Ol odinens mo kavenan oli givim yu akses long ol blesing blong God

Ol odinens oli poenem yu i go long Jisas Kraes. Wan odinens i wan tabu seremoni we i gat ol tabu mining mo i tijim abaot Jisas Kraes. Eksampol, sakramen i no abaot bred mo wota nomo. Hem i mekem yumi tingbaot Sevya.

Ol kavenan oli wan saen blong lav, tras mo ol tingting blong God. Oli tekem rilesensip blong yu wetem God i go long wan nara level. Blong stap mekem wan kavenan i soem se yu lavem God mo yu komitim yuwan long Hem. Yu save trastem Hem, mo Hem i save trastem yu. Komitmen ia we i moa bigwan i givim moa akses long yu blong kasem paoa mo help blong Hem taem yu kipim ol kavenan blong yu.

Yu mekem ol kavenan wetem God taem yu kasem baptaes wetem konfemesen mo taem yu tekpat long sakramen. Taem yu kasem baptaes, yu promes blong tekem long yuwan nem blong Jisas Kraes, blong givim seves long Hem, mo obei ol komanmen blong Hem long laef blong yu. Long taem blong sakramen, yu mekem promes tu blong tingbaot Hem oltaem. Hemia i ol promes blong yu. Taem yu wantem blong kipim ol promes ia, God i promes blong givim Tabu Spirit long yu olsem kompanion blong yu oltaem.

Mekem sakramen olsem wan tabu presen. Soem komitmen blong yu long Jisas Kraes taem yu stap rere blong kasem wan tabu eksperiens long taem blong sakramen. Tingting hevi long wanem yu save mekem long wik ia blong mekem odinens ia i haelaetem blong wik blong yu long saed blong spirit.

Lukaotem Sevya insaed long ol odinens. Taem yu wajem o tekempat long wan odinens, askem yuwan, “?Wanem nao mi lanem long odinens ia abaot Jisas Kraes?” o “?Hao nao odinens ia i mekem mi kam moa kolosap long Hem?” Luksave wanem Spirit i tijim long yu.

Letem ol kavenan blong yu i gaedem ol aksen blong yu. Taem yu gat wan joes blong mekem, tingbaot kavenan rilesensip blong yu wetem God. Stap fetful long Hem. Askem yuwan: ?Hemia i go wetem ol kavenan blong mi? Eksampol, ?mi lavem mo givhan long ol narawan, mi kamfotem olgeta we oli nidim kamfot, mo mi stanap olsem wan witnes blong Kraes—long evri ples mo oltaem?

Yu save gat paoa blong winim temtesen, sin, mo ol hadtaem blong laef. Stap mekem m o kipim ol kavenan i givim yu akses long paoa blong God. Wetem paoa ia, yu save fesem eni samting wetem tras. !Jisas Kraes i paoa blong yu!

!Yu save kam klin mo kasem fogivnes. Wan pat blong promes blong God long yu taem u stap kipim kavenan blong baptaes blong yu i blong kasem fogivnes from ol sin blong yu. Hemia i minim se taem yu sakem sin mo kipim ol promes blong yu wetem God, Hem bae i fogivim yu mo helpem yu blong kam antap.

Yu save gat Tabu Spirit wetem yu oltaem. Wan nara promes we i go wetem baptaes mo sakramen hem i blong gat Spirit blong Hem wetem yumi oltaem mo blong gat ol enjel blong givhan long yumi. Yu no nid blong gotru ol jalenj blong yu yuwan. God i neva lego kavenan pikinini blong Hem—yu save trastem hemia.

Yu save gat sapot blong ol kavenan pipol blong God. Yu yu pat blong wan komuniti blong wan kavenan pipol insaed long Jos blong Sevya. Yufala i helpem mo leftemap tingting blong yufala wanwan. Yufala i krae tugeta mo glad tugeta. Yufala i karem ol harem nogud blong ol narawan long solda blong yufala. Famli blong yu, bisop, ol lida, mo ol nara Jos memba oli stap blong helpem yu, mo yu save helpem olgeta.