadtaem. Be i minim se Sevya i save helpem yu blong winim ol hadtaem mo faenem glad.

Glad i no kam tru long ol situesen blong yu; be i kam taem u stap folem Jisas Kraes. Maet yu gat wan rabis dei, wan rabis wik, o wan rabis yia. Be glad i no taem we harem nogud i nogat; hem i taem yu gat Kraes long laef blong yu.

Glad we Sevya i givim i bigwan mo i stap longtaem moa bitim eni nara samting. Setan bae i trikim yu blong lukaotem ol samting we i pulum tingting mo i mekem yu harem gud long ol selfis wei o long ol wei blong wol. Eni samting we i go agensem Jisas Kraes mo ol komanmen blong Hem i no save givim yu tru glad o harem gud we bae i stap longtaem. Tingbaot se ol samting blong wol ia i blong smol taem nomo. Gospel blong Jisas Kraes i givim glad mo harem gud we i dip, i tabu, mo i stap longtaem.

Jusum glad. Nomata we i tru se i gat harem nogud mo hadtaem long wol ia, Papa long Heven i fulumap wol ia tu wetem plante naes samting mo helti samting. Lukaotem ol samting ia. Traem blong luksave ol risen blong stap hapi evri dei—ating traem raetemdaon olgeta. Ol samting ia oli ol presen we i kam long Papa blong yu long Heven we i gat lav.

Mekem ol narawan oli harem gud mo filim glad. Jisas Kraes i gat wan glad we i fulwan taem Hem i givim glad long yumi. Yu save folem eksampol blong Hem taem yu hapi blong givim seves long ol narawan. Helpem wan blong i filim lav. Givim wan gud toktok we i kam long hat long wan narawan . Leftemap tingting blong wan we i stap gotru wan hadtaem. Sapos yu filim se yu nidim moa glad long laef blong yu, traem mekem wan narawan i hapi.

Stap glad taem yu wosipim Lod. !Taem yu go long jos, lukluk nomo long glad we Jisas Kraes i givim long yu mo presem Hem from hemia! Mekem pat blong yu blong putum spirit blong glad long ol Jos miting blong yu. Mekem tabu miusik i kam pat blong wosip blong yu long hom mo long jos.

Yu save filim glad iven taem we laef i had. Maet yu stap tingting se olsem wanem i posibol, be hemia i tru. Fet blong yu long Jisas Kraes, long paoa blong Hem blong hilim man, mo ol promes blong Hem we i no save finis i save givim yu glad oltaem. Glad we i kam long Hem i bigwan bitim ol harem nogud mo i givim pis we yumi no save andastanem.

Wan glad we i fulwan i stap wet long yu long selestial kingdom blong God. Jisas Kraes i winim evri samting we i blokem yu blong kasem glad we i no save finis. !Mo taem yu trastem Hem mo folem Hem, glad ia bae i blong yu!