Bae Mi No Nidim Samting, i kam long Yongsung Kim Pikja i kam long Havenlight
5.
Wokbaot long laet blong God
Galesia 5:25
Yu mekem ol joes we oli moa gud taem yu save luk samting i klia. Hemia i from wanem laet i impoten tumas; laet i mekem i isi blong luk stret rod. Papa long Heven i givim yu akses long laet blong heven—presen blong tabu spirit—blong helpem yu lukluk klia wanem i gud mo nogud, stret mo no stret.
Ol trutok We I No Save Finis
Yu save gat Tabu Spirit olsem kompanion blong yu oltaem. Taem yu kasem konfemesen olsem wan memba blong Jos, oli invaetem yu blong “kasem Tabu Spirit.” Janis ia blong gat Spirit olsem kompanion blong yu oltaem hem i wan long ol bigfala blesing blong God long yu.
Stap mekem ol gudfala joes i mekem paoa blong yu blong filim spirit i kam antap. I gat fulap gudfala mo helti samting long wol ia. Semmak olsem bodi blong yu we i soem risal blong wanem yu kakae mo drink, maen mo spirit blong yu tufala i soem risal blong wanem yu ridim, wajem mo lisin long hem.
Ol Invitesen
Mekem taem blong Lod evri dei. Lanem abaot Hem Tingbaot Hem oltaem. Prea long Papa blong yu long Heven. Stadi ol tabu skripja mo ol toktok blong ol profet we oli stap laef. Mo afta traehad blong laef folem wanem yu lanem.
Lukaotem wanem we i leftemap tingting, givim insperesen, mo i invaetem spirit. Taem yu mekem ol joes abaot wanem blong wajem, ridim, lisin o tekpat long hem, tingbaot hao nao bae oli mekem yu filim. Oli invaetem ol gudfala tingting? Stap longwe long eni samting we i jikim ol tabu samting o i no folem stret fasin. No tekpat long eni samting we bae i mekem jajmen blong yu i go daon o i no go wetem Spirit olsem vaelens, alkohol, ol drag, mo ol samting we i save spolem yu. Gat strong tingting blong ofem wan vidio o gem, wokbaot aot long wan muvi o wan danis, jenisim miusik blong yu, o tanem yu aot long eni samting we i no go stret wetem Spirit.
Yusum sosol media blong leftemap tingting. Sosol media i save kam wan paoaful tul blong komunikesen. Sapos yu yusum, lukluk nomo long laet, fet mo trutok. No komperem laef blong yu long wanem ol nara man i stap eksperiensem. Tingbaot se valiu blong yu i kam long fasin blong stap wan pikinini blong papa mo mama long heven, be i no long sosol media
Lukaotem ol gudfala eksperiens mo ol tru rilesensip we i stap longtaem. Tingbaot se fasin blong yu blong yusum teknoloji mo sosol media i no tekem ples blong stap go luk mo spendem taem wetem famli mo fren blong yu fes tu fes. Sosol media mo ol nara teknoloji i save tekem plante taem blong yu be i no givim plante valiu i kambak. Spel smol long wol blong intanet mo konek wetem ol pipol long ril laef.
Ol Promes Blesing
Yu save gat Spirit wetem yu oltaem. Promes ia i pat blong kavenan we yu mekem evri taem yu tekpat long sakramen. Tabu Spirit bae i talem witnes long yu abaot Papa long Heven mo Jisas Kraes. Bambae Hem i kamfotem, lidim, givim woning mo mekem yu tabu. Bambae Hem i helpem yu luksave trutok mo luk ol gud samting long wol ia.
Ol Kwestin mo Ol Ansa
?Olsem wanem mi save sapos mi stap filim Tabu Spirit? Stap lanem blong luksave Spirit i tekem taem, praktis mo fasin blong save wet long taem. Hem i toktok long defdefren man long ol defren wei. No ting nating long ol simpol samting—filing blong pis ia we yu kasem taem yu harem testemoni blong wan man o rabis filing ia we yu kasem afta we yu mekem wan rong joes. Lukaotem long skripja ol defren wei we Spirit i yusum blong toktok, prea from, mo gohed blong lukaotem ol janis blong filim Spirit.
?Wanem i ponografi? ?From wanem mi no mas wajem? Ponografi i wan ripresentesen, long ol pikja o toktok, we oli mekem blong givim filing ia blong seks. Ponografi i kam long plante wei, olsem ol vidio, pikja, buk, gem, mo miusik. I save kam long ol mesej tu o ol pikja we ol fren oli stap sendem long olgetawan. Ponografi i spolem ol samting we oli tabu—bodi blong yumi mo ol filing blong seks—mo i no respek ol samting ia. Yu save kam pasem ponografi long ol taem we yu no minim. Be taem yu mestem mo kam pasem ponografi, tanem aot yuwan kwiktaem. Maet bae yu wantem toktok tu wetem wan paren o ol nara adalt we yu trastem. Stap wantem blong wajem ponografi hem i wan sin mo i spolem paoa blong yu blong filim Spirit. Ponografi i mekem paoa blong save kontrolem yuwan i go daon mo i jenisim wei we yu lukluk yuwan mo ol narawan. Jisas Kraes i gat paoa blong helpem yu winim ponografi mo sakem sin. Tanem yu i go long Hem mo tanem yu aot long tudak. Bisop blong yu i save helpem yu blong kasem paoa mo fogivnes tru long Sevya. !Jisas Kraes i paoa blong yu!
Luk long Ol Sam 119:105 (Tok blong God i olsem laet. Oltaem i stap saenem rod blong yumi); Amos 5:14 (lukaotem gudfala samting); Galesia 5:22–23 (ol fasin blong Spirit); Moronae 7:18–19 (laet blong Kraes); Doktrin mo Ol Kavenan 6:23 (Lod i givim filing blong pis); 20:77, 79 (ol sakramen prea).
Tempol Rekomen Kwestin
-
Lod i bin talem se, evri samting, oli mas “mekem long klin fasin” long fored blong Hem ((Doktrin mo Ol Kavenan 42:41). ?Yu yu traehad blong stap laef folem klin fasin long ol tingting mo long ol aksen blong yu?