Bodi blong yu i tabu.

Bodi blong yu i folem imej blong God—Man ia we i gat bigfala glori mo i hae long ful yunives. Ol skripja oli komperem bodi blong yumi long wan tabu tempol, wan ples we Spirit i save stap long hem. I tru se bodi blong yu i no stret evriwan naoia. Be ol eksperiens we yu stap kasem wetem bodi blong yu i save helpem yu rere blong mekem se wan dei, bae yu kasem wan bodi we i stret gud evriwan, i laef bakegen long ded mo i kasem glori.

Sol blong yu i kavremap bodi mo spirit blong yu. From risen ia, helt long saed blong bodi mo helt long saed blong spirit i konek tugeta. Sevya i talemaot Tok blong Waes blong tijim ol prinsipol blong stap lukaotem gud bodi blong yu mo blong promesem ol blesing long saed blong bodi mo long saed blong spirit.

Ol Filing blong seks oli wan impoten pat long plan blong God blong mekem ol hapi mared mo ol famli we i no save finis. Ol filing ia oli no ol sin—be oli tabu. From ol filing blong seks oli tabu tumas mo oli gat paoa, God i givim yu loa blong Hem blong jastiti blong mekem yu rere blong yusum ol filing ia olsem we Hem i wantem yu blong mekem. Loa blong jastiti i tijim se God i apruvum aktiviti blong seks bitwin wan man mo wan woman we tufala i mared nomo. Plante man oli no wantem save o iven jikim loa blong God, be Lod i invaetem yumi blong stap ol disaepol blong Hem mo laef long wan standet we i hae moa.

Tritim bodi blo yu—mo bodi blong ol narawan—wetem respek. Taem yu mekem ol desisen blong yu abaot ol klos blong yu, ea stael mo olsem wanem bae yu luk, askem yuwan “Mi mi stap ona long bodi blong mi olsem wan tabu presen we i kam long God?” Papa long Heven i wantem yumi luk wanwan long yumi folem valiu blong yumi: i no folem bodi blong yumi nomo be folem tingting ia se yumi ol pikinini blong Hem we Hem i lavem, mo yumi gat wan tabu fiuja. No mekem ol stael we i save pulum ol lukluk we i no stret long bodi blong yu, be soem huia yu, olsem wan pikinini blong God wetem wan fiuja we i no save finis. Letem klin fasin long saed blong tingting mo lav blong God i lidim ol joes blong yu. Lukaotem kaonsel long famli blong yu.

Mekem ol samting we bae i mekem bodi blong yu i kam strong, be i no ol samting we bae oli spolem bodi blong yu. Stap glad wetem wan hat we i fulap long tangkyu long ol gudfala samting we God i givim. Be tingbaot se alkohol, tabak, kofi, ti mo ol narafala strong drag mo ol meresin oli no blong bodi mo spirit blong yu. Iven ol meresin we i save helpem man, olsem hem ia we oli givim raet long yu blong tekem, i save spolem yu sapos yu no yusum long stret wei.

Kipim seks mo ol filing blong seks i tabu. Oli no mas stap olsem topik blong mekem fani o mekem samting we oli pulum tingting. Bifo mared bitwin wan man mo wan woman, hem i no stret blong tajem praevet, tabu pat blong bodi blong nara man nomata se hem i werem klos. Long ol joes blong yu abaot wanem yu mekem, lukluk long hem, ridim, lisin long hem, tingting long hem, postem o teksem, no mekem eni samting we i save givim filing blong seks long ol narafalawan o long yuwan. Hem ia i tekem tu ponografi long eni wei. Sapos yu faenem ol situesen o ol aktiviti we i mekem temtesen i kam strong moa, no tekempat long hem. Yu save ol situesen mo aktiviti ia. Mo sapos yu no sua long ol situesen ia, Spirit, famli blong yu mo ol lida blong yu i save helpem yu blong save. Soem long Papa blong yu long Heven se yu onarem mo respektem tabu paoa ia blong krietem laef.

Respek blong yu long yuwan mo long ol nara wan bae i kam antap moa taem yu onarem bodi blong yu tru long aksen blong yu, hao man i luk yu mo fasin blong dresap.

Lod i promesem wan save we rij long olgeta we oli holem loa blong Tok blong Waes. Wan bodi we i helti, i fri aot long adiksen, i mekem paoa blong yu tu i kam antap moa long saed blong kasem revelesen blong yuwan, klia tingting, mo seves i go long Lod.

Blong laef folem loa blong jastiti i givim apruvol blong God long yu mo paoa blong yuwan long saed blong spirit. Hem i protektem yu mo fiuja famli blong yu. Taem yu mared, loa ia bae i givim bigfala lav, tras mo yuniti long mared blong yu. Blong stap obei long loa ia bae i mekem i posibol blong yu gro blong oltaem mo kam moa olsem Papa blong yu long Heven. Fasin blong yu blong gat strong tingting bae i gro taem yu laef olsem wan disaepol blong Jisas Kraes.