Mekem ol joes we i kam tru long insperesen

Insaed long Blong Ol Yut Oli kam Strong, bae yu faenem ol tijing blong Jisas Kraes mo ol profet blong Hem. Wetem ol trutok ia olsem gaed blong yu, yu save mekem ol joes we i kam tru long insperesen we bae i blesem yu naoia mo blong taem we i no save finis.

Yu wan spirit pikinini blong God we Hem i lavem. Bigfala plan ia blong hapines blong Hem i mekem i posibol blong yu kam antap long saed blong spirit mo blong mekem tabu paoa blong yu i gro. Hem i sendem Jisas Kraes blong kam Sevya blong Yu.

Papa blong yu we i stap long Heven i trastem yu. Hem i givim yu ol bigfala blesing, we i kavremap tu gospel ia mo ol tabu odinens wetem ol kavenan we i fasem yu wetem Hem mo i givim paoa blong Hem i kam long laef blong yu. Wetem ol kavenan ia, Hem i ademap glad mo responsabiliti. Hem i save se yu save mekem wan jenis long wol, mo hemia i nidim, long plante wei, blong stap defren aot long wol. Lukaotem daereksen long Papa blong yu long Heven taem yu mekem ol joes. Bae Hem i blesem yu wetem insperesen tru long Tabu Spirit.

Jisas Kraes i rod we i lid i go long glad we i no save finis. Taem yu yusum fridom blong yu, blong jusum blong folem Jisas Kraes, yu stap long rod we i lid i go long glad we i no save finis. Mekem Jisas Kraes i standet blong yu, strong fandesen blong yu. Bildim laef blong yu long ol tijing blong Hem, mo mekem ol joes blong yu tru long ol tijing ia. Ol kavenan we yu mekem taem yu kasem baptaes, long taem blong sakramen, mo insaed long tempol oli ol brikis blong strong fandesen blong yu long Kraes. Bae yu gohed blong fesem ol hadtaem mo temtesen, be Papa long Heven mo Sevya bae Tufala i helpem yu gotru long evriwan.

Stamba tingting blong Blong Ol Yut oli Kam Strong i no blong givim yu wan “yes” o “no” long evri joes we bae yu save fesem. Be, Lod i stap invaetem yu blong laef long wan wei we i moa hae mo tabu—wan laef we lukluk nomo long ol trutok we i no save finis mo ol promes blesing blong Lod. Hemia i wei blong Hem. Gaed ia bae i tijim yu abaot wei blong Hem. Hemia i eksplenem ol trutok we Hem i soemaot. Mekem ol trutok ia oli gaedem yu taem yu stap mekem ol joes—ol bigfala joes, olsem stap mekem ol kavenan insaed long tempol mo stap givim seves long wan misin, mo tu ol joes blong evri dei, olsem hao blong tritim ol narawan o hao blong spendem taem blong yu.

Ol narawan oli save helpem yu, be blong kam antap long saed blong spirit hem i stap long yuwan Hemia i responsabiliti blong yu. Traehad blong kam antap evri dei, kipim ol komanmen blong God mo onarem ol kavenan blong yu, mo helpem ol narawan blong kam kolosap long Sevya.

Luk long Mosaea 4:29–30 (ol wei blong sin oli plante tumas, be yumi wajem yumiwan); Hileman 5:12 (bildim fandesen blong yu long Kraes); Ol Doktrin mo Kavenan 45:57 (yusum Tabu Spirit blong i lidim yu); 25:13 (yu i joen long Lod tru long ol kavenan).