3.
Yu save help wetem wok ia blong God.
Papa long Heven i lavem evri pikinini blong Hem. Hem i wantem blong helpem yumi faenem glad, hapines, blong gobak long Hem, mo kasem laef we i no save finis. !Yumi singaotem hemia wok blong Hem blong sevem man mo blong kam olsem wan god, mo Hem i invaetem yu blong help!
Ol Trutok We I No Save Finis
Wok mo glori blong God, i blong mekem man i nomo save ded mo i kasem laef we i no save finis. Fasin blong nomo save ded, hem i blong laef blong oltaem wetem wan bodi we i laef bakegen long ded. Laef we i no save finis, o blong kam olsem wan god, hem i blong kam moa olsem God mo stap laef wetem Hem olsem ol famli blong taem we i no save finis. Evri samting ia oli posibol tru long Jisas Kraes mo Atonmen blong Hem. Mi save Trastem Hem.
Yu save help wetem wok blong God taem yu kam long Kraes mo helpem ol narawan blong mekem semmak. Taem yu mekem eni samting blong helpem wan i folem Jisas Kraes, yu stap help wetem wok blong God.
Ol Invitesen
Laef folem gospel. Bildim fet blong yu long Jisas Kraes. Sakem sin evri dei. Kasem ol prishud odinens blong God mo kipim ol kavenan blong yu. Mekem hemia i kam wan nomol samting long laef blong yu.
Kea long olgeta we oli stap long nid. Faenem ol wei blong givim seves mo givhan long ol narawan, mo tu long famli, ol fren, mo komuniti blong yu. Wan gudfala wei blong helpem olgeta we oli stap long nid i blong obei long loa blong livim kakae mo pem fas ofring.
Invaetem evriwan blong kasem gospel. Letem ol toktok mo aksen blong yu i soem fet blong yu long Jisas Kraes Stap rere blong talem long eni wan we i askem yu abaot hop mo hapines we yu filim olsem disaepol blong Hem. Blong ol yang man, sevem wan ful taem misim i wan prishud responsabiliti. Blong ol yang woman, hem i wan janis we i fulap wetem paoa; prea blong save sapos Lod i wantem yu blong givim seves. Stap rere blong serem gospel truaot long laef blong yu.
Mekem ol famli i kam tugeta blong taem we i no save finis taem yu stap mekem famli histri mo tempol wok. Lanem abaot ol bubu blong yu Faenemaot huia i nidim ol tempol odinens. Go long tempol plante taem olsem we yu save mekem blong mekem baptaes mo kasem konfemesen long bihaf blong olgeta. Sapos yu nidim help, go long FamilySearch.org.
Ol Promes Blesing
Bae yu gat help blong God. Papa long Heven i no askem blong yu mekem wok ia yuwan. Hem i stap wetem yu. Taem yu givim taem mo hat blong yu wetem tingting we i stap daon, bae Hem i mekem ol gudfala samting tru long yu. !Jisas Kraes i paoa blong yu!
Bae yu fulap long glad. !Wok ia blong God i wan wok we i fulap long glad! Taem yu tekpat long wok ia, yu save filim glad ia we Hem i filim. !Pikjarem glad we bae yu serem wetem Papa long Heven mo ol pikinini blong Hem ia we yu help blong tekem olgeta i kam long Hem!
Ol Kwestin mo Ol Ansa
?I tru se God i save yusum mi long wok ia blong Hem? !Yes! I gat plante wei blong help wetem wok ia. Maet bae i luk olsem se ol narawan oli gat moa talen o skil, be papa blong yu long Heven i luk paoa blong yu. Hem i givim yu ol presen we yu save yusum blong givim seves mo mekem ol pikinini blong Hem i kam tugeta. I oraet sapos ol presen ia oli defren long wanem we ol narawan oli gat. Hemia i mekem ol presen blong yu oli tabu. !Oli nidim yu!
Luk long Matiu 10:39 (sapos yu lusum laef blong yu long seves blong Sevya, bae yu kasem bak laef blong yu); 1 Korin 12:14–27 (oli nidim evri memba long bodi blong Kraes); Filipae 1:6 (gat tras se God i stap wok long yu); Jekob 5:72 (Lod blong plantesen i wok wetem yu); Doktrin mo Ol Kavenan 18:15–16 (glad blong yu bae i bigwan wetem olgeta we yu tekem i kam long Kraes); 64:33–34 (wan bigfala wok i hapen tru long ol smol mo simpol samting); Moses 1:6 (“Mi gat wan wok blong yu”); 6:31–34 (God i kwalifaem olgeta we Hem i singaotem, iven sapos oli filim se oli no inaf).
Tempol Rekomen kwestin
-
?Yu gat wan testemoni abaot Restoresen blong gospel blong Jisas Kraes?