4.
Jisas Kraes bae i helpem yu
Ol Sam 147:3
Jisas Kraes i paoa blong yu. Hem i mekem evri samting we i nid blong mekem se yu save gat glad long laef ia mo blong oltaem. Taem yu stap jusum Hem mo gospel blong Hem, yu stap jusum glad ia we i no save finis.
Nomata sapos yu traehad blong mekem ol gud joes, samtaem bae yu save mekem ol mistek. Bae yu mekem ol samting we yu rigret blong mekem. Evriwan i gotru long hemia. Taem hem ia i hapen, bae i isi blong harem nogud o stap tingting sapos bae yu gud inaf. !Be i gat wan gud nius—wan gudfala nius we i fulap long hop! From we God i lavem yu, Hem i sendem pikinini boe blong Hem Jisas Kraes, we i tekem long Hemwan sin blong yu blong se yu save sakem sin mo gohed blong stap gro.
Ol Trutok We I No Save Finis
Jisas Kraes bae i mekem yu kam strong. Hem i save helpem yu blong jenisim ol tingting blong hat, tingting blong maen, mo ol aksen blong yu. Taem yu wari, fraet, o stap gotru long eni hadtaem, bae Hem i kamfotem yu. Bae Hem i helpem yu long evri samting long laef blong yu. Mi save trastem Hem.
Fasin blong sakem sin i no wan panismen from sin; hem i wei ia nao we Sevya i mekem yumi kam fri aot long sin. Blong sakem sin i minim blong jenis—blong tanem yu aot long sin mo tanem yu i go long God. I minim blong kam moa gud mo kasem fogivnes. Kaen jenis ia i no hapen wantaem nomo olsem; be i wan proses we i gohed.
Ol Invitesen
Mekem Kraes i kam faswan long laef blong yu. Lukaotem help blong Hem long evri samting yu mekem.
Sakem sin. Tanem yu i go long Lod wetem strong tingting blong wantem kam moa gud. Taem yu mekem wan samting i no stret, ones blong talemaot long God mo, sapos i nid, talem long bisop blong yu mo eniwan we yu mekem nogud long hem. Traehad blong mekem samting i kam gud.
Stap glad long presen ia blong mekem gud moa mo kam gud moa. Iven sapos i no isi mo i tekem taem bitim we yu wantem, gohed blong stap traem. Gohed blong stap wok mo gat tras long Lod. Hem bae i helpem yu long evri step blong rod ia.
Ol Promes Blesing
Papa long Heven bae i fogivim mo hilim yu taem yu sakem sin. Bae Hem i putum pis mo glad long ples blong rigret. Bae Hem i nomo tingbaot ol sin blong yu. Jisas Kraes i paoa blong yu, mo wetem paoa blong Hem, tingting blong yu blong wantem kipim ol komanmen blong Hem bae i kam antap.
Bae Hem i jenisim hat mo laef blong yu. Sloslo, bae yu gro mo kam moa olsem Hem.
Ol Kwestin mo Ol Ansa
?Olsem wanem nao bae mi save sapos God i fogivim mi? God i promes se bae Hem i fogivim olgeta we oli sakem sin. Taem yu filim kamfot we i kam long Spirit, bae yu save se paoa blong atonmen blong Sevya i stap wok long laef blong yu.
?Wetaem mi nidim help blong bisop blong sakem sin? Bisop blong yu i holem ol prishud ki mo ol presen long saed blong spirit, blong helpem yu sakem sin. Yu save lukaotem help mo kaonsel blong Hem long eni taem. Sapos yu mekem ol mistek we i series olsem foldaon long loa blong jastiti, go luk bisop blong yu. Bae hem i no jajem yu. Hem i wan ripresentem Jisas Kraes mo bae hem i helpem yu save olsem wanem blong sakem sin fulwan mo kasem hiling blong Sevya mo paoa blong kam strong.
Mi stap traem blong sakem sin be mi gohed blong mekem ol semmak mistek. ?Bae mi mekem wanem? Yu no givap. Tanem yu i go long Kraes, mo putum fet blong yu long Hem. Gladhat blong Hem i inaf. Traem bakegen. Yu neva stap yuwan long ol hadwok blong yu blong stap gro. Jisas Kraes i oltaem stap wetem yu.
Luk long Inos 1:6 (Harem nogud i save go we); Mosaea 4:3 (tru long Tabu Spirit, God i letem yu save se Hem i fogivim yu); 26:30 (Sevya i fogivim yumi taem yumi stap sakem sin); Ita 12:27 (Gladhat blong Sevya i save mekem ol samting we i no strong i kam strong); Moronae 6:8 (Olgeta we oli sakem sin oli kasem fogivnes); 10:32 (kam stret evriwan long Kraes); Ol Doktrin mo Kavenan 1:32 (Lod i fogivim olgeta we oli sakem sin); 58:42–43 (fasin blong sakem sin i tekem tu fasin blong talemaot mo lego sin).
Tempol Rekomen Kwestin
-
?Yu gat wan testemoni abaot Atonmen blong Jisas Kraes mo wok blong Hem olsem Sevya mo Ridima blong yu?
-
?I gat eni series sin long laef blong yu we i nid blong stretem wetem ol prishud atoriti olsem pat blong proses blong yu blong sakem sin?