Plan ia blong God i blong yu

Papa long Heven i mekem plan ia. Hem i Papa blong spirit blong yu, mo Hem i lavem yu. Hem i wantem blong givim long yu bigfala blesing ia blong Hem—laef ia we i no save finis wetem Hem. Long nara toktok, Hem i wantem yu blong kam moa olsem Hem mo blong laef olsem Hem long laef ia we i fulap long glad mo glori. Hem i gat evri paoa mo Hem i save evri samting. Yu save trastem hem, iven taem we laef i had.

Jisas Kraes i mekem plan ia i posibol. Bifo oli krietem wol ia, Papa long Heven i bin jusum Jisas Hem blong stap olsem Sevya blong yu. Jisas Kraes nomo i Man ia we i save tekem yu i gobak long Papa blong yu long Heven. Hemia i from wanem yumi jusum blong folem Hem. !Evri samting i dipen long Joes ia!

Mared mo famli oli impoten long plan blong God. Yu yu pat blong famli ia blong God, mo evri spirit pikinini blong Hem oli kam long wol tru long wan mama mo wan papa. God i wantem ol gel mo ol boe blong Hem oli kam antap tugeta mo kam stret evriwan blong taem we i no save finis. Ol man mo woman i givhan long semmak wei insaed long wan mared taem oli stap tugeta mo oli gat lav. Famli long wol ia—nomata long ol hadtaem long hom—i save givim bigfala glad. Famli ia i blong mekem yu rere from laef we i no save finis wetem God.

Oltaem gat wan lukluk we i go kasem taem we i no save finis. Taem yu fesem ol temtesen, ol hadtaem, ol harem nogud o ol had joes, tingbaot plan we ia blong God. Luk olsem wanem ol trutok we i no save abaot plan blong Hem i save helpem yu blong luk ol jalenj blong yu long wan nara wei.

Lukaotem han blong God insaed long laef blong yu. Luksave ol wei we God i yusum blong blesem yu. Maet bae hem i wan gudfala aksen we i kam long wan narawan, wan taem blong pis, o wan ansa blong prea.

Jusum blong folem plan blong God. Lanem abaot wanem Papa blong yu long Heven i wantem yu blong mekem. Lukaotem gaed blong Hem taem yu stap stadi long ol skripja, ol toktok blong ol profet we oli laef, ofisol toktok i go long famli, mo petriakel blesing blong yu. Hemia bae i helpem yu blong rere mo givim seves long Lod, olsem wan misinari mo truaot long laef blong yu. Mekem seves i go long Lod, mared we i no save finis, mo lukaotem ol pikinini i kam ol nambawan samting. Mekem pat blong yu blong gat wan famli naoia taem yu stap folem ol tijing blong Jisas Kraes.

Yu save gotru long ol hadtaem blong laef ia wetem strong tingting mo hop long Kraes. From se yu save abaot plan ia blong God we i no save finis, yu gat wan tul we i gat valiu, blong i helpem yu truaot long ol hadtaem ia. Yu save se i gat moa abaot laef bitim wanem we i hapen bitwin taem yu bon mo taem yu ded. Yu save se yu huia stret, wanem i stamba tingting blong yu, mo huia yu save olsem wetem help blong Sevya. !Jisas Kraes i paoa blong yu!

Yu save kasem laef we i no save finis taem yu folem Jisas Kraes. Hem bae i givim yu paoa blong kam moa olsem Hem, blong gobak long papa mo mama blong yu long heven, mo blong laef long glad wetem olgeta we yu lavem, blong taem we i no save finis. Trastem Jisas Kraes.