Yu kasem blesing tru long ol prishud ki mo atoriti

Evri prishud ki mo atoriti oli kam tru long Jisas Kraes. Olgeta evriwan we oli holem prishud oli save folembak atoriti blong olgeta i gobak long Hem. Sevya i luk huia blong kasem atoriti ia mo huia blong kasem ol prishud ki. Yumi trastem save blong Hem we i stret evriwan.

Jisas Kraes i putumbak prishud blong Hem long dei blong yumi tedei. Hem i givim instraksen long olsem wanem blong yusum prishud ia. Adam, Moses, Pita, mo plante nara profet truaot long histri oli kasem ol prishud ki. Long dei blong yumi, Josef Smith i kasem ol prishud ki we i kam long Jon Baptaes, Pita, Moses, Elaeas, Elaeja, mo ol narawan. Ol memba blong Fas Presidensi mo Kworom blong Olgeta Twelef Aposol i holem evri prishud ki ia long wol tedei. Ol lokol prishud lida mo ol presiden blong kworom tu oli holem ol prishud ki ia from koling blong olgeta. Ol prishud ki oli lidim wok blong God. Oli givim raet mo oli pusum ol man mo woman blong help long wok ia.

Prishud atoriti i blesem evri pikinini blong God. From se prishud i kambak, yu save kasem ol odinens mo mekem ol kavenan wetem God. Yu save mekem samting long nem blong God taem yu kasem wan asaenmen o wan koling we i kam long wan we i gat atoriti.

Akseptem ol Jos koling mo givim seves wetem fet. Taem yu kasem wan Jos koling, oli set apat long yu wetem atoriti we i kam long God, blong givim seves long wok ia. Yu save kasem tu gaed we i kam long Lod from seves ia blong yu. Taem yu givim seves, yu stap ripresentem Jisas Kraes. Givim bes blong yu long Hem.

Sastenem olgeta we God i singaotem olgeta blong givim seves. Blong sastenem i moa bitim we blong leftemap han blong yu nomo taem oli ridim wan nem long wan Jos miting. I minim blong givim sapot mo help. Lukaotem ol wei blong soem se yu sastenem ol pipol we Jisas Kraes i singaotem olgeta blong givim seves insaed long Jos.

Mekem ol wok we ol Jos lida oli askem yu blong mekem—mo tu ol wok we kworom o klas presidensi i askem. Oli gat atoriti we i kam long God, blong givim wok ia long yu. Maet bae oli askem yu blong givhan long wan, welkamem olgeta we oli kam long sakramen miting, o help wetem wan aktiviti. Nomata long asaenmen we oli givim, tekem olsem wan janis blong stap wan disaepol blong Jisas Kraes mo givim seves long ol pikinini blong God.

Yu save trastem se ol odinens we yu kasem i kam long Jisas Kraes. Hemia i wan long ol samting we i mekem Jos ia blong Jisas Kraes i no semmak long ol narafala jos. God i soem paoa blong Hem tru long ol prishud odinens.

Bae yu kam wan tul long ol han blong Lod Taem yu givim seves long Lod wetem atoriti blong Hem mo anda long daereksen blong ol wokman blong Hem we oli holem ol prishud ki, bae Hem i helpem yu blong save hao blong givim seves long ol narawan insaed long wok blong Hem. Jisas Kraes i paoa blong yu. seves blong yu bae i helpem yu blong kam moa kolosap long Hem mo kasem glad.