Kaekae Gud long Toktok, i kam long Liz Lemon Swindle Pikja i kam long Havenlight
11.
Trutok bae i mekem yu fri
Jon 8:32
Papa blong yu long Heven i wan God blong trutok. Hem i save evri samting. Evri trutok i kam long Hem mo i lid i go long Hem. Yu soem se yu tekem trutok i impoten taem yu lukaotem blong stap lanem samting, laef wetem klin fasin mo stanap strong long wanem yu save se i tru—iven sapos yu stanap yuwan.
Ol Trutok We I No Save Finis
Papa long Heven i wantem ol pikinini gel mo boe blong Hem blong stap lanem samting oltaem. Yu gat ol risen long saed blong bodi mo long saed blong spirit, blong lukaotem samting mo laekem blong stap lan. Edukesen i no blong winim mane nomo. Hem i pat blong gol blong yu we i no save finis, blong kam moa olsem Papa long Heven.
Blong stap laef wetem klin fasin i minim se yu laekem wanem we i raet long fored blong God—bitim kamfot blong yuwan, fasin blong kam popula, o moa long hem ia yu lavem kamfot blong yuwan, fasin blong plante man i save yu o fasin blong stap fri oltaem. I minim blong stap mekem wanem we i raet nomo from se i stret.
Yu gat wan samting we i naes tumas blong serem. Gospel blong Jisas Kraes i gat ol ansa long ol kwestin blong laef. Hem i rod blong pis mo hapines. Maet yu no save evri samting, be yu save inaf blong lavem neba blong yu, serem tru prinsipol wetem olgeta, mo invaetem olgeta blong lanem moa.
Ol Invitesen
Stap lan oltaem. Lukaotem ol janis blong mekem maen mo ol skil blong yu i gro. Ol janis ia i kavremap tu stret edukesen long skul o vokesenol trening mo tu fasin blong yuwan blong stap lan tru long ol sos we yu trastem. Mekem Lod i pat long ol wok blong yu mo bae Hem i gaedem yu.
Lanem ol trutok long saed blong spirit. Taem yu lanem abaot wol we i stap raon long yu, lanem tu abaot Sevya we i krietem wol ia. Stadi long laef mo ol tijing blong Hem. Mekem seminari, institiut mo stadi blong yuwan long gospel i pat blong laef blong yu blong stap lan. Hemia i save mekem yu rere blong sevem wan misin mo serem gospel truaot long laef blong yu.
Laef folem klin fasin. Yu no stil, giaman, o trikim man long eni wei—long skul, long wok, onlaen, evri ples. Stap semmak fetful man blong folem Jisas Kraes long pablik mo long praevet.
Ol Promes Blesing
Edukesen i mekem se paoa blong yu blong mekem samting i kam antap blong givim seves long Lod, mo tu olsem wan misinari. I givim paoa long yu blong blesem ol narawan, speseli famli blong yu. Moa yu lanem samting, moa yu save help blong bildim kingdom blong God mo jenisim wol blong i kam gud.
Fasin blong stap ones i givim pis mo respek long yuwan. Taem ol toktok mo aksen blong yu i go stret wetem trutok, yu soem se Lod mo ol narawan oli save trastem yu.
Taem yu stanap from ol tijing blong Jisas Kraes, Hem i stanap wetem yu. !Jisas Kraes i paoa blong yu! Ol narawan maet bae oli no agri wetem ol bilif blong yu, be bae oli luksave fasin blong yu blong gat strong tingting mo fasin blong yu blong stap tru. I nomata se ol narawan oli folem eksampol blong yu o no, tras mo fet blong olgeta long Kraes bae i gro.
Ol Kwestin mo Ol Ansa
?Hem i rong blong gat ol kwestin abaot Jos? ?Hao nao mi save faenem ol ansa? Blong gat ol kwestin i no minim se yu wik o yu nogat fet. Blong stap askem ol kwestin i save help blong bildimap fet. Restoresen blong gospel i stat taem Josef Smit we i gat 14 yia, i askem ol kwestin wetem fet. Lukaotem ol ansa long ol skripja, insaed long ol toktok blong ol profet blong God, ol lida blong yu mo ol fetful memba blong famli, mo long God Hemwan. Sapos ol ansa oli no kam kwik, trastem se bae yu lanem tijing folem tijing. Gohed blong stap laef folem wanem yu save finis mo gohed blong lukaotem trutok.
? Olsem wanem mi save stanap from wanem i raet mo no mekem ol narawan we oli gat defren bilif oli harem nogud? Statem taem yu mekem sua se lav we yu gat long God mo ol pikinini blong Hem, i givim insperesen long ol toktok mo ol aksen blong yu. Blong stap serem gospel i no mas hapen long wan spirit blong raorao be wetem klin maen, tingting we i stap daon mo fasin blong stap kaen. Yu save gat lav long ol nara man iven sapos yu no agri wetem ol tingting blong olgeta. Stap wan gud eksampol olsem wan we i folem Jisas Kraes tru long fasin blong hem blong laef.
Luk long Matiu 5:14–16 (letem laet blong yu i saen); Jon 14:6 (Jisas i trutok); 1 Pita 3:15 (stap rere oltaem blong serem hop blong yu long Kraes); Doktrin mo Ol Kavenan 88:77–80 (ol samting we Lod i wantem yumi blong lanem); 88:118 (lukaotem waes long ol nambawan buk); 93:36 (glori blong God i waes); 124:15 (fasin blong gat klin fasin i minim stap lavem wanem we i stret); 130:18 (save blong yumi bae yumi girap wetem long taem blong laef bakegen).
Ol Tempol Rekomen Kwestin
-
?Yu stap traehad blong stap ones long evri samting we yu mekem?
-
?Yu stap sapotem o promotem eni tijing, praktis, o doktrin we i agensem hemia blong Jos Ia blong Jisas Kraes blong Ol Lata-dei Sent?