Ol tempol odinens mo ol kavenan oli givim yumi bigfala janis blong kasem ol blesing blong God.

Endaomen i wan presen blong save we i kam long God. Long ol odinens blong tempol endaomen, yu tekem nem blong Sevya long yu fulwan moa. Yu mekem kavenan blong obei long God, blong mekem sakrifaes from tingting blong Hem, laef folem gospel blong Jisas Kraes, obei long loa blong jastiti, mo konsekresen—o givim—laef blong yuwan mo evri samting we God i givim long yu, i go long Jos blong Hem. Hemia i ol promes blong yu. God i promesem blong blesem yu wetem bigfala save, proteksen, mo paoa blong Hem. Hem i promes tu blong givim long yu laef we i no save finis wetem Hem. Olsem pat blong endaomen, yu kasem tabu janis blong werem gamen blong tabu prishud. Gamen i ripresentem Jisas Kraes mo i rimaenem yumi long ol tempol kavenan.

Tempol siling i mekem kapol mo ol famli oli kam tugeta blong taem we i no save finis. Long odinens blong tempol siling, bae yu mo patna blong yu i mekem wan kavenan wetem God mo wetem wanwan long yutufala. Bae yutufala i promes blong stap fetful long God mo long wanwan long yutufala, blong lavem mo givim seves long wanwan long yutufala mo blong wok tugeta blong kipim ol loa blong God. Hemia i promes blong yu. God i promes se rilesensip blong yu wetem patna blong yu mo wetem ol pikinini blong yutufala i save stap kasem taem we i no save finis. Hem i promesem tu se yu save kasem hae glori ia wetem Hem long selestial kingdom taem yu stap kipim ol kavenan blong yu. Blesing ia yumi singaotem fasin blong kam olsem wan god.

Yu mas gat wan tempol rekomen oltaem. Mit wetem wan memba blong bisoprik blong yu blong kasem wan tempol rekomen. Bae hem i askem sam kwestin abaot olsem wanem yu stap laef folem ol standet blong Lod, bifo yu go insaed long tabu haos blong Hem. Luklukbak moa long ol kwestin ia. (Yu save faenem ol kwestin ia long apendiks blong gaed ia.) Nomata se yu stap longwe long wan tempol, letem rekomen blong yu i stap olsem wan saen blong lav blong yu long Lod mo strong tingting blong yu, blong laef folem ol standet blong Hem.

Go long tempol plante taem olsem we yu save mekem. Wetem tempol rekomen blong yu, yu save go insaed long haos blong Lod, blong baptaes mo kasem konfemesen long bihaf blong ol bubu blong yu, blong mekem se oli save kasem ol blesing ia we yu bin kasem. Mekem yus long evri janis we yu gat blong stap insaed long tempol. Lukaotem Lod insaed haos blong Hem. Lukaotem Hem insaed long ol odinens, ol simbol mo Spirit ia we yu filim. Bae yu faenem Hem.

Stap rere blong mekem ol kavenan insaed long haos blong Lod. Wan long ol nambawan wei blong mekem hemia i blong holemtaet ol kavenan we yu bin mekem taem yu kasem baptaes. Mekem hemia i kam wan gol we bae i gaedem yu blong kasem ol tempol odinens mo blong kam wan we i stap kipim ol kavenan long ful laef blong hem. Statem naoia blong laef folem ol loa we bae yu promes blong folem insaed long tempol: fasin blong obei long ol komanmen blong God, sakrifaes, gospel blong Jisas Kraes, jastiti, mo konsekresen. Famli, bisop mo ol nara Jos lida oli save helpem yu.

Yu save kam moa olsem Jisas Kraes. Hem bae i helpem yu blong kam wan we i laef folem klin fasin. Ol tempol odinens mo ol kavenan bae oli tijim yu hao blong go long ples we God i stap long hem mo kasem laef we i no save finis wetem Hem.

Paoa blong God bae i kavremap yu. Ol tempol kavenan oli kam wetem promes ia se paoa mo glori blong God bae i stap wetem yu. Ol enjel blong Hem bae oli protektem yu.

Taem blong yu insaed long tempol bae i mekem yu kam kolosap moa long Jisas Kraes mo Tabu Spirit. Bae yu filim pis blong God. Bae yu harem voes blong Hem i klia moa. Ol heven bae oli open long yu, mo bae yu kasem wan save we i moa gud abaot ol wei blong Hem. Bae yu kasem moa paoa blong fesem ol hadtaem blong yu from se hat blong yu i konek wetem hat blong Hem.