Mesej we i kam long Fas Presidensi

Mifala i lavem yufala, mo mifala i gat tras long yufala. I tru, se yufala i pat blong ol spirit pikinini blong Papa long Heven we Hem i bin jusum, we i sendem yufala i kam long wol long taem ia blong mekem ol impoten samting.

Yufala strong moa mo yufala i gat moa paoa bitim we yufala i save. Mo taem yufala i dipen long Sevya, paoa blong yufala bae i kam antap moa. Hem, hem i “paoa blong ol yut.”

Gaed ia bae i helpem yufala blong bildimap wan strong fandesen blong stap mekem ol joes mo stap long rod we i lid i go long laef ia we i no save finis. Bae i helpem yufala i rere blong mekem ol tabu kavenan insaed long tempol, rere blong sevem wan misin, mo faenem glad taem yufala i stap folem Jisas Kraes truaot long laef blong yufala. Yufala i gat wan impoten ples long Jos ia blong Hem. Jisas Kraes bae i helpem yufala blong mekem ol plan blong Hem long yufala i hapen.

Mifala i save se God i laef. Hem i prea blong mifala se bae yufala i stap strong long rod blong kavenan—rod ia blong stap mekem mo kipim ol tabu kavenan wetem God. Hemia i rod ia we i lid i go bak long Papa blong yu long Heven. Taem yu mekem hemia, bae yu mekem ol gudfala jenis, bae yu stap serem gospel wetem glad, stap tekem ol pikinini blong God i kam tugeta, mo stap rere long wol ia from Seken Kaming blong Sevya. Tingbaot se: !Jisas Kraes i paoa blong yu!